LSG vs DC, IPL 2023 : लखनौचा दिल्लीवर 50 धावांनी दणदणीत विजय, मार्क वूडच्या पाच विकेट

LSG vs DC, IPL 2023 : लखनौकडून मार्क वूड याने भेदक मारा करत दिल्लीचा पराभव केला. मार्क वूडने पाच विकेट घेतल्या.

DC vs LSG | IPL 2023

के.एल. राहुलच्या नेतृत्वातील लखनौ संघाने दिल्लीचा 50 धावांनी पराभव केला. लखनौने दिलेल्या 194 धावांच्या आव्हानाचा पाठलाग करताना दिल्लीने 9 गड्यांच्या मोबदल्यात 143 धावांपर्यंत मजल मारली.

डेविड वॉर्नर याने अर्धशतकी खेळी करत एकाकी झुंज दिली. लखनौकडून मार्क वूड याने भेदक मारा करत दिल्लीचा अर्धा संघाला तंबूत धाडले.

कर्णधार डेविड वॉर्नर आणि रिले रुसो यांचा अपवाद वगळता दिल्लीच्या एकाही फलंदाजाला अश्वासक खेळी करता आली नाही. पृथ्वी शॉ, मिचेल मार्श, सर्फराज खान रॉवमन पॉवेल, अमन खान यांना मोठी धावसंख्या उभारता आली नाही.

कर्णधार डेविड वॉर्नर याने एका बाजूला किल्ला लढवला पण दुसऱ्या बाजूने साथ मिळाली नाही. पृथ्वी शॉ 12, मिचेल मार्श 00, सर्फराज खान 4, अमन खान 4, रॉवमन पॉवल 1 यांना मोठी खेळी करता आली नाही.

प्रथम फलंदाजी करताना काइल मेअर्सच्या अर्धशतकाच्या जोरावर लखनौने 20 षटकात सहा विकेटच्या मोबदल्यात 193 धावा केल्या. संथ सुरुवातीनंतर काइल मेअर्स याने आक्रमक रुप घेतले.

कर्णधार माघारी परतल्यानंतरही काइल मेअर्स याने तुफानी फटकेबाजी केली. काइल मेअर्सच्या फटकेबाजीसमोर दिल्लीची गोलंदाजी कमकुवत जाणवत होती. दिपक हुड्डासोबत मेर्सने 80 धावांची भागिदारी केली.

काइल मेअर्स याने अवघ्या 38 चेंडूत 73 धावांचा पाऊस पाडला. या खेळीदरम्यान काइल मेअर्स याने सात गगनचुंबी षटकार लगावले. तर दोन खणखणीत चौकार मारले.

काइल मेअर्स खेळत असताना लखनौ संघ आरामात 200 धावांचा पल्ला पार करेल असे वाटत होते. पण अक्षर पटेल याने काइल मेअर्स याचा अडथळा दूर केला. अक्षर पटेल याने काइल मेअर्स याला क्लीन बोल्ड केले.

मागील काही दिवसांपासून खराब फॉर्ममध्ये असणारा राहुल आयपीएलच्या पहिल्या सामन्यात अपयशी ठरला. राहुल याला दुहेरी धावसंख्याही पार करता आली नाही.

राहुल याने 12 चेंडूत फक्त आठ धावा केल्या. या खेळीदरम्यान राहुलने एक षटकार मारला. राहुलला मोठी खेळी करण्यात अपयश आले. त्याशिवाय दीपक हुड्डा आणि मार्कस स्टॉयनिस यांनी संथ खेळी केली. स्टॉयनिस याने दहा चेंडूत फक्त 12 धावा केल्या.

या खेळीदरम्यान त्याने एक षटकार लगावला. तर दीपक हुड्डा याने 18 चेंडूत 17 धावा केल्या. या खेळीदरम्यान त्याला एकही चौकार अथवा षटकार लगावता आला नाही. क्रृणाल पांड्याला अखेरच्या षटकात धावा काढण्यात अपयश आले. पांड्याने 13 चेंडूत नाबाद 15 धावा केल्या.