Nanded Crime News: विवाहित लेकीसह प्रियकराला संपवलं, विहिरीत फेकलं अन् पोलिस ठाण्यात जाऊन सगळंच सांगितलं, नांदेडमध्ये नेमकं काय घडलं?

Nanded Crime News: घटनेनंतर वडिलांनी पोलिस स्टेशनमध्ये जाऊन घटनेची माहिती दिली आहे, मुलीचा मृतदेह आधी हाती लागला, तर मुलाचा मृतदेह सोमवारी रात्री 12 वाजण्याच्या सुमारास विहिरीतून बाहेर काढला.

Nanded Crime News

नांदेड जिल्ह्यातील उमरी तालुक्यातील गोळेगाव येथे विवाहित मुलगी आणि तिच्या प्रियकराची निर्घृण हत्या करून मृतदेह विहिरीत टाकल्याची धक्कादायक घटना उघड झाली आहे.

सोमवारी सायंकाळी ही घटना समोर आली असून परिसरात मोठी खळबळ उडाली आहे.

मिळालेल्या माहितीनुसार, मृतांमध्ये संजीवनी कमळे (19, रा. गोळेगाव) आणि लखन भंडारे (19, रा. बोरजुनी) यांचा समावेश आहे. हे दोघे गेल्या काही वर्षांपासून प्रेमसंबंधात होते.

दरम्यान, संजीवनीचा विवाह वर्षभरापूर्वी गोळेगावातील एका तरुणाशी झाला होता. विवाहानंतरही तिचे प्रियकरासोबत गुप्तपणे संपर्क सुरू असल्याने घरच्यांकडून या संबंधांना तीव्र विरोध होता.

सोमवारी दुपारी संजीवनीच्या सासरच्या मंडळी बाहेर गेल्याने तिने प्रियकराला घरी बोलावले. मात्र अचानक परतलेल्या पती आणि कुटुंबीयांनी दोघांना अवैध अवस्थेत पाहिल्याने संताप व्यक्त केला. त्यानंतर वडील आणि नातेवाईकांना बोलावण्यात आले.

यानंतर मुलीचे वडील, काका आणि आजोबा यांनी संजीवनी आणि प्रियकराला ताब्यात घेतले. करकाळा शिवारात दोघांवर मारहाण करून त्यांचा खून करण्यात आला.

मृतदेह चाळीस फूट खोल विहिरीत फेकण्यात आले. प्रथम मुलीचा मृतदेह हाती लागला, तर प्रियकराचा मृतदेह रात्री उशिरा बाहेर काढण्यात आला.

घटनेनंतर आरोपी वडील मारोती सुरणे हे स्वतः उमरी पोलीस ठाण्यात हजर झाले आणि खून केल्याची कबुली दिली. पोलिसांनी मुलीचे वडील, काका, पती, सासू-सासरे यांना ताब्यात घेतले असून पुढील तपास सुरू आहे.