शाळांपाठोपाठ आता राज्यातली महाविद्यालयेही सुरु होण्याची शक्यता, उच्च व तंत्र शिक्षण विभागाचा मुख्यमंत्र्यांना प्रस्ताव

College Reopen : सोमवारपासून शाळा सुरु होतायत मात्र 18 वर्षांवरील सर्वांचं लसीकरण सुरु असतानाही महाविद्यालयं सुरु करण्याबाबत अद्याप निर्णय घेण्यात आलेला नाही.

College Reopen

मुंबई :  महाविद्यालयं ऑफलाईन सुरु करण्यासंदर्भात उच्च व तंत्र विभागाकडून मुख्यमंत्र्यांना प्रस्ताव पाठवण्यात आला आहे. उदय सामंत यांनी ट्विट करुन ही माहिती दिली आहे. मुख्यमंत्री उद्धव ठाकरेंनी मान्यता दिल्यानंतरच महाविद्यालये सुरु करण्याचा निर्णय घेण्यात येणार आहे

सोमवारपासून शाळा सुरु होतायत. मात्र 18 वर्षांवरील सर्वांचं लसीकरण सुरु असतानाही महाविद्यालयं सुरु करण्याबाबत अद्याप निर्णय घेण्यात आलेला नाही. शाळा सुरु होत असताना महाविद्यालयं कधी सुरु होणार असा प्रश्न उपस्थित होतोय. महाविद्यालयांबाबतचा अंतिम निर्णय मुख्यमंत्री उद्धव ठाकरे घेणार असल्याची माहिती उच्च आणि शिक्षणमंत्री उदय सामंत यांनी दिलीय. दरम्यान 15 फेबुवारीपर्यंत होणाऱ्या सर्व परीक्षा ऑनलाईन घेण्यावर उच्च आणि तंत्रशिक्षण विभाग ठाम असल्याचं सामंत यांनी सांगितलंय. 

 

महाविद्यालय ऑफलाईन सुरू करण्यासंदर्भात उच्च व तंत्र विभागाकडून मुख्यमंत्री उद्धवसाहेब ठाकरे यांच्याकडे प्रस्ताव पाठवण्यात आला आहे.या प्रस्तावाला मुख्यमंत्र्यांनी मान्यता दिल्यानंतर महाविद्यालय ऑफलाईन सुरू करण्याचा निर्णय घेण्यात येणार आहे.

— Uday Samant (@samant_uday) January 21, 2022

कोरोना काळात दोन वर्षे विद्यार्थ्यांचे शैक्षणिक नुकसान झाले असताना तिसऱ्या लाटेत पुन्हा महाविकास आघाडी सरकारने शाळांवर गंडांतर आणत शाळा महाविद्यालये बंद केली आहेत. राज्यात व देशात 15 वर्ष ते 18 वर्ष वयोगटातील शाळा महाविद्यालयातील विद्यार्थ्यांचे लसीकरण सुरू केले असताना कोरोना प्रादुर्भावाची लक्षणे कमी असल्याने इतर आस्थापन, बार मॉल हे सर्व सुरू आहे. परंतु, शाळा महाविद्यालये बंद ठेवणे म्हणजे विद्यार्थ्यांचे भविष्य अंधारात लोटणे  सारखे असून शासनाने तत्काळ शाळा महाविद्यालये 26 जानेवारी पर्यंत सुरू करावीत, अन्यथा भाजप कार्यकर्ते शिक्षक विद्यार्थी यांच्यासह रस्त्यावर उतरून आंदोलन करतील असा इशारा संतोष शेट्टी यांनी  दिला आहे. 

राज्यातील शाळा सोमवारपासून सुरू

राज्यातील पहिली ते बारावीच्या शाळांबरोबरच, पूर्व प्राथमिक अर्थात शिशु वर्गही येत्या सोमवारपासून सुरू होणार आहे. ओमायक्रॉनच्या प्रादुर्भावामुळं बंद करण्यात आलेल्या शाळा पुन्हा सुरू करण्यास मुख्यमंत्री उद्धव ठाकरेंनी परवानगी दिल्याची माहिती शालेय शिक्षणमंत्री वर्षा गायकवाड यांनी दिलीय. शाळा सुरु करण्यासाठी एबीपी माझाच्या मोहिमेला मिळालेलं हे मोठं यश आहे. दरम्यान शाळा सुरु करण्यासंदर्भातले सर्व अधिकार हे स्थानिक प्रशासनाला देण्यात आले आहेत. तसंच पालकांच्या संमतीनंतर विद्यार्थ्यांना शाळेत प्रवेश मिळणार आहे. 

संबंधित बातम्या :

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha