Sandeep Deshpande : मोठी बातमी! संदीप देशपांडे हल्ला प्रकरणाचे ठाणे कनेक्शन? तीनजण ताब्यात
Sandeep Deshpande : संदीप देशपांडे हल्ला प्रकरणी आता ठाणे कनेक्शन असल्याचे समोर आले आहे. पोलिसांनी तिघांना ताब्यात घेतले आहे.
Sandeep Deshpande : महाराष्ट्र नवनिर्माण सेनेचे नेते संदीप देशपांडे (MNS Leader Sandeep Deshpande Attack) यांना झालेल्या मारहाणी प्रकरणाचे ठाणे कनेक्शन असल्याचे म्हटले जात आहे. पोलिसांनी आज ठाण्यातून तीन जणांना ताब्यात घेतले आहे. पोलिसांच्या कारवाईची माहिती समजताच मनसे पदाधिकारी आरोपींच्या घरी दाखल झाले.
संदीप देशपांडे यांना मुंबई येथे मारहाण झाल्याप्रकरणात आता आणखी काही सीसीटीव्ही फूटेज आणि काही व्हिडीओ देखील समोर आले आहेत. मुंबई पोलिसांनी आज शिवसेना ठाकरे गटाशी संबंधित असलेल्या दोघांना अटक केली. त्यानंतर आता, या मारहाण प्रकरणातून ठाण्यातील चिराग नगर येथून तिघांना चौकशीकरिता ताब्यात घेतले आहे. ही माहिती कळताच मनसेचे ठाणे-पालघर जिल्हा अध्यक्ष अविनाश जाधव, ठाणे शहर अध्यक्ष रवींद्र मोरे व उपाध्यक्ष सुशांत सूर्य राव यांनी त्यांच्या कार्यकर्त्यांसह त्या तिघांच्या घरी गेले.
संदीप देशपांडे हल्ला प्रकरणाचा तपास शिवाजी पार्क पोलिसांसह गुन्हे शाखादेखील करत आहे. या प्रकरणाच्या तपासासाठी पोलिसांकडून विविध तपास पथके तयार करण्यात आली आहे. पोलिसांकडून वेगाने कारवाई सुरू आहे.
भांडुपमधून दोन जण ताब्यात
मनसे नेते संदीप देशपांडे यांच्यावरील हल्लाप्रकरणी दोन जणांना पोलिसांनी ताब्यात घेतलं आहे. मुंबईच्या भांडुप भागातून या दोन जणांना अटक करण्यात आली आहे. घटना घडल्यानंतर पोलिसांनी वेगाने तपासाची चक्र फिरवली होती. तपासासाठी विशेष पथकाची देखील नेमणूक करण्यात आली होती. त्यानंतर अखेर आज (4 मार्च) दोन जणांना ताब्यात घेण्यात आलं आहे. दोन जणांपैकी अशोक खरात हे शिवसेना महाराष्ट्र माथाडी जनरल कामगार सेनेचे उपाध्यक्ष आहेत. ते भांडुपच्या कोकण नगर विभागाचे रहिवासी आहेत. आज सकाळी साडेसहा वाजता गुन्हे शाखेने खरात यांना ताब्यात घेतले आहे.
शिवाजी पार्कवर मॉर्निंग वॉक करताना झाला होता हल्ला
मनसेचे सरचिटणीस संदीप देशपांडे हे शिवाजी पार्कवर मॉर्निंग वॉक करत असताना काल (3 मार्च) चार अज्ञातांनी त्यांच्यावर हल्ला केला होता. क्रिकेट खेळताना जे स्टम्प्स वापरतात त्याद्वारे देशपांडे यांच्यावर हल्ला करण्यात आला. या चारही इसमांनी आपला चेहरा कपड्याने झाकला होता. संदीप देशपांडे हे शिवाजी पार्कवर मॉर्निंग वॉकला जातात याची आरोपींना कल्पना होती. हल्ला केल्यानंतर आरोपींनी तिथून पळ काढला. संदीप देशपांडे यांना थोडा मार लागला आहे. या हल्ल्याची माहिती समोर आल्यानंतर मनसैनिकांनी संताप व्यक्त केला. तर, याची माहिती समजताच शिवाजी पार्क पोलीस तात्काळ घटनास्थळी दाखल होऊन त्यांनी पंचनामा केला. त्यानंतर पोलिसांनी या प्रकरणाचा पुढील तपास सुरु केला होता.
महत्त्वाच्या बातम्या
