अल्पवयीन मुलीचे अपहरण करुन तिच्यावर सतत दोन दिवस सामूहिक बलात्कार; दोघांना अटक

अल्पवयीन मुलीचे अपहरण करुन तिच्यावर सतत दोन दिवस सामूहिक बलात्कार करण्यात आल्याची घटना उघडकीस आली आहे. याप्रकरणी हडपसर पोलीस स्टेशनमध्ये गुन्हा दाखल झाला असून दोघांना अटक करण्यात आली आहे.

पुणे : हडपसर पोलीस स्टेशनच्या हद्दीतून एक धक्कादायक प्रकार उघडकीस आलाय. एका 15 वर्षीय अल्पवयीन मुलीचे अपहरण करून तिच्यावर सतत दोन दिवस सामूहिक बलात्कार करण्यात आला आहे. हडपसर पोलीस स्टेशनमध्ये याप्रकरणी पोस्को, अपहरण आणि बलात्काराचा गुन्हा दाखल करण्यात आला असून दोघांना अटकही करण्यात आली आहे.

हडपसर पोलिसांनी दिलेल्या माहितीनुसार, 26 ऑक्टोबरला पीडित मुलीचा आईसोबत वाद झाला होता आणि त्यामुळे रागाच्या भरात ती घर सोडून बाहेर पडली होती. यावेळी तिला ओळखत असलेल्या एका तरुणाने तुला गावी सोडतो असे म्हणून रिक्षातून आपल्याबरोबर नेले आणि एका इमारतीच्या फ्लॅटवर नेऊन तिच्यावर बलात्कार केला. त्यानंतर ही मुलगी तिथून आपली सुटका करत गाडीतळ याठिकाणी आली. या ठिकाणी आलेल्या आणखी एका व्यक्तीने तिला स्वतःच्या दुचाकीवर बसवून भेकराईनगर येथील एका इमारतीच्या गच्चीवर नेले आणि तिच्यावर पुन्हा एकदा बलात्कार केला.

त्या व्यक्तीने दुसऱ्या दिवशी तिला बोपदेव या गावात नेले आणि तिच्यावर आणखी एकदा अत्याचार केला. आरोपी इतक्यावरच थांबला नाही तर त्याने त्याच्या आणखी दोन नातेवाईकांना बोलावून घेतले आणि त्यांनीही तिच्यावर बलात्कार केला. अशाप्रकारे दोन दिवसात या अल्पवयीन मुलीवर चार जणांनी वेळोवेळी बलात्कार केला.

सुदैवाने ही मुलगी या नराधमांच्या तावडीतून सुटली आणि एका नागरिकाच्या मदतीने तिने हडपसर पोलीस स्टेशन गाठत आपल्या सोबत घडलेला सर्व प्रकार सांगितला. त्यानंतर पोलिसांनी तातडीने गुन्हा दाखल करत आरोपीचा शोध सुरू केला आणि यातील दोन आरोपींना अटकही केली आहे. पीडित मुलगी ही मराठवाड्यातील एका छोट्याशा गावातून पोटाची खळगी भरण्यासाठी आई-वडिलांसह पुण्यामध्ये आली होती. पीडित मुलीचे आई-वडील दोघेही मोलमजुरी करून उदरनिर्वाह करतात.

खाऊ देण्याच्या बहाण्याने दोन मुलींना पळवण्याचा प्रयत्न, आरोपी रिक्षा चालकाच्या मुसक्या आवळण्यात यश