Jagdeep Dhankhar: माजी उपराष्ट्रपतींना गायब केल्याचा आरोप होत असतानाच जगदीप धनखड पुन्हा चर्चेत; आता घेतलेल्या निर्णयानं भूवया उंचावल्या!
जगदीप धनखड यांनी 21 जुलै 2025 रोजी आरोग्याच्या कारणास्तव उपराष्ट्रपती पदाचा राजीनामा दिला, त्यानंतर देशातील राजकारण तापले. राजीनाम्यानंतर ते कोणत्याही सार्वजनिक कार्यक्रमात दिसले नाहीत.
Jagdeep Dhankhar: माजी उपराष्ट्रपती जगदीप धनखड यांनी तडकाफडकी पदाचा राजीनामा दिल्यानंतर अजूनही गायब आहेत. विरोधकांकडून लापता राष्ट्रपती म्हणत ते आहेत तरी कोठे अशी विचारणा होत आहे. शिवसेना खासदार संजय राऊत यांनी केंद्रीय गृहमंत्री अमित शाह यांना पत्र लिहून जगदीप धनखड यांचा ठावठिकाणा विचारला होता. जगदीप धनखड यांनी 21 जुलै 2025 रोजी आरोग्याच्या कारणास्तव उपराष्ट्रपती पदाचा राजीनामा दिला, त्यानंतर देशातील राजकारण तापले. राजीनाम्यानंतर ते कोणत्याही सार्वजनिक कार्यक्रमात दिसले नाहीत किंवा त्यांचे कोणतेही विधान बाहेर आले नाही.
जगदीप धनखड यांनी घेतलेल्या निर्णयाने भूवया उंचावल्या
दरम्यान, आता जगदीप धनखड यांनी घेतलेल्या निर्णयाने भूवया उंचावल्या आहेत. जगदीप धनखड यांनी राजस्थान विधानसभेत पेन्शनसाठी अर्ज केला आहे. माजी आमदार असल्याने त्यांनी सभापती वासुदेव देवनानी यांना पेन्शनसाठी अर्ज पाठवला आहे. सभापती देवनानी यांनी एबीपी न्यूजशी फोनवरून बोलताना अर्ज मिळाल्याची पुष्टी केली. नियमांनुसार निर्णय घेतला जाईल आणि सभागृहालाही कळवले जाईल असे त्यांनी सांगितले.
किशनगड मतदारसंघातून आमदार म्हणून निवडून आले
जगदीप धनखड 1993 मध्ये काँग्रेसच्या तिकिटावर अजमेर जिल्ह्यातील किशनगड विधानसभा मतदारसंघातून आमदार म्हणून निवडून आले होते. ते राजस्थानच्या दहाव्या विधानसभेचे सदस्य होते. 1994 ते 1997 पर्यंत ते विधानसभेच्या नियम समितीचे सदस्यही होते. राजस्थानमधील माजी आमदारांना 35 हजार रुपये पेन्शन मिळते. 70 वर्षांवरील माजी आमदारांना 20 टक्के जास्त पेन्शन दिली जाते. जगदीप धनखड 74 वर्षांचे आहेत, त्यामुळे त्यांना आता 42 हजार रुपये पेन्शन मिळेल. यासोबतच बस प्रवास, उपचार आणि सरकारी अतिथीगृहांमध्ये कमी भाड्याने राहण्याची सुविधा देखील उपलब्ध असेल.
राजस्थानमधील झुंझुनू मतदारसंघातून लोकसभेचे खासदार
पश्चिम बंगालचे राज्यपाल होण्यापूर्वी जगदीप धनखड हे 1989 ते 1991 पर्यंत राजस्थानमधील झुंझुनू मतदारसंघातून लोकसभेचे खासदार होते. चंद्रशेखर यांच्या सरकारमध्ये त्यांना केंद्रीय संसदीय कामकाज राज्यमंत्रीपदाची जबाबदारीही मिळाली. ते 2019 ते 2022 पर्यंत पश्चिम बंगालचे राज्यपाल होते आणि या काळात मुख्यमंत्री ममता बॅनर्जी यांच्याशी राजभवनच्या संघर्षाच्या बातम्या अनेकदा समोर येत होत्या. जगदीप धनखड यांनी 2022-25 पर्यंत भारताचे उपराष्ट्रपतीपद भूषवले.
पावसाळी अधिवेशनादरम्यान जगदीप धनखड यांनी राजीनामा दिला, ज्यामुळे राजकारण आणखी तापले. काँग्रेसचे राष्ट्रीय अध्यक्ष आणि राज्यसभेतील विरोधी पक्षनेते मल्लिकार्जुन खरगे यांनी केंद्र सरकारला याबाबत प्रश्न विचारले. ते म्हणाले, "आम्हाला काहीतरी गोंधळ आहे असे वाटते. त्यांची तब्येत खूप चांगली आहे, ते स्वतःपेक्षा जास्त आरएसएस आणि भाजपचे समर्थन करायचे, त्यांचे स्वतःचे लोकही त्यांचा इतका बचाव करू शकले नसते. त्यांची निष्ठा आरएसएस आणि भाजपशी होती, त्यांनी ज्या पद्धतीने राजीनामा दिला आहे, यामागे कोण आहे आणि ती कारणे देशाला सांगितली पाहिजेत."
इतर महत्वाच्या बातम्या
महत्त्वाच्या बातम्या
