Ravikant Tupkar Accident: कर्जमुक्ती आंदोलनाच्या सभेवरून परतताना रविकांत तुपकरांच्या वाहनाचा अपघात; मद्यधुंद ट्रक चालकाने पाठीमागून दिली धडक

Ravikant Tupkar Accident: शेतकरी नेते रविकांत तुपकर यांच्या वाहनाला अपघात झाल्याची माहिती समोर आली आहे.

Ravikant Tupkar Accident

धाराशिव: गेल्या काही दिवसांमध्ये मोठ्या प्रमाणावर अपघातांचं प्रमाण वाढल्याचं चित्र आहे. अशातच शेतकरी नेते रविकांत तुपकर यांच्या वाहनाला अपघात झाल्याची माहिती समोर आली आहे.

धाराशिव जिल्ह्यातील वाशी पारगाव टोल नाक्याजवळ मद्यधुंद ट्रक चालकाने तुपकर यांच्या इनोवाला दिली पाठीमागून धडक दिल्याने हा अपघात झाला आहे.सुदैवाने कुणालाही दुखापत झालेली नाही.

अंबाजोगाई तालुक्यातील देवळा येथील कर्जमुक्ती आंदोलनाच्या सभेला संबोधित करून तुपकर लातूर जिल्ह्यात जात असताना हा अपघात झाला आहे. पोलिसांनी ट्रक चालकाला ताब्यात घेतलं असून चौकशी सुरु केली आहे.

तुपकरांच्या कार चालकाने दिलेल्या पोलिस तक्रारीनुसार, बीडकडे जाणाऱ्या लेनमध्ये टोल भरण्यासाठी थांबलो. तेव्हा पाठीमागून त्यांच्या ईनोव्हा कारला कोणीतरी जोरदार धक्का दिल्याचे जाणवले व मोठा आवाज आला व गाडी थोडी पुढे सरकली.

त्यामुळे काय झालं हे पाहण्यासाठी गाडीतुन खाली उतरून मागे पाहिले असता आमच्या गाडीला पाठीमागुन ट्रकने धडक दिल्याचे लक्षात आले. ट्रकमध्ये एक क्लिनर व ड्रायव्हर बसलेले होते.

त्यानंतर मी ट्रकचे चालकांकडे त्याचे नाव गावाबाबत विचारणा केली असता त्याने अडखळत्या आवाजात त्याचे नाव संभाजी विटठल डोंगरे रा, संभाजी चैक पंढरपुर असे असल्याचे सांगितले.