मुंबई : म्हाडाला उपरती, यंदाच्या सोडतीत स्वस्त घरांची संख्या जास्त

यंदा म्हाडाच्या घरांची संख्या जास्त असणार आहे. मागील वर्षी घरांची संख्या कमी आणि अत्यल्प उत्पन्न घटकांसाठी एकही घर नसल्याने म्हाडावर टीका झाली होती. त्यामुळे यंदा घरांची संख्या वाढवण्याचे प्रयत्न सुरु आहेत. महाराष्ट्र टाइम्स या वृत्तपत्राने याबाबतचं वृत्त प्रकाशित केलं आहे.

मुंबईत अत्यल्प उत्पन्न गटासाठी 400, मध्यम उत्पन्न गटासाठी 200 घरं उपलब्ध होण्याची शक्यता वर्तवली जात आहे. अत्यल्प उत्पन्न गटासाठी मानखुर्दमध्ये 100 तर, अॅन्टॉप हिलमध्ये 300 घरे राखून ठेवण्याची म्हाडाची तयारी आहे.

मुंबईत घरांच्या किंमती पाहता सर्वसामान्यांना 'म्हाडा'च्या घरांचा मोठा आधार आहे. पण, अनेक कारणांमुळे 'म्हाडा'च्या घरांची संख्या कमी होत आहे. मागील वर्षाच्या लॉटरीत 819 घरांचा समावेश होता. या वर्षी लॉटरीत घरांची संख्या वाढवण्यासंदर्भात 'म्हाडा'मध्ये बैठका सुरु आहेत. यंदाच्या लॉटरीत साडेनऊशे ते एक हजार घरे उपलब्ध होण्याची शक्यता आहे.