उद्धव ठाकरेंचे मेहुणे श्रीधर पाटणकरांना मोठा दिलासा, ईडीच्या विरोधानंतरही विशेष कोर्टानं सीबीआयचा क्लोजर रिपोर्ट स्वीकारला

Shrishar Patankar Latest News : सीबीआय आणि ईडीच्या रडारवर असलेले उद्धव ठाकरे यांचे मेहुणे श्रीधर पाटणकर यांच्याशी संबंधित प्रकरणात मोठा दिलासा मिळाला आहे.

Shrishar Patankar Latest News

Shrishar Patankar Latest News :  गेले अनेक दिवसांपासून सुरू असलेल्या सत्ता संघर्षात एकीकडे सत्ता गमावलेल्या उद्धव ठाकरे यांना मोठा धक्का बसला आहे. मात्र दुसरीकडेच सीबीआय आणि ईडीच्या रडारवर असलेले उद्धव ठाकरे यांचे मेहुणे श्रीधर पाटणकर यांच्याशी संबंधित प्रकरणात मोठा दिलासा मिळाला आहे. या प्रकरणी कारवाईसाठी सबळ पुरावे उपलब्ध नसल्याचा रिपोर्ट सीबीआयकडून कोर्टात सादर करण्यात आलाय आणि कोर्टानं तो स्वीकारला आहे.

84.6 कोटीच्या कथित घोटाळ्याप्रकरणी ईडीनं युनियन बँकेचे अधिकारी, काही ज्वेलर्स आणि पुष्पक बुलियन कंपनीचे संचालक यांच्याविरोधात  मनी लॉन्ड्रिंगचा गुन्हा दाखल करत तपास सुरू केला होता.या प्रकरणात ईडीनं केलेल्या कारवाईत श्रीधर पाटणकर यांची साडेसहा कोटींची मालमत्ता जप्तही करण्यात आली होती. मात्र ईडीचा विरोध असूनही काल विशेष सीबीआय न्यायालयानं सीबीआयच्या लाचलुचपत प्रतिबंधक विभागानं दाखल केलेला क्लोजर रिपोर्ट स्वीकारला आहे. उद्धव ठाकरेंचे मेव्हणे श्रीधर पाटणकर यांना आरोपी बनवण्यात आलेल्या प्रकरणात सीबीआयनं सादर केलेला क्लोजर रिपोर्ट कोर्टानं मान्य केला आहे. त्यामुळे या प्रकरणातील तपास थांबवण्यास मुंबई सत्र न्यायालयातील विशेष सीबीआय कोर्टानं केंद्रीय तपासयंत्रणेला हिरवा कंदील दाखवलाय.

चंद्रकांत पटेल यांच्याशी संबंधित पुष्पक बुलियनवरील आर्थिक गैरव्यवहारांच्या आरोपात हे प्रकरण समोर आलं होतं. नोटबंदीच्या काळात बुलियन कंपनी आणि युनियन बँक ऑफ इंडिया यांच्यात झालेले काही व्यवहार चौकशीच्या रडारवर होते. तब्बल 84.6 कोटींच्या नोटा पुष्पक बुलियनच्या विविध खात्यात जमा करण्यात आल्या होत्या. त्यानंतर यातनं सोनं खरेदी करून हा पैसा सफेद करण्यात आल्याचा आरोप करण्यात आला होता. याच खात्यातील काही रक्कम श्रीधर पाटणकर यांच्या 'श्री साईबाबा गृहनिर्मिती' या कंपनीत वळवण्यात आल्याच्या नोंदी आहेत. याच पैशातून कंपनीच्यामार्फत पाटणकर यांनी ठाण्यातील 'निलांबरी' सोसायटीत 11 सदनिका विकत घेतल्याचा आरोप करत सीबीआयनं साडे सहा कोटींची ही मालमत्ता जप्त केली होती.

 

याप्रकरणी तपासाअंती आरोपींविरोधात कोणतेही पुरावे सापडत नसल्यानं हा तपास बंद करत असल्याचा अहवाल सीबीआयच्यावतीनं कोर्टात सादर करण्यात आला. मात्र या रिपोर्टला ईडीच्या माध्यमातून विरोध करण्यात आला. आमचाही तपास याच दिशेनं सुरूय त्यामुळे हा रिपोर्ट स्वीकारल्यास आमच्या तपासावरही त्याचा थेट परिणाम होईल असा दावा करण्यात आला. मात्र मुंबई सत्र न्यायालयातील विशेष सीबीआय कोर्टाचे न्यायाधीश ए. एस सय्यद यांनी हा दावा फेटाळून लावला. यापूर्वी सादर केलेल्या क्लोजर रिपोर्टमध्ये काही त्रुटी होत्या, त्यामुळे आम्ही तो अमान्य केला होता. मात्र आता आमच्या सर्व प्रश्नांची उत्तर तपासयंत्रणेनं दिली आहेत, त्यामुळे दोघांनी एकाच प्रकरणाचा तपास करण्याची आम्हाला आवश्यकता वाटत नाही असं निरिक्षण कोर्टानं नोंदवलं आहे.

 

मनी लॉड्रिंग प्रकरणी ईडीच्या रडारवर असणारे उद्धव ठाकरे यांचे मेहुणे श्रीधर पाटणकर यांच्यावरुन किरीट सोमय्यांनी आरोप केले होते. सोमय्यांनी म्हटलं होतं की, उद्धव ठाकरे यांचे मेहुणे श्रीधर पाटणकर यांची श्रीजी होम ही कंपनी आहे. यात मनी लॉड्रिंग करून पैसे आले आहेत. ही कंपनी पाटणकर यांची आहे. यात 29 कोटी काळा पैसा गुंतवला आहे. या कंपनीचा आणि उद्धव ठाकरे यांचा संबंध काय? हे उद्धव ठाकरे यांनी सांगितले पाहिजे, असं सोमय्या म्हणाले होते.