NCP: अजित पवार-सुप्रिया सुळेंचा एकत्र फोटो, शरद पवारांना घातली साद; पुण्यातील डेक्कन परिसरातील बॅनर्स अचानक गायब, नेमकं काय घडलं?

NCP: आता उपमुख्यमंत्री अजित पवार आणि खासदार सुप्रिया सुळे यांनी एकत्र यावं असा आशयाचा बॅनर पुण्यातील डेक्कन परिसरात लावण्यात आला होता.

NCP

पुण्यात राजकीय पक्षाचे बॅनर किंवा फ्लेक्स लावणं हे काही नवीन नाही. विविध पक्षाचे पदाधिकारी किंवा कार्यकर्ते त्यांच्या भावना व्यक्त करण्यासाठी शहरातील प्रमुख रस्त्यांवर आकर्षक मजकूर असलेले फ्लेक्स उभारत असतात.

यातच आता उपमुख्यमंत्री अजित पवार आणि खासदार सुप्रिया सुळे यांनी एकत्र यावं असा आशयाचा बॅनर पुण्यातील डेक्कन परिसरात लावण्यात आला होता.

मात्र काही वेळातच तो बॅनर आता काढून टाकण्यात आला आहे. गेल्या काही दिवसांपासून दोन्ही राष्ट्रवादी पुन्हा एकत्र येणार का अशी चर्चा जोर धरू लागली आहे.

यातच शरद पवारांच्या राष्ट्रवादी काँग्रेसचे कोथरूड विधानसभा मतदारसंघाचे कार्याध्यक्ष विनायक गायकवाड यांनी एक फ्लेक्स लावला, त्याची चर्चा सध्या सुरू आहे.

या फ्लेक्स वर सुप्रिया सुळे यांना "अजित दादा व आपण पुन्हा एक कुटुंब होऊयात" असा आशय लिहिण्यात आला आहे. तसेच "सुप्रियाताई साहेबांची इच्छा पूर्ण करा" असं सुद्धा यावर लिहिण्यात आलं आहे.