एक्स्प्लोर

BMC : मुंबई महापालिकेकडून 4,856 कोटींचा मालमत्ता कर जमा, यंदा 108 टक्के कर जमा

BMC Property Tax : बृहन्मुंबई महानगरपालिका प्रशासनाचे 4500 कोटी रुपये मालमत्ता कर संकलित करण्याचे उद्दिष्ट होते, पण त्याहून 356 कोटी रुपये अधिक म्हणजे 108 टक्के कर संकलन झालं आहे.

By : वेदांत नेब | Edited By: अभिजीत जाधव | Updated at : 26 May 2024 08:56 PM (IST)

BMC 4856 crore property tax collection from Mumbai Municipal Corporation 108 percent tax collection this year BMC : मुंबई महापालिकेकडून 4,856 कोटींचा मालमत्ता कर जमा, यंदा 108 टक्के कर जमा

BMC Property Tax Collection

Source : PTI

मुंबई : बृहन्मुंबई महानगरपालिका प्रशासनाकडून यंदा ४,८५६.३८ कोटी रुपये इतका मालमत्ता कर संकलित करण्यात आला आहे. सन २०२३-२४ या आर्थिक वर्षासाठी ४,५०० कोटी रुपये कर संकलनाचे उद्दिष्ट निश्चित करण्यात आले होते. त्याहून सुमारे ३५६.३८ कोटी रुपये अधिक म्हणजे १०८ टक्के कर संकलन करून कर निर्धारण आणि संकलन विभागाने उत्तम कामगिरी नोंदवली आहे. तसेच, या आर्थिक वर्षाचा मालमत्ता कर भरण्यासाठी दिनांक २५ मे २०२४ हा अंतिम दिवस होता. या अंतिम दिनांकापर्यंत करभरणा न करणाऱ्या मालमत्ता धारकाना आता दरमहा २ टक्के दंड आकारण्यात येणार आहे.

आर्थिक वर्ष २०२३-२४ चा मालमत्ता कर भरण्यासाठी दिनांक २५ मे २०२४ हा अंतिम दिवस होता. मालमत्ता धारकांनी दिलेल्या मुदतीत करभरणा करावा आणि दंडात्मक तसेच कायदेशीर कारवाई टाळता यावी, यासाठी महानगरपालिका प्रशासनाकडून प्रसारमाध्यमे, समाजमाध्यमे आदीद्वारे सातत्याने आवाहन करण्यात आले. करभरणा करण्यासाठी मालमत्ता धारकांची गैरसोय टाळण्यासाठी सर्व विभागातील नागरी सुविधा केंद्रे रविवारी, शनिवार आणि सार्वजनिक सुटीच्या दिवशीही सुरू ठेवण्यात आले होते. तसेच या कालावधीत मालमत्ता करासंबंधीत अडचणींच्या निराकरणासाठी सर्व विभागांमध्ये करनिर्धारण व संकलन खात्याचे अधिकारी, कर्मचारी उपस्थित होते.

या पार्श्वभूमीवर, करनिर्धारण व संकलन खात्याकडून यंदा ४,८५६.३८ कोटी रुपये इतका मालमत्ता कर संकलित करण्यात आला आहे. यामध्ये शहर विभागातील १ हजार ४२५ कोटी ०१ लाख ३१ हजार रुपये, पश्चिम उपनगरातील २ हजार ४५५ कोटी ९० लाख ५७ हजार रुपये आणि पूर्व उपनगरातील ९६८ कोटी १३ लाख ५८ हजार रुपये तसेच शासकीय, बंदर आणि रेल्वे यांच्या अखत्यारीतील मालमत्ताच्या १० कोटी ४८ लाख २१ हजार इतक्या कर रकमेचा समावेश आहे.

सन २०२३-२४ या आर्थिक वर्षासाठी निश्चित करण्यात आलेल्या ४,५०० कोटी रुपये मालमत्ता कराच्या उद्दिष्टापेक्षा अधिक (१०७.९५ टक्के) कर संकलित करण्यात आला आहे. दिनांक २५ मे २०२४ रोजी १७०.५९ कोटी तर, दिनांक २६ मे २०२४ रोजी १.५२ कोटी रुपये इतका मालमत्ता कर संकलित करण्यात आला.