एक्स्प्लोर

बनावट कागदपत्रांनी मिळवली नोकरी, 32 वर्ष शासनाला गंडवलं, सोलापुरातील शिक्षकाचा प्रताप

या शिक्षकाने 1988 साली खोटे बनावट प्रमाणपत्र सादर करुन दक्षिण सोलापूर तालुक्यातील आहेरवाडी येथील शाळेत सहशिक्षक पदाची नोकरी मिळवली.त्यानंतर तब्बल 32 वर्षांनतर हा धक्कादायक प्रकार उघडकीस आला आहे.

Written By : आफताब शेख, एबीपी माझा | Updated at : 26 Jun 2020 08:09 AM (IST)

Fake documents got a job, complaint against teacher in Solapur बनावट कागदपत्रांनी मिळवली नोकरी, 32 वर्ष शासनाला गंडवलं, सोलापुरातील शिक्षकाचा प्रताप

सोलापूर : बनावट कागदपत्रे सादर करुन नोकरी मिळवून एका शिक्षकाने शासनाला चांगलंच गंडवलंय. आणि तब्बल 32 वर्षांनंतर हा प्रकार उघडकीस आलाय. आता या आरोपी शिक्षकाचे निलंबन करण्यात आलं असून त्याच्या विरोधात फौजदारी गुन्हा देखील दाखल करण्यात आला आहे. महाराष्ट्र राज्य परीक्षा परिषद, पुणे यांनी केलेल्या चौकशीनंतर हा धक्कादायक प्रकार उघडकीस आला आहे. आमसिद्ध भिकप्पा बिराजदार असे या आरोपी शिक्षकाचे नाव आहे. सोलापूर जिल्ह्यातील आहेरवाडी येथील जिल्हा परिषदेच्या शाळेत ते सहशिक्षक म्हणून कार्यरत होते. आरोपी आमसिद्ध बिराजदार यांनी मुंबईतील श्रीमती एस. के. सोमय्या ज्युनिअर कॉलेज ऑफ एज्युकेशन या महाविद्यालयातून डी.एड. चे शिक्षण घेतले असल्याचे गुणपत्रक आणि प्रमाणपत्र सादर केले. या प्रमाणपत्रावर वर्ष 1984 आणि प्राचार्य म्हणून पाटील यांची स्वाक्षरी आहे. मात्र तपास केले असता 1982 ते 1989 या कालावधीमध्ये पाटील नावाचे कोणीही प्राचार्य नव्हते. या कालावधीत श्रीमती कांताबेन आषार या प्राचार्य असल्याचे स्पष्ट झाले आहे. विशेष म्हणजे ज्या महाविद्यालयातून उत्तीर्ण झाल्याचा दाखला आरोपी शिक्षक आमसिद्ध बिराजदार यांनी दिला आहे ते महाविद्यालय महिला महाविद्यालय असल्याचे देखील चौकशीत स्पष्ट झाले आहे. आरोपी आमसिद्ध बिराजदार यांनी 1988 साली हे खोटे बनावट प्रमाणपत्र सादर करुन दक्षिण सोलापूर तालुक्यातील आहेरवाडी येथील शाळेत सहशिक्षक पदाची नोकरी मिळवली. त्यानंतर तब्बल 32 वर्षांनतर हा धक्कादायक प्रकार उघडकीस आला आहे. त्यामुळे बोगस बनावट तयार करुन ते शासनास सादर करत शासकीय आणि आर्थिक लाभ मिळवल्याप्रकरणी त्यांच्याविरोधात गुन्हा दाखल करण्यात आला आहे. आरोपी शिक्षक आमसिद्ध बिराजदार यांच्या विरोधात तक्रारी अर्ज प्राप्त झाला होता. नोकरी मिळवते वेळी त्यांनी खोटे प्रमाणपत्र सादर केल्याचे या तक्रारीत सांगण्यात आले होते. यावर पुरावा सादर करण्याची संधी देखील आमसिद्ध बिराजदार यांना देण्यात आली होती. त्यानंतर या प्रकरणात आयुक्त महाराष्ट्र राज्य परीक्षा परिषद पुणे यांनी चौकशी केली. त्यात ते दोषी आढळले असून जिल्हा परिषदेचे मुख्य कार्यकारी अधिकाऱ्यांच्या आदेशानुसार मला आमसिद्ध बिराजदार यांच्या विरोधात तक्रार देण्यास प्राधिकृत करण्यात आले असल्याचे फिर्यादी दक्षिण सोलापूर तालुक्याचे प्रभारी गटशिक्षणाधिकारी मल्हारी बनसोडे यांनी आपल्या फिर्यादीत म्हटले आहे.

About the author आफताब शेख, एबीपी माझा

आफताब शेख हे एबीपी माझा वृत्त वाहिनीत सिनिअर करस्पॉन्डट म्हणून कार्यरत आहेत. मागील 9 वर्षांपासून एबीपी माझाच्या माध्यमातून कार्यरत असून आपल्या संवेदनशील आणि निष्पक्ष पत्रकारितेने त्यांनी स्वतंत्र ओळख निर्माण केली आहे. 3 जुलै 2017 रोजी मुंबई येथील एबीपी माझाच्या मुख्य कार्यालयातून त्यांनी पत्रकारितेच्या प्रवासाला सुरुवात केली. फेब्रुवारी 2019 पासून ते सोलापूर येथे सिनिअर करस्पॉन्डन्ट म्हणून कार्यरत आहेत. सध्या ते सोलापूर श्रमिक पत्रकार संघाचे सरचिटणीस म्हणूनही जबाबदारी सांभाळत आहेत.

सोलापूरच्या राजकीय घडामोडींपासून सामाजिक, शैक्षणिक, प्रशासकीय, औद्योगिक, मनोरंजन, क्रीडा आणि व्यावसायिक क्षेत्रांतील महत्त्वाच्या विषयांना त्यांनी एबीपी माझाच्या माध्यमातून राज्यस्तरीय व्यासपीठ मिळवून दिले आहे. ‘कामगारांचे शहर‘ म्हणून ओळखल्या जाणाऱ्या सोलापूरमधील कामगारांचे प्रश्न, सर्वसामान्य नागरिकांच्या समस्या आणि उपेक्षित घटकांचा आवाज शासनदरबारी पोहोचवण्याचा त्यांचा सातत्यपूर्ण प्रयत्न राहिला आहे. बहुभाषिक आणि समृद्ध सांस्कृतिक वारसा लाभलेल्या सोलापूरचा इतिहास, परंपरा आणि वर्तमानही त्यांनी आपल्या वार्तांकनातून प्रभावीपणे मांडले आहे. कोरोना काळात कोविड वॉर्डमध्ये प्रत्यक्ष जाऊन रुग्णांच्या व्यथा आणि आरोग्य व्यवस्थेतील वास्तव समोर आणला तर महापूर-दुष्काळातील रिपोर्ट्समधून त्यांनी आपल्या संवेदनशील पत्रकारितेचा प्रत्यय दिला. सोलापूरसह मुंबई, पुणे, धाराशिव, लातूर, बीड, नांदेड आणि छत्रपती संभाजीनगर जिल्ह्यांतही त्यांनी वार्तांकन केले आहे.

त्यांनी सोलापूरच्या दयानंद कला व शास्त्र महाविद्यालयातून कला शाखेची पदवी, तर मुंबई विद्यापीठातून मास्टर ऑफ मास कम्युनिकेशन अँड जर्नलिझम ही पदव्युत्तर पदवी प्राप्त केली आहे. पत्रकारितेसोबतच सामाजिक कार्याचीही त्यांना विशेष आवड आहे. महाविद्यालयीन जीवनातील सामाजिक योगदानासाठी 2016 मध्ये तत्कालीन राष्ट्रपती प्रणव मुखर्जी यांच्या हस्ते त्यांना इंदिरा गांधी राष्ट्रीय सेवा योजना पुरस्काराने (Indira Gandhi NSS Award-2016) सन्मानित करण्यात आले. याशिवाय, पत्रकारितेतील योगदानासाठी त्यांना विविध संस्था आणि संघटनांकडून अनेक पुरस्कारांनी गौरविण्यात आले आहे.

Published at : 26 Jun 2020 08:09 AM (IST)

Tags :

Solapur Police Teacher Solapur