Cidco Lottery 2024 : गुड न्यूज, सिडकोकडून नवी मुंबईतील 902 घरांसाठी लॉटरी,जाणून घ्या योजनेचं संपूर्ण वेळापत्रक
Cidco Lottery 2024 : नवी मुंबईतील 902 घरांसाठी सिडकोनं लॉटरी काढली आहे. त्या घरांच्या सोडतीसाठी आजपासून नोंदणी करता येईल.
नवी मुंबई : शहर आणि औद्योगिक विकास महामंडळ महाराष्ट्र मर्यादित म्हणजेच सिडको यांच्याकडून नवी मुंबईतील 902 घरांसाठी लॉटरी काढण्यात आली आहे. नवी मुंबईत घर घेण्याची इच्छा असणाऱ्यांसाठी ही सुवर्णसंधी असणार आहे. प्रधानमंत्री आवास योजनेतील सिडकोच्या कळंबोली, खारघर आणि घणसोली येथील घरांसह व्हॅलीशिल्प, स्वप्नपूर्ती आणि वास्तूविहार सेलीब्रेशन येथील एकूण सिडकोकडून 902 घरांसाठी अर्ज मागवण्यात येत आहेत. कृष्ण जन्माष्टमीच्या मुहूर्तावर या योजनेच्या सोडतीसाठी दुपारी बारा वाजल्यापासून अर्ज दाखल करता येतील.
सिडकोच्या वेबसाईटवर या 902 घरांसाठी नोंदणी करता येणार आहे. या घरांसाठी अर्ज सादर करण्यासाठी सिडकोच्या वेबसाईटवर 27 ऑगस्ट म्हणजेच आज दुपारपासून सुरुवात होणार आहे.
योजनेचं वेळापत्रक
ऑनलाईन अर्ज नोंदणी : 27 ऑगस्ट 2024 दुपारी 12 वाजता नोंदणी सुरु ते 25 सप्टेंबरपर्यंत
सोडतीसाठी ऑनलाईन अर्जाची सुरुवात : 27 ऑगस्ट 2024 दुपारी 12 वाजता नोंदणी सुरु ते 26 सप्टेंबरपर्यंत
ऑनलाईन शुल्क भरणा : 27 ऑगस्ट ते 27 सप्टेंबर
संगणकीय सोडत : 10 ऑक्टोबर
सिडकोच्या घरांची वैशिष्ट्ये
९०२ एवढ्या प्रमाणावर सदनिका उपलब्ध
रस्ते, रेल्वे, मेट्रोद्वारे उत्तम कनेक्टिव्हिटी
आधुनिक सोयी सुविधांनी परिपूर्ण गृहसंकुले
शाळा, महाविद्यालय, रुग्णालय इ. मूलभूत सुविधांनी परिपूर्ण परिसर
विकसित नोडमध्ये व मोक्याच्या ठिकाणी असणारी गृहसंकुले
घणसोली, खारघर व कळंबोली नोडमधील आर्थिकदृष्ट्या दुर्बल घटकाच्या सदनिकांकरिता प्रधानमंत्री आवास योजनेंतर्गत रु. २.५० लाखांचे अनुदान उपलब्ध
सिडकोची ही घरं आर्थिक दृष्ट्या दुर्बल घटक, खुला प्रवर्ग, मध्यम उत्पन्न गटांसाठी असतील. कळंबोली, खारघर आणि घणसोली येथे एकूण 213 घरं आहेत. यापैकी 175 सर्वसामान्य प्रवर्गासाठी तर 38 घरं आर्थिक दृष्टया दुर्बल घटकांसाठी आहेत. खारघरमध्ये सिडकोचे सप्नपूर्ती आणि वास्तूविहार सेलीब्रेशन हे प्रकल्प देखील आहेत. तिथं 689 घरं उपलब्ध आहेत.
सिडकोच्या घरांची किंमत किती?
सिडकोच्या घरांची किंमत कमीत कमी 26 लाखांपासून 2 कोटी रुपयांपर्यंत आहे. आर्थिक दृष्ट्या दुर्बल घटकातील नागरिक, मध्यम उत्पन्न गट आणि उच्च उत्पन्न गटातील नागरिकांसाठी ही घरं उपलब्ध आहेत. सिडकोनं अधिकृत वेबसाईटवर अर्ज नोंदणी करण्याचं आवाहन केलं आहे.
दरम्यान, म्हाडानं मुंबईत 2030 घरांची लॉटरी काढलेली असताना लगेचच सिडकोची लॉटरी देखील जाहीर झाल्यानं मुंबई आणि नवी मुंबईत घर घेणाऱ्यांसाठी सुवर्णसंधी आहे. सिडकोच्या या योजनेची सोडत 10 ऑक्टोबरला होणार आहे. ज्या नागरिकांना घर घ्यायचं आहे ते सोडतीसाठी नोंदणी करु शकतात.
संबंधित बातम्या :
महत्त्वाच्या बातम्या
ट्रेंडिंग न्यूज
