Pune Petrol Diesel gas shortage: घरगुती गॅस सिलेंडरचे दरही वाढले, हॉटेल व्यवसायिकांना सिलेंडर मिळेना; स्मशानभूमीतही विद्युतदाहिनी बंद

Pune Petrol Diesel gas shortage: इराण-इस्रायल युद्धामुळे आगामी काळात भारतात भीषण इंधन टंचाई निर्माण होण्याची शक्यता आहे. पेट्रोल पंपचालकांना तेल कंपन्यांचा मेसेज

Pune Petrol Diesel gas shortage

Source : ABP Live

Pune fuel shortage Iran War: पश्चिम आशियातील आखाती परिसरात इराण विरुद्ध इस्रायल-अमेरिका यांच्या सुरु असलेल्या युद्धाच्या झळा आता महाराष्ट्राला जाणवायला सुरुवात झाली आहे. महाराष्ट्रात अनेक ठिकाणी इंधनाचे आणि गॅसचे दर वाढायला सुरुवात झाली आहे. विशेषत: पुण्यात येत्या काही दिवसांमध्ये इंधन टंचाई (Fuel Shortage) निर्माण होण्याचे संकेत मिळत आहेत. कालपासून पुण्यात सीएनजी आणि एलपीजी गॅसचा तुटवडा निर्माण होण्यास सुरुवात झाली होती. त्यानंतर आता युद्धामुळे पुण्यात पेट्रोल आणि डिझेलचे दर (Diesel Price) वाढण्याची शक्यता आहे. 

इराण विरुद्ध अमेरिका युद्धामुळे पश्चिम आशियातून होणारी इंधनाची वाहतूक बंद झाली आहे. कतारमधून होणारा नैसर्गिक वायूचा पुरवठा बंद झाला आहे. त्यामुळे महाराष्ट्रात इंधन आणीबाणी लागू होण्याची चिन्हं दिसत आहेत. पुण्यात घरगुती गॅस सिलेंडरच्या वाढलेल्या दरांमुळे महिलांमध्ये तीव्र नाराजी व्यक्त होत आहे. सिलेंडरचे दर सातत्याने वाढत असल्याने त्याचा थेट परिणाम त्यांच्या दैनंदिन जीवनावर होत आहे. महिलांचे म्हणणे आहे की, गॅसचे दर वाढत आहेत, तेलाचे दर वाढत आहेत, किराणा आणि इतर जीवनावश्यक वस्तूंचे दरही वाढले आहेत. मात्र आमचे पगार काही वाढत नाहीत. गॅस एजन्सीकडे गेल्यानंतर अनेक वेळा वेळेवर गॅस मिळत नाही, अशी तक्रारही महिलांनी केली आहे. काही ठिकाणी गॅस उपलब्ध नसल्याचे सांगितले जाते, तर काही वेळा ब्लॅकमध्ये गॅस विकला जात असल्याचा आरोपही महिलांनी केला. मात्र ब्लॅकमध्ये गॅस घेणे सर्वसामान्य कुटुंबांना परवडणारे नाही.घरखर्च आधीच वाढला आहे. अशा परिस्थितीत गॅस सिलेंडरचे वाढते दर आम्ही कसे परवडवायचे? घर चालवायचे तरी कसे?, असा सवाल सामान्य गृहिणी विचारत आहेत.

Commercial Gas: व्यावसायिक गॅस सिलेंडरची किंमत वाढल्याने हॉटेल व्यावसायिकांवर संकट

अमेरिका, इराण आणि इस्रायलमधील  युद्धामुळे जागतिक पातळीवर परिणाम होत असून त्याचा फटका भारतालाही बसत आहे. सध्या देशात एलपीजी गॅसची तुटवड्याची परिस्थिती जाणवत आहे. याचा सर्वात मोठा परिणाम हॉटेल उद्योगावर झाला आहे.कमर्शियल एलपीजी गॅसचे दर अचानक 150 ते200 रुपयांनी वाढले आहेत. यामुळे हॉटेल व्यवसाय पुढे कसा चालवायचा, हा प्रश्न व्यवसायिकांसमोर उभा राहिला आहे. सध्या गॅस सप्लाय कधी सुरळीत होईल, याबाबतही कोणतीही स्पष्टता नाही. हॉटेल मालकांचा सरकारकडे असा आग्रह आहे की, त्यांनी त्वरित सहकार्य करून गॅस पुरवठ्यात सुधारणा करावी. कमर्शियल एलपीजी गॅस पूर्णपणे बंद असल्यामुळे हॉटेल्समध्ये स्वयंपाकासाठी गॅस उपलब्ध नाही. परिणामी कामकाजावर गंभीर अडथळा निर्माण झाला आहे आणि उद्योगाची दिनचर्या प्रभावित होत आहे.

Pune News: पुण्यात गॅस टंचाईचा फटका, वैकुंठातील गॅस दाहिन्या दोन दिवसांपासून बंद

युद्धजन्य परिस्थितीमुळे पुण्यात कमर्शियल एलपीजी गॅसचा तुटवडा निर्माण झाला आहे. त्याचा परिणाम आता पुण्यातील अंत्यसंस्कार व्यवस्थेवरही होताना दिसत आहे. पुण्यातील सदाशिव पेठ परिसरात असलेल्या वैकुंठ स्मशानभूमीत गॅसवर चालणाऱ्या दाहिन्या सध्या बंद ठेवाव्या लागल्या आहेत. येथे एकूण पाच गॅस दाहिन्या असून, गॅस पुरवठा बंद झाल्यामुळे मागील दोन दिवसांपासून त्या पूर्णपणे बंद करण्यात आल्या आहेत. गॅस उपलब्ध नसल्यामुळे सध्या अंत्यसंस्कार विद्युत दाहिनी किंवा पारंपरिक पद्धतीने लाकडांवरच करण्यात येत आहेत. 

आणखी वाचा