Atul Londhe on BJP : महाराष्ट्रात दंगली घडविण्याचे कारस्थान? राम कदमांचा आरोप, काँग्रेसचं जोरदार प्रत्युत्तर

धुळ्यात सापडलेल्या तलवारींच्या मुद्यावरुन काँग्रेस आणि भाजपच्या नेत्यांनी एकमेकांवर आरोप प्रत्यारोप केले आहेत. काँग्रेशासित राज्यातून या तलवारी आल्या असल्याचा आरोप आमदार राम कदम यांनी केला आहे.

 Atul Londhe

 Atul Londhe on BJP : धुळ्यामध्ये सापडलेल्या 90 तलवारींच्या पार्श्वभूमीवर भाजप आमदार राम कदम यांनी काही प्रश्न उपस्थित केले आहेत. काँग्रेशासित राज्यातून या तलवारी आल्या असल्याचा आरोप राम कदम यांनी केल आहे. राजस्थानमध्ये काँग्रेसचे सरकार आहे, त्या ठिकाणाहून या तलवारी धुळ्यामध्ये जात होत्या असे कदम म्हणाले. महाराष्ट्रात दंगली घडविण्याचे कारस्थान कोण रचतयं? असा सवालही त्यांनी उपस्थित केला आहे. मात्र, त्यांच्या या आरोपावर काँग्रेसने जोरदार प्रत्युत्तर दिले आहे.

 

महाराष्ट्रात #दंगली घडविण्याचे कारस्थान ?
जेथे #कॉंग्रेसचे सरकार आहे..
त्या #राजस्थान मधून #जालना जाणार्‍या 90 तलवारी ताब्यात.
याआधीच #पुणे येथे तलवारी औरंगाबाद येथे जात असताना ताब्यात..
काय #कॉंग्रेस ह्या षड्यंत्र सामील आहे का ? #ठाकरेसरकार ह्याच्या मुळाशी

— Ram Kadam (@ramkadam) April 28, 2022

दंगलीचा फायदा नेमका कोणाला होतो? असा उलटा सवाल काँग्रेसचे प्रवक्ते अतुल लोंढे यांनी उपस्थित केला आहे. तुम्ही तलवारीवर बोलता पण गुजरातमधून आलेल्या ड्रग्जवर का बोलत नाही. भाजपच्या राज्यातून ड्रग्ज मोठ्या प्रमाणावर येत आहे, त्यावर काय कारवाई केली ते सांगा? असा सवालही लोंढे यांनी राम कदम यांना केला.

भाजपचे नेते नेहमी दोन समुदायमध्ये भांडण व्हावे अशीच वक्तव्ये करत असल्याचे लोंढे म्हणाले. भाजपच्या नेत्यांनी शांत राहिले तर सगळा देश शांत होईल असे ते म्हणाले. उत्तर प्रदेशच्या लखनौ विद्याविपाठात 50 विद्यार्थी बॉम्ब बनवताना पकडले गेले.  ते अल्पसंख्याक असते तर बवाल झाला असता, मात्र ती बातमी दाबली गेली. त्याबाबत काय करणार आहेत असा सवालही लोंढे यांनी उपस्थितीत केला. दरम्यान, ज्या तलवारी सापडल्या त्याबाबत राज्य सरकार चौकशी करणार आहे.  गृहमंत्रालय याच्या तळाशी जाणार असल्याचे लोंढे म्हणाले. जे कोणी महाराष्ट्राचे वातावरण दुषीत करण्याचा प्रयत्न करणार त्याच्यावर कारवाई होईल असेही लोंढे यांनी सांगतिले. दरम्यान, महाराष्ट्रात जे ड्रग्ज येत आहे, त्याच्यावरही बंधन टाकले पाहिजे असे लोंढे म्हणाले. भाजप राज्यातील जनतेला नशेली करण्याचे काम करत असल्याचा आरोप लोंढे यांनी केला.
 
महाराष्ट्रात काय घडते ते बघा. युपीत काय चालले हे महाराष्ट्राच्या जनतेचा प्रश्न आहे का?  या तलावारी राजस्थानमधूनच का येतात? इकडे तिकडे बोटे का दाखवता, बोटे दाखवू नका जबाबदारी घ्या, असेही राम कदम यावेळी म्हणाले.

प्रकरण काय

धुळ्यातील सोनगीर पोलिसांनी मोठी कारवाई केली आहे. पेट्रोलिंग करताना एका गाडीची झाडाझडती घेतली असता गाडीत 90 तलवारी आढळून आल्या. पोलिसांनी या प्रकरणी चार जणांना ताब्यात घेतलं आहे. या कारवाईत पोलिसांनी 7 लाख 13 हजार 600 रुपये किंमतीचा मुद्देमालही जप्त केला आहे. सोनगीर पोलीस हे पेट्रोलिंग करत असताना शिरपूरकडून धुळेच्या दिशेने एक भरधाव स्कॉर्पिओ कार येत होती. पोलिसांनी कारला थांबवण्याचा प्रयत्न केला. परंतु चालकाने गाडी न थांबवता आणखी जोराने पळवली. यामुळे पोलिसांचा संशय बळावला. त्यांनी पाठलाग करुन संबंधित गाडी थांबवून विचारणा केली. यावेळी गाडीत असलेल्या चार जणांची झाडाझडती घेतली असता त्याच्याकडे 90 तलवारी आढळून आल्या. सोनगीर पोलिसांनी तात्काळ चारही आरोपींना तलवारींच्या सोबत ताब्यात घेऊन पुढील तपास सुरु केला आहे.

महत्त्वाच्या बातम्या: