Pakistan Cricket Team: टीम इंडियानं हस्तांदोलन केलं नाही, पाकिस्ताननं रडीचा डाव लावला, पण क्रिकेटमधील नियम आहे तरी काय? शेकहँड करावाच लागतो का??

सूत्रांच्या माहितीनुसार, जर भारतीय संघ 28 सप्टेंबर रोजी अंतिम फेरीत पोहोचला आणि जिंकला तर ते पाकिस्तान क्रिकेट बोर्डाचे अध्यक्ष मोहसिन नक्वी यांच्याकडून ट्रॉफी स्वीकारणार नाही.

Pakistan Cricket Team

Source : Facebook

Pakistan Cricket Team: आयसीसीने आशिया चषकातून मॅच रेफरी अँडी पायक्रॉफ्ट यांना काढून टाकण्याची पीसीबीची विनंती फेटाळून लावली. 14 सप्टेंबर रोजी झालेल्या भारत-पाकिस्तान सामन्यादरम्यान टीम इंडियाने पाकिस्तानी खेळाडूंशी हस्तांदोलन केले नाही. त्यामुळे आता पाकिस्तान माघार घेणार असल्याचे वृत्त आहे. त्यामुळे आजचा (17 सप्टेंबर) सामना होणार की नाही? याबाबत साशंकता निर्माण झाली आहे. पाकिस्तान क्रिकेट बोर्डाने यासाठी मॅच रेफरीला जबाबदार धरलं आहे. सूत्रांचे म्हणणे आहे की भारतीय संघाने हा निर्णय अचानक घेतला नाही. बीसीसीआय आणि सरकार दोघांनीही सामना खेळवला जाईल यावर सहमती दर्शवली, परंतु मैत्रीपूर्ण वातावरण राहणार नाही.

टीम इंडिया संपूर्ण स्पर्धेत हस्तांदोलन करणार नाही 

पाकिस्तानी खेळाडूंशी हस्तांदोलन न करण्याची ही पद्धत संपूर्ण स्पर्धेत सुरू राहील. हा खेळाडू, बीसीसीआय आणि सरकार यांच्यातील परस्पर करार आहे. बीसीसीआयकडून अद्याप अधिकृत प्रतिसाद मिळालेला नाही, परंतु सूत्रांच्या माहितीनुसार, जर भारतीय संघ 28 सप्टेंबर रोजी अंतिम फेरीत पोहोचला आणि जिंकला तर ते पाकिस्तान क्रिकेट बोर्डाचे अध्यक्ष मोहसिन नक्वी यांच्याकडून ट्रॉफी स्वीकारणार नाही. नक्वी हे आशियाई क्रिकेट परिषदेचे (एसीसी) विद्यमान अध्यक्ष देखील आहेत.

21 सप्टेंबर रोजी भारत आणि पाकिस्तान पुन्हा भिडू शकतात 

पाकिस्तान आज जिंकल्यास 21 सप्टेंबर रोजी सुपर फोर फेरीत दोन्ही संघ पुन्हा एकमेकांसमोर येऊ शकतात आणि भारत तिथेही अशीच भूमिका राखण्याची शक्यता आहे. तथापि, हे साध्य करण्यासाठी पाकिस्तानला युएईला पराभूत करावे लागेल. मात्र, पाकिस्तानची भूमिका कायम राहिल्यास समीकरण बदलू शकतात. 

पाकिस्तानने पंचांना हस्तांदोलन न केल्याबद्दल दोषी ठरवले

भारतीय संघाने हस्तांदोलन करण्यास नकार दिल्याबद्दल पाकिस्तानने मॅच रेफरी अँडी पायक्रॉफ्ट यांच्याकडे तक्रार केली आणि भारतीय संघाने अनादर दाखवल्याचा आरोप केला. पीसीबीचा आरोप आहे की पंचांनी टॉसनंतर दोन्ही कर्णधारांना हस्तांदोलन न करण्यास सांगितले आणि हे भारतीय संघाच्या दबावाखाली केले गेले. पाकिस्तान क्रिकेट बोर्डाचे अध्यक्ष मोहसीन नक्वी यांनी सोमवारी सांगितले की, "पीसीबीने पायक्रॉफ्टला तात्काळ काढून टाकण्याची मागणी केली आहे. त्यांनी आयसीसीच्या आचारसंहिता आणि क्रिकेटच्या भावनेचे पालन केले नाही."

माजी पाकिस्तानी क्रिकेटपटूंनीही या वादात उडी घेतली 

हँडशेकच्या वादात अनेक माजी पाकिस्तानी क्रिकेटपटूंनीही उडी घेतली आहे. पाकिस्तानचे माजी कर्णधार रशीद लतीफ म्हणाले, "जर हे फक्त पहलगामबद्दल असेल तर भारताने आमच्याशी युद्ध लढले पाहिजे. या गोष्टी क्रिकेटमध्ये आणू नका." माजी वेगवान गोलंदाज शोएब अख्तर म्हणाला की, भारतीय संघाने सामन्यात खूप चांगली कामगिरी केली, परंतु तो फक्त एक क्रिकेट सामना होता आणि त्यात राजकारण आणू नये. माजी पाकिस्तानी अष्टपैलू शाहिद आफ्रिदी म्हणाले, "क्रिकेटला क्रिकेट राहू द्या, त्याचे राजकारण करू नका."

सूर्या म्हणाला, "काही गोष्टी क्रीडा भावनेच्या वरच्या आहेत"

सामन्यानंतर, भारतीय कर्णधार सूर्यकुमार यादवने हस्तांदोलन वादावर म्हटले की, "काही गोष्टी क्रीडा भावनेच्या वरच्या आहेत. संघ व्यवस्थापनाने बीसीसीआय आणि भारत सरकारच्या संमतीने हा निर्णय घेतला. भारतीय संघ पहलगाम हल्ल्यातील पीडितांसोबत उभा आहे आणि हा विजय भारतीय सशस्त्र दलांना समर्पित आहे."

आयसीसी किंवा एसीसी नियम काय म्हणतात?

कोणत्याही क्रिकेट नियमावलीत सामन्यानंतर हस्तांदोलन करण्याची आवश्यकता नाही. हस्तांदोलन हा नियम नाही; तो खेळाच्या भावनेचा भाग मानला जातो. म्हणूनच दोन्ही संघांचे खेळाडू जवळजवळ प्रत्येक सामन्यानंतर भेटतात आणि हस्तांदोलन करतात. बीसीसीआयच्या एका अधिकाऱ्याने सांगितले की, "नियमांमध्ये असे काहीही नाही की तुम्हाला विरोधी संघाशी हस्तांदोलन करावे लागेल. ज्या देशाशी संबंध इतके ताणलेले आहेत अशा देशाशी हस्तांदोलन करण्यास भारतीय संघ बांधील नाही."

तक्रारीत विलंब केल्याबद्दल पीसीबी संचालक निलंबित

पीसीबीने त्यांचे आंतरराष्ट्रीय क्रिकेट ऑपरेशन्स संचालक उस्मान वहाला यांना तक्रार दाखल करण्यास विलंब केल्याबद्दल निलंबित केले आहे. पाकिस्तानी मीडिया रिपोर्ट्सनुसार, वहाला यांनी टॉसच्या वेळी तक्रार दाखल करायला हवी होती. त्यांनी असे करण्यास विलंब केला, ज्यामुळे पीसीबी अध्यक्ष मोहसिन नक्वी यांनी वहाला यांना निलंबित केले.

मॅच रेफरी अँडी पायक्रॉफ्ट कोण आहेत?

अँडी जॉन पायक्रॉफ्ट हे झिम्बाब्वेचे माजी क्रिकेटपटू आहेत. त्यांनी तीन कसोटी आणि 20 एकदिवसीय सामने खेळले आहेत. 2009 मध्ये त्यांना आयसीसी एलिट पॅनेल ऑफ मॅच रेफरीजमध्ये समाविष्ट करण्यात आले.

इतर महत्वाच्या बातम्या