Nashik News: त्र्यंबकेश्वर मंदिरात सुरक्षा रक्षकांची गुंडगिरी, भाविकाला कपडे फाटेपर्यंत लाथा-बुक्क्यांनी मारहाण
Nashik News: त्र्यंबकेश्वर मंदिरात भाविकांना सुरक्षा रक्षकांकडून मारहाण करण्यात आल्याचा प्रकार उघडकीस आलाय. यामुळे भाविकांमध्ये संतापाची लाट उसळली आहे.
Nashik News: नाशिक जिल्ह्यातील तीर्थक्षेत्र त्र्यंबकेश्वर मंदिर (Trimbakeshwar Temple) येथे भाविकांना सुरक्षा रक्षकांकडून मारहाण केल्याच्या दोन घटना समोर आल्या असून त्यांचे व्हिडिओ सोशल मीडियावर व्हायरल झाले आहेत. या घटनेमुळे भाविकांमध्ये संतापाची लाट उसळली आहे.
Nashik News: दर्शन रांगेतील भाविकाला लाथाबुक्क्यांनी मारहाण
व्हायरल झालेल्या एका व्हिडिओमध्ये दर्शनासाठी रांगेत उभ्या असलेल्या एका भाविकाला सुरक्षा रक्षकांकडून ढकलाढकली करत लाथाबुक्क्यांनी मारहाण केल्याचे दिसते. संबंधित भाविकाचे कपडे फाटेपर्यंत त्याला मारहाण करण्यात आल्याचे दिसून येत आहे. मंदिर परिसरात उपस्थित इतर भाविकांनी हा प्रकार मोबाईलमध्ये चित्रीत केला. दुसऱ्या व्हिडिओमध्येही भाविकाला सुरक्षा रक्षकांनी मारहाण केली आहे. या दोन्ही घटनांमुळे मंदिर प्रशासनाच्या कारभारावर प्रश्नचिन्ह उपस्थित झाले आहे.
Nashik News: सलग सुट्ट्यांमुळे मोठी गर्दी
सध्या सलग सुट्ट्या आल्याने त्र्यंबकेश्वरमध्ये दर्शनासाठी भाविकांची मोठी गर्दी झाली आहे. हजारो भाविक सकाळपासूनच रांगेत उभे राहत असल्याने व्यवस्थापनावर ताण वाढला आहे. मात्र गर्दी नियंत्रण करताना भाविकांशी गैरवर्तन होणे योग्य नसल्याची भावना व्यक्त केली जात आहे. तर यापूर्वीही सुरक्षा रक्षकांकडून भाविकांशी उद्धट वर्तन आणि मारहाण केल्याचे प्रकार घडले आहेत.
Nashik News: काय कारवाई होणार?
या प्रकरणी मंदिर प्रशासनाकडून अद्याप प्रतिक्रिया मिळालेली नाही. आता या प्रकरणी संबंधितांवर नेमकी काय कारवाई केली जाणार? याकडे सर्वांचे लक्ष लागले आहे. दरम्यान, 'दर्शनासाठी तासन्तास प्रतीक्षा आणि मिळतोय लाथाबुक्क्यांचा प्रसाद,' अशा शब्दांत भाविकांनी तीव्र नाराजी व्यक्त केली आहे. मंदिर प्रशासनाने तत्काळ दखल घेऊन सुरक्षा रक्षकांवर कारवाई करावी, अशी मागणी भाविकांकडून व्यक्त केली जात आहे.
इतर महत्त्वाच्या बातम्या
Before You Go
Candle march to pay tribute to Ketan Agarwal : केतन अगरवालला श्रद्धांजली वाहण्यासाठी कॅण्डल मार्च
महत्त्वाच्या बातम्या
