मुंबईकरांची प्रतिक्षा संपली, लॉकडाऊननंतर उद्या राणीबाग पुन्हा खुली होणार

कोरोना संसर्गामुळे बंद असलेली राणीबाग उद्यापासून खुली होणार आहे. शक्ती आणि करिश्मा वाघ राणीबागेतलं खास आकर्षण असणार आहे. पर्यटकांना राणीबागेत पर्यटन करण्यासाठी नियमांचे पालन करावे लागणार आहे.

मुंबई : मुंबईकरांची प्रतिक्षा संपली असून लॉकडाऊननंतर उद्या राणीबाग म्हणजेच वीरमाता जिजाबाई भोसले उद्यान आणि प्राणिसंग्रहालय पुन्हा खुलं होणार आहे. यावेळी शक्ती आणि करिश्मा वाघ राणीबागेतलं खास आकर्षण असणार आहेत. अस्वल, तरस, कोल्हे, बिबट्या यांचंही उद्यापासून राणीबागेत दर्शन मिळणार असल्याची माहिती प्रशासनाने दिली आहे. पण, यासाठी पर्यटकांना नियमावली पाळावी लागणार आहे.

औरंगाबाद येथील सिद्धार्थ गार्डन व प्राणिसंग्रहालयातून पट्टेरी वाघांच्‍या एका जोडीचे 12 फेब्रुवारी, 2020 रोजी बृहन्‍मुंबई महानगरपालिकेच्‍या वीरमाता जिजाबाई भोसले उद्यान आणि प्राणिसंग्रहालयात आगमन झाले आहे. दाखल झालेल्‍या या वाघांच्‍या जोडीमध्‍ये 6 वर्षे वय असलेल्‍या एका वाघि‍णीचा (मादी) समावेश असून तिचे नाव ‘करिश्मा’ असे आहे. तसेच या जोडीमध्‍ये असणाऱ्या वाघाचे (नर) नाव ‘शक्ती’ असे असून त्‍याचे वय 4 वर्षे आहे. या जोडीच्‍या बदल्यात वीरमाता जिजाबाई भोसले उद्यान आणि प्राणिसंग्रहालयातून दोन जोडी ‘चितळ’ आणि दोन जोड्या ‘चित्रबलाक’ (रंगीत करकोचा) सिद्धार्थ प्राणिसंग्रहालयाला देण्यात आले आहेत.

नियमावली

• कोविड-19 विषयक सर्व मार्गदर्शक सुचनांचे पालन करणे अनिवार्य करण्यात आलंय.
• विषाणूचा प्रादुर्भाव टाळण्यासाठी ज्येष्ठ नागरिक, गरोदर स्त्रिया, 5 वर्षांखालील मुले यांनी शक्यतो भेट देणे टाळावे अशी सूचना पालिकेनं केलीय.
• वीरमाता जिजाबाई भोसले उद्यान आणि प्राणिसंग्रहालयात प्रवेश करताना मास्कचा वापर अनिवार्य असेल.
• वाहनधारकांनी प्रवेशद्वाराजवळ वाहनांची चाके निर्जंतुकीकरण फवारणी करूनच प्राणिसंग्रहालयात प्रवेश करावा.
• कोरोना विषाणुचा प्रादुर्भाव/संसर्ग टाळण्यासाठी ज्येष्ठ नागरिक, गरोदर स्त्रिया आणि 5 वर्षांखालील लहान मुलांनी शक्‍यतो प्राणिसंग्रहालयास भेट देणे टाळावे अथवा विशेष काळजी घ्‍यावी.
• विषाणुचा प्रादुर्भाव टाळण्यासाठी, तिकीट खिडकीजवळ आखून दिलेल्या जागेवरच रांगेत उभे राहावे. गर्दी करू नये, दोन व्यक्तींमध्ये सुरक्षित अंतर ठेवावे.
• प्राणिसंग्रहालयात येताना सोबत कमीत कमी वस्तू/साहित्य आणावे. विषाणू संसर्ग टाळण्यासाठी वस्तू/साहित्य जमा करून ठेवण्याची सुविधा तात्पुरती बंद करण्यात आली आहे.
• प्रवेशद्वाराजवळ हात निर्जंतुकीकरण (सॅनिटायझर) करूनच उद्यानात प्रवेश करावा.
• प्राणिसंग्रहालयात प्रवेश केल्यावर गर्दीने/समूहाने फिरू नये.
• प्रदर्शनीय क्षेत्रात प्राणी पाहण्यासाठी गर्दी करू नये.
• कोरोना विषाणू प्रसार व प्रादुर्भाव टाळण्यासाठी प्रदर्शनीय क्षेत्रात काचेला अथवा बॅरिकेडला स्पर्श करू नये.
• प्राणिसंग्रहालयात केरकचरा इतरत्र टाकू नये. कचराकुंडीचा वापर करावा. कोठेही थुंकू नये.
• एकवेळ वापराचे (सिंगल यूज) मास्क व हातमोजे इतरत्र न फेकता जागोजागी ठेवण्यात आलेल्या विशिष्ट कचऱ्याच्या डब्यात टाकावे.