सलमान खानला सर्पदंश! पनवेलमधील फार्महाऊसवरील घटना, संकट टळल्याची माहिती

Salman Khan farmhouse : बॉलिवूड अभिनेता सलमान खान याला सर्पदंश झाला असल्याची माहिती समोर आली आहे. सलमान खान याची प्रकृती चांगली असल्याचे समजते.

सलमान खानला सर्पदंश! पनवेलमधील फार्महाऊसवरील घटना, संकट टळल्याची माहिती

Salman Khan :  बॉलिवूड अभिनेता सलमान खान याला पनवेलच्या फार्म हाऊसजवळ सापाने दंश केला असल्याची माहिती समोर येत आहे. शनिवारी रात्री उशिराच्या सुमारास ही घटना घडली असल्याची माहिती आहे. सापाने दंश केल्यानंतर सलमान खान याच्यावर कामोठे येथील एमजीएम रुग्णालयात  उपचार करण्यात आले. उपचारानंतर सलमान खानला रुग्णालयातून घरी जाण्याची परवानगी देण्यात आली. आज सकाळी 9 वाजता सलमान खानला डिस्चार्ज देण्यात आला. साप बिनविषारी असल्याने सलमानवरील मोठे संकट टळले. 

नाताळची सुट्टी आणि सोमवारी 27 डिसेंबर रोजी येणाऱ्या वाढदिवसाच्या निमित्ताने सलमान खान आणि त्याच्या जवळचे मित्र पनवेल येथील फार्म हाऊसवर होते. सुट्टीच्या काळात सलमान खान पनवेल येथील फार्म हाऊसवर येत असतो. शनिवारी मध्यरात्री सलमान खान फार्म हाऊस बाहेर पडला होता. त्याच वेळी त्याच्या पायाला सापाने दंश केला. सापाने दंश केल्याचे समोर आल्यानंतर तातडीने प्राथमिक उपचारानंतर कामोठे येथील रुग्णालयात दाखल करण्यात आले. 

सलमान खानला मध्यरात्री दोन वाजण्याच्या सुमारास सापाने दंश केला.  त्यानंतर रात्री तीन वाजण्याच्या सुमारास सलमान खानला कामोठे येथील एमजीएम रुग्णालयात दाखल करण्यात आले होते. रुग्णालयात उपचार केल्यानंतर सकाळी ९ वाजण्याच्या सुमारास सलमान खानला रुग्णालयातून डिस्चार्ज देण्यात आला. रुग्णालयाकडून याबाबत अधिकृत माहिती देण्यात आली नाही. या प्रकरणाची गुप्तता बाळगण्यात येत असल्याचे सूत्रांनी सांगितले. 

सोमवारी, 27 डिसेंबर रोजी सलमान खानच्या वाढदिवसाच्या निमित्ताने फार्म हाऊसवर पार्टीचे आयोजन करण्यात आले होते. आज, रविवारीदेखील काही सेलिब्रेटी फार्म हाऊसवर येणार होते. मात्र, या घटनेनंतर सलमान खानच्या वाढदिवसाच्या पार्टीबाबत प्रश्नचिन्ह निर्माण झाले आहे. सलमान खान या फार्म हाऊसवर कुटुंबीयांसह, जवळच्या मित्रांसह येत असतो. कोरोना लॉकडाउनच्या काळात सलमान खान आणि जवळचे काही मित्र या फार्म हाऊसवर वास्तव्यास होते. त्यावेळी त्याने शेतीदेखील केली होती. त्याचे फोटो, व्हिडिओ सोशल मीडियावर व्हायरल झाले. 

पाहा व्हिडिओ : अभिनेता सलमान खानला सर्पदंश, साप बिनविषारी असल्यानं अनर्थ टळला

इतर महत्त्वाच्या बातम्या: