Pratibha Dhanorkar : अपक्षांच्या पाठिमागे राहिला तरी शेवटी मी 5 वर्ष खासदार आहे, माझा विरोध करणाऱ्या प्रत्येकाचा लेखाजोखा घेणार, प्रतिभा धानोरकर यांचा इशारा

Pratibha Dhanorkar, Chandrapur : चंद्रपूरच्या खासदार प्रतिभा धानोरकर यांनी अपक्ष उमेदवारांच्या पाठिमागे उभे राहणाऱ्या लोकांना इशारा दिलाय.

Photo Credit - abp majha reporter

Source : ABPLIVE AI

Pratibha Dhanorkar, Chandrapur : "काही लोक अपक्षांच्या मागे गाड्या घेऊन खुलेपणाने फिरत आहेत. तुम्ही अपक्षांच्या पाठिमागे राहिला तरी शेवटी समाजाची खासदार म्हणून मी पाच वर्षे राहणार आहे. माझा विरोध करणाऱ्या प्रत्येकाचा लेखाजोखा या काळात घेणार" , असा इशारा काँग्रेसच्या खासदार प्रतिभा धानोरकर यांनी दिली आहे. त्यांच्या या वक्तव्यानंतर वाद होण्याची शक्यता आहे. वरोरा विधानसभा मतदारसंघातील काँग्रेसचे उमेदवार प्रवीण काकडे यांच्या प्रचारार्थ खासदार इमरान प्रतापगढी यांची प्रचारसभा सोमवारी (दि. 19) झाली. या सभेला खासदार धानोरकर यांची प्रमुख उपस्थिती होती. या सभेला संबोधित करताना त्यांनी हा धमकीवजा इशारा दिला. या संदर्भातील व्हिडीओ सोशल मीडियावर व्हायरल होत आहे.  

खासदार धानोरकर म्हणाल्या, ‘आज जे लोक माझा विरोध करीत आहेत. माझ्या विरोधात बोलत आहेत. आत्ता मी कुणाला काहीही बोलणार नाही. त्यांनी लक्षात घ्यावे की, लोकसभा क्षेत्रात 2800 गावे आहेत. या गावांतील कोण कार्यकर्ता माझ्या बाजूने होता. कोण विरोधात होता. प्रत्येकाचा आढावा आजही माझ्याजवळ आहे. ही तर एक विधानसभा आहे. फक्त 300 गावांची आहे. या विधानसभेतील गावनिहाय, घरनिहाय कुणी विरोध केला आणि कोण बाजूने होता याचा चिठ्ठा काढण्यास फार वेळ लागणार नाही. 20 नोव्हेंबरला मतदान झाले की गावनिहाय यादी माझ्याकडे येईल. कोणाला कसे ठेवायचे आणि कुणाला बारीक करायचे याचा सर्व विचार मी या ठिकाणी करून आहे, असा दमही त्यांनी दिला. 

या मतदारसंघात दिवंगत माजी खासदार बाळू धानोरकर यांचे बंधू अनिल धानोरकर यांनी बंडखोरी करीत वंचित बहुजन आघाडीकडून अपक्ष अर्ज दाखल केला आहे. अनिल यांना काँग्रेसकडून उमेदवारी अपेक्षित होती. पण, खासदार प्रतिभा धानोरकर यांनी भाऊ प्रवीण काकडे यांच्यासाठी जोर लावला. यावरून धानोरकर कुटुंबात फूट पडल्याचीही चर्चा आहे.

यावेळी खासदार प्रतिभाताई धानोरकर यांनी महाविकास आघाडी व काँग्रेस पक्षाच्या भूमिका सविस्तर समजावून सांगत, मतदारांशी आत्मीयतेने संवाद साधला. त्याचबरोबर, आघाडीचे अनेक कार्यकर्तेही मोठ्या संख्येने उपस्थित होते, ज्यामुळे वातावरणात उत्साह आणि पक्षासाठी एकजुटीचा संदेश जाणवत होता.लोकसभेप्रमाणेच विधानसभा निवडणुकीतही मतदार "पंजा" या चिन्हाला भरभरून साथ देतील, असे स्पष्ट संकेत दिसून येत होते.

 

इतर महत्त्वाच्या बातम्या