BMC Guidelines for Holi 2021 | कोरोनाच्या वाढत्या प्रादुर्भावामुळे होळी आणि रंगपंचमीवर निर्बंध

मुंबई : कोरोना विषाणूच्या रुग्णांचे मागील काही दिवसांतील आकडे पाहता आता राज्यात आणि स्थानिक पातळीवरही प्रशासनाकडून काही महत्त्वाची पावलं उचलण्यात येत आहेत. त्याच धर्तीवर मुंबईतही काही निर्बंध लावले जाण्यास सुरुवात झाली आहे. 

काही दिवसांवर येऊ घातलेल्या होळी सणाच्या पार्श्वभूमीवर नागरिकांना कोरोनाबाबतची सावधगिरी पाळत होळी आणि धुलिवंदन सार्वजनिकरित्या साजरा करण्यास मनाई केली आहे. कोरोना रुग्णांची सध्याची संख्या आणि एकंदर धोका पाहता, खबरदारीचा उपाय म्हणून होळी आणि त्याच्या दुसऱ्याच दिवशी येणारं धुलिवंदनाचं पर्व हे खासगी आणि सार्वजनिकरित्या साजरा करण्यावर पालिकेनं निर्बंध आणले आहेत. 

मी जबाबदार या मोहिमेअंतर्गत व्यक्तीगत पातळीवरही हा उत्सव साजरा न करण्याचं आवाहन पालिकेतर्फे करण्यात आलं आहे. सदर नियमावली आणि आवाहन पाहता नियमांचं उल्लंघन केल्यास साथरोग कायदा 1897, आपत्ती निवारण कायदा 2005 आणि भारतीय दंडसंविधानाअंतर्गत असणाऱ्या 1860 कायद्यान्वये कारवाई करण्यात येणार आहे.