GBS Outbreak: गुलेन बॅरी सिंड्रोमला घाबरु नका, वेळीच उपचार झाल्यास आजार 100 टक्के बरा होतो; लक्षणं कशी ओळखायची?

Guillain Barre Syndrome Cases: केंद्र सरकारने सोमवारी सात जणांच्या तज्ज्ञांचे पथक राज्यात तैनात केले आहे. हे पथक वाढत्या रुग्णसंख्येचे निरीक्षण आणि व्यवस्थापन करण्यासाठी राज्य सरकारला मदत करणार आहे.

GBS Outbreak Pune

Source : ANI

पुणे: पुण्यासह आणखी दोन शहरांमध्ये गुलेन बॅरी सिंड्रोम (Guillain Barre Syndrome) आजारांचे रूग आढळून आले आहेत. गुलेन बॅरी सिंड्रोम (Guillain Barre Syndrome) च्या रूग्ण संख्येत मोठ्या प्रमाणावर वाढ होत असल्याचं चित्र आहे. पुण्यातील एकूण जीबीएस रुग्णांची संख्या रविवारी 111 वर पोहोचली असून, त्यात 68 पुरुष आणि 33 महिलांचा समावेश आहे. यापैकी 17 रुग्णांवर व्हेंटिलेटरवरती उपचार सुरू आहेत.  गुलेन बॅरी सिंड्रोम (Guillain Barre Syndrome)च्या वाढत्या रूग्णसंख्येच्या पार्श्वभूमीवर केंद्र सरकारने सोमवारी सात जणांच्या तज्ज्ञांचे पथक राज्यात तैनात केले आहे. हे पथक वाढत्या रुग्णसंख्येचे निरीक्षण आणि व्यवस्थापन करण्यासाठी राज्य सरकारला मदत करणार आहे.

गुलेन बॅरी सिंड्रोम (Guillain Barre Syndrome) हा ऑटोइम्युन आजार असून तो प्रामुख्याने व्हायरल इन्फेक्शननंतर काही आठवड्यांत होतो. मात्र, अलीकडील काळात जीबीएस रुग्णांवर यशस्वी उपचारांमुळे त्यांच्यात समाधानकारक सुधारणा होताना दिसत आहे. सर्व वयोगटांतील रुग्ण या आजारातून बरे देखील होत आहे. या आजारावरील रूग्णांवरती प्रगत वैद्यकीय तंत्रज्ञान, वेळेवर मिळणारे योग्य उपचार आणि तज्ज्ञ डॉक्टरांच्या मार्गदर्शनामुळे रुग्णांना व्हेंटिलेटरची आवश्यकता कमी झाल्याचे दिसून येत आहे. 

सुरवातीपासून व्यवस्थित काळजी घेतल्यास आणि उपचार केल्यास गिळण्यास त्रास होणे किंवा हात-पायांवर कमजोरी येणे या लक्षणांवर तातडीने उपचार केल्यास अनेक रुग्ण पूर्णत: बरे झाले आहेत. सर्वसामान्य नागरिकांनी व्हायरल इन्फेक्शननंतर येणाऱ्या लक्षणांकडे वेळीच लक्ष दिल्यास, जीबीएसवर सहज मात करता येते हे या उपचारांमधून स्पष्ट झाले आहे, त्याचबरोबर याबाबत लवकरात लवकर उपचार घेणे आवश्यक आहे.

याबाबत डॉक्टरांनी दिलेल्या माहितीनुसार, गेल्या दोन महिन्यांत जीबीएस रुग्णांच्या प्रकरणांमध्ये लक्षणीय वाढ झाली आहे. आमच्या रुग्णालयात विविध वयोगटांतील 12 हून अधिक रुग्ण दाखल झालेले आहेत. विशेषतः तरुण रुग्ण, ज्यांना आजाराच्या सुरुवातीस मिळणे कठीण होणे, दुहेरी दिसणे किंवा हातावर परिणाम झालेला आहे. काही रुग्ण गंभीर असते तरीही वेळीच लक्ष देऊन उपचार सुरू केल्यास आजार बरा होऊ शकतो, अशी माहिती त्यांनी दिली आहे.

काय काळजी घ्यावी

पाणी उकळून व गाळून प्यावे.
उघड्यावरील व शिळे अन्न खाणे टाळावे.
अचानकपणे हातापायाच्या स्नायूंमध्ये अशक्तपणा जाणवल्यास डॉक्टरांचा सल्ला घ्यावा किंवा जवळील शासकीय रुग्णालयात जावे.

कॅम्पिलोबॅक्टरमुळे जीबीएस कसा होतो?

दूषित पाणी किंवा अन्न खाल्यावर कॅम्पिलोबॅक्टर जेजुनीचा संसर्ग होऊ शकतो.
संसर्गामुळे अतिसार आणि ओटीपोटात वेदना होऊ शकतात.
काही व्यक्तींमध्ये प्रतिकारशक्ती मज्जातंतूंना लक्ष्य करते. ज्यामुळे १ ते ३ आठवड्यांच्या आत जीबीएसचे निदान होते.
याशिवाय, डेंग्यू, चिकनगुनियाचे विषाणू किंवा इतर बॅक्टेरियाच्या संक्रमणामुळे मज्जातंतूंविरुद्ध रोगप्रतिकारक शक्ती हल्ला करते.

कॅम्पिलोबॅक्टर संसर्गाची लक्षणे

अतिसार
पोटदुखी
ताप
मळमळ किंवा उलट्या