Mumbai Bike Taxi : मुंबईत अवैध पेट्रोल बाईक टॅक्सीवर कडक कारवाई; रॅपिडो-ओला-उबरचा परवाना तात्पुरता रद्द
Mumbai Bike Taxi : मुंबईत बेकायदा पेट्रोल बाईक टॅक्सीवर कडक कारवाई होणार आहे. रॅपिडो, ओला, उबरच्या बाईक टॅक्सी परवान्यांवर परिवहन विभागाने गंडांतर आणत नियमांचे उल्लंघन केल्याचा ठपका ठेवला आहे.
Mumbai Bike Taxi Crackdown : मुंबईत बेकायदा पेट्रोल बाईक टॅक्सीविरोधात राज्य सरकारने कडक भूमिका घेतली आहे. आतापर्यंत आरटीओकडून बाईक जप्त करून चालकावर कारवाई केली जात होती. मात्र आता नियमांचे उल्लंघन करणाऱ्या बाईक चालकांसोबतच बाईक मालकावरही थेट गुन्हा दाखल करण्याचा निर्णय घेण्यात आला आहे. परिवहनमंत्री प्रताप सरनाईक यांनी ही माहिती दिली. तसेच आवश्यक कागदपत्रांची पूर्तता न केल्यामुळे रॅपिडो, ओला आणि उबरला देण्यात आलेला बाईक टॅक्सी परवाना तात्पुरता रद्द करण्याचा निर्णयही परिवहन विभागाने घेतला आहे.
Rapido, Ola, Uber ला कागदपत्रांसाठी मुदत
सरकारने या कंपन्यांना आवश्यक कागदपत्रे सादर करण्यासाठी एक महिन्याचा कालावधी दिला होता. मात्र त्या कालावधीत कागदपत्रे सादर न केल्याने सरकारने कठोर पाऊल उचलले आहे. मंत्री प्रताप सरनाईक यांनी सांगितले की, कंपन्यांना आणखी एक महिन्याची अंतिम मुदत देण्यात आली आहे. या कालावधीतही कागदपत्रे सादर न केल्यास त्यांचा परवाना कायमस्वरूपी रद्द केला जाईल.
फक्त ई-बाईकला होती परवानगी
सरकारने सुरुवातीला पर्यावरणपूरक वाहतूक वाढावी आणि महाराष्ट्रातील भूमिपुत्रांना रोजगार मिळावा या उद्देशाने ई-बाईक टॅक्सीला परवानगी दिली होती. मात्र ओला, उबर आणि रॅपिडो या कंपन्यांनी इलेक्ट्रिक बाईकऐवजी पेट्रोलवर चालणाऱ्या बाईकचा वापर सुरू ठेवला. वारंवार कारवाई करूनही नियमांचे पालन होत नसल्यामुळे सरकारने त्यांच्यावर कारवाई करण्याचा निर्णय घेतला आहे.
आता चालकासह मालकावरही गुन्हा
नव्या निर्णयानुसार पेट्रोल बाईक टॅक्सी चालवताना आढळल्यास केवळ चालकावरच नव्हे तर बाईक मालकावरही थेट गुन्हा दाखल केला जाणार आहे. तसेच संबंधित बाईकही जप्त केली जाणार आहे. सरकारच्या या निर्णयामुळे मुंबईतील बेकायदा बाईक टॅक्सी सेवा बंद होण्याची शक्यता असून हजारो चालकांवर त्याचा परिणाम होऊ शकतो.
ही बातमी वाचा:
महत्त्वाच्या बातम्या
