मुंबईत गोविंदाची मृत्यूशी झुंज अपयशी; 22 वर्षीय संदेश दळवीचा मृत्यू, आयोजकांवर गुन्हा दाखल; नेत्यांकडून मदतीचं आश्वासन

Mumbai Dahi Handi 2022 : मुंबईच्या विलेपार्ल्यात दहीहंडी खेळताना जखमी झालेला गोविंदा संदेश दळवीचा मृत्यू. आयोजकावर शनिवारीच गुन्हा दाखल, नेत्यांकडून मदतीचं आश्वासन.

Mumbai Dahi Handi 2022

Mumbai Dahi Handi 2022 : दोन दिवस मृत्यूशी झुंज देणाऱ्या गोविंदाचा (Govinda) अखेर मृत्यू झाला. संदेश दळवी (Sandesh Dalvi) असं या गोविंदाचं नाव आहे. मुंबईतील (Mumbai) नानावटी रुग्णालयात (Nanavati Hospital) संदेशनं अखेरचा श्वास घेतला. संदेश दळवी असं या गोविंदाचं नाव आहे. संदेश दळवी हा शिव शंभो गोविंदा पथकाचा (Shiv Shambho Govinda Pathak) गोविंदा होता. दहीहंडीला (Dahi Handi 2022) तो जखमी झाला होता. त्याला नानावटी रुग्णालयात उपचारासाठी दाखल करण्यात आलं होतं. मात्र आज त्याचा उपचारादरम्यान मृत्यू झाला असल्याची माहिती शिवसेनेचे उपविभाग प्रमुख जितेंद्र जानावळे यांनी दिलीये.

गेली दोन वर्ष कोरोना आणि लॉकडॉऊनमुळे अनेक सण-उत्सवांवर निर्बंध लादण्यात आले होते. अशातच यंदा मात्र सर्व सण-उत्सव धुमधडाक्यात आणि निर्बंधमुक्त साजरे करता येणार असल्याची घोषणा खुद्द मुख्यमंत्र्यांनीही केली. त्यानुसार, मोठ्या जल्लोषात दहीहंडीचं आयोजन करण्यात आलं होतं. अनेक नेत्यांनी दहीहंडी उत्सवाचं आयोजन केलं होतं. या उत्सवादरम्यान, अनेक गोविंदा जखमी झाले. अनेकांना प्राथमिक उपचारानंतर डिस्चार्ज देण्यात आला. तर काहींवर उपचार सुरु होते. त्यापैकीच एक अवघ्या 22 वर्षांचा गोविंदा संदेश दळवी. 

विलेपार्ले पूर्व बाबरवाडा विमानतळ येथे दहीहंडी फोडत असताना संदेश 7व्या थरावरुन खाली कोसळला. त्याला कोणतीही सरकारी मदत मिळाली नाही. मुंबईतील कूपर रुग्णालयात दोन दिवस तो दाखल होता. 7व्या थरावरुन खाली कोसळल्यामुळे त्याच्या मानेला आणि मेंदूला जबर दुखापत झाली होती. अखेर त्याची मृत्यूशी झुंज अपयशी ठरली. 

संदेश अवघ्या 22 वर्षांचा. घरामध्ये आई-वडील आणि आपल्या भावंडांसह तो राहत होता. संदेश सर्वात लहान. मुळचा पार्लेकर पण सध्या तो कुर्ल्यात राहत होता. घरात सर्वात लहान असल्यामुळे आई-वडिलांसह घरातील सर्वांचाच लाडका. संदेशच्या जाण्यानं दळवी कुटुंबीयांवर मोठी शोककळा पसरली आहे. 

दहिहंडीत डोक्याला मार लागून दोन गोविंदा गंभीर जखमी झाल्याप्रकरणी आयोजकांवर गुन्हा दाखल झाला होता. विलेपार्ले पोलीस ठाण्यात हा गुन्हा आयोजांवर शनिवारी दाखल करण्यात आला होता. विलेपार्ले पूर्व येथे वाल्मिकी चौक येथे रियाज शेख यानं दहिहंडीचं आयोजन केलं होतं. मात्र गोविंदा पथकांच्या सुरक्षेच्या दृष्टीनं कोणतीही काळजी न घेता, कोणतीही साधनसामग्री पुरवली नाही. यावेळी विनय शशिकांत रांबाडे (वय 20 वर्ष) संदेश प्रकाश दळवी, वय 24 वर्षे हे दोघेजण दहीहंडी फोडत असताना खाली पडून त्यांच्या डोक्याला गंभीर दुखापत झाली. 

पाहा व्हिडीओ : 22 वर्षीय संदेश दळवीचा मृत्यू, नानावटी रुग्णालयात गोविंदाने घेतला अखेरचा श्वास

10 लाख रुपयांची मदत देणार : गिरीश महाजन

मुंबईतील गोविंदाच्या मृत्यूबाबत बोलताना राज्याचे क्रीडामंत्री गिरीश महाजन (Girish Mahajan) म्हणाले की, दहीहंडी फोडताना सातव्या थरावरुन मुलगा खाली कोसळला होता. त्याच्या मानेला आणि मेंदूला गंभीर दुखापत झाली होती. रविवारी त्याला नानावटी रुग्णालयात दाखल करण्यात आलं. काल (सोमवारी) दुपारी त्याच निधन झाल्याची माहिती मिळत आहे. गोविंदाचं प्राण गमावणं ही दूर्दैवी घटना असल्याचंही यावेळी बोलताना ते म्हणाले. तसेच शासनानं जाहीर केल्याप्रमाणे त्याच्या कुटुंबियांना 10 लाख रुपये देणार असल्याचंही त्यांनी यावेळी सांगितलं. तसेच, त्याच्या घरची परिस्थिती पाहून आणखी काही मदत करता येईल का? याबाबत देखील विचार करु, असंही त्यांनी स्पष्ट केलं. आयोजकांनी नियमावलीचं पालन केलं की, नाही याची देखील चौकशी करू, असंही गिरीश महाजन यांनी स्पष्ट केलं आहे. 

गोविंदाच्या मृत्युचं कोणी राजकारण करू नये : प्रवीण दरेकर 

गोविंदाच्या मृत्यूचं कोणीही राजकारण करु नये. सरकार संवेदनशील आहे. गोविंदांना 10 लाखाचा विमा पहिल्यांदा देण्यात आला आहे. ही सर्व मदत सरकार देणार आहे. गोविंदाच्या मृत्यूचं भांडवल म्हणजे, मेलेल्याच्या टाळूवरील लोणी खाताय का?  ठाकरे साहेबांची शिवसेना हे चुकीचं करतेय, असं म्हणत प्रवीण दरेकर यांनी शिवसेनेवर निशाणा साधला आहे.