Jhund : ...जेव्हा ‘महानायक’ प्रत्यक्ष भेटले! रिंकू-आकाशने शेअर केला ‘झुंड’चा अनुभव

Jhund Movie : अभिनेत्री रिंकू राजगुरू या चित्रपटात ‘मोनिका’ ही भूमिका साकारत आहे. तर, अभिनेता आकाश ठोसर यात ‘संभ्या’ हे पात्र साकारणार आहे.

Rinku Rajguru,Akash Thosar

Jhund : बॉलिवूडचे महानायक अर्थात अभिनेते अमिताभ बच्चन (Amitabh Bachchan) यांच्या आगामी ‘झुंड’ (Jhund) या चित्रपटाची सध्या जोरदार चर्चा पाहायला मिळतेय. या चित्रपटात ‘सैराट’ जोडी रिंकू राजगुरू (Rinku Rajguru) आणि आकाश ठोसरदेखील (Akash Thosar) महत्त्वाच्या भूमिकेत दिसणार आहेत. या निमित्ताने दोघांनीही आपला या चित्रीकरणाचा अनुभव चाहत्यांसोबत शेअर केला आहे. ज्यांना आपण लहानपणापासून पडद्यावर पाहतो, त्यांच्यासोबत काम करताना नेमकं काय वाटलं हे त्यांनी शब्दांत व्यक्त केलं आहे.

अभिनेत्री रिंकू राजगुरू या चित्रपटात ‘मोनिका’ ही भूमिका साकारत आहे. तर, अभिनेता आकाश ठोसर यात ‘संभ्या’ हे पात्र साकारणार आहे.

अनुभव खूप काही शिकवणारा होता : आकाश ठोसर

महानायक अमिताभ बच्चन यांच्यासोबत काम करतानाचा अनुभव शेअर करताना आकाश म्हणतो, ‘मी लहानपणापासून त्यांचा चाहता होतो. त्यांचं जुम्मा चुम्मा गाणं ऐकल्यापासून मी त्यांना चुम्मा या नावानेच ओळखायचो. बाबादेखील मला सांगायचे की, अमुक अमुक गोष्ट पूर्ण कर, मग तुला चुम्माचा चित्रपट दाखवेन. त्यांना पाहतच मी लहानाचा मोठा झालो. त्यांच्यासोबत काम करताना खूप भीती वाटत होती. पण मग, नागराज अण्णांनी समजावलं आणि मी भीती बाजूला ठेवून चित्रपट पूर्ण केला.’ अर्थात हा किस्सा त्याने अमिताभ बच्चन यांना सांगितला नाही. मात्र, हा चित्रपट करताना खूप काही शिकायला मिळाल्याचं आकाश ठोसर म्हणाला.

मी चाहती आहे हे जाणूनबुजून विसरले : रिंकू राजगुरू

बिग बींसोबत काम करण्याचा अनुभव सांगताना रिंकू म्हणाली की, ‘आपण सगळेच त्याने चाहते आहोत. प्रत्येक चित्रपटप्रेमीचे ते आवडते आहेत. त्यांच्यासोबत काम करताना साहजिकच दडपण होतं. पण, त्यावेळेस काम देखील खूप महत्त्वाचं होतं. अशावेळी मी चाहती आहे विसरून, एक अभिनेत्री असण्याचे कर्तव्य पहिला निभावले. भीती बाजूला सारून मी त्यांच्यासोबतचे सीन पूर्ण केले. अर्थात या सगळ्यात मला अनेकांची मदत झाली.’

‘झुंड’ हा एक स्पोर्ट्स ड्रामा चित्रपट आहे, ज्यामध्ये अमिताभ बच्चन हे निवृत्त क्रीडा शिक्षक विजय बारसे यांची मुख्य भूमिका साकारताना दिसणार आहेत. विजय बारसे हे रस्त्यावरील मुलांना फुटबॉल खेळण्यासाठी आणि संघ तयार करण्यास प्रोत्साहित करतात. ते स्लम सॉकरचे संस्थापक देखील आहेत. या स्पोर्ट्स ड्रामा चित्रपटाचे दिग्दर्शन नागराज मंजुळे करत आहेत. ‘झुंड’ची निर्मिती भूषण कुमार, कृष्ण कुमार, सविता राज यांनी केली आहे. अजय-अतुल या लोकप्रिय जोडीने संगीताची धुरा सांभाळली आहे. हा चित्रपट 4 मार्च रोजी चित्रपटगृहात प्रदर्शित होणार आहे. 

हेही वाचा :

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha