राज अन् उद्धव ठाकरेंच्या बैठकीतील 5 प्रमुख मुद्दे; शिवतीर्थवरील 'राज'कीय भेटीची इनसाईड स्टोरी

खासदार संजय राऊत यांनी ठाकरे बंधूंची ही भेट कौटुंबीक असून कुठलीही राजकीय चर्चा झाली नसल्याचे म्हटले. "उद्धव ठाकरे आज राज ठाकरे यांच्या निवासस्थानी आले होते.

Raj thackeray and uddhav Thackeray inside story

Source : Abp

मुंबई : दहीहंडी झाली, गणेशोत्सवही उत्साहात संपन्न झाला आता पितृपंधरवडा आणि नंतर दसरा. शिवसेना (Shivsena) ठाकरे गटाकडून दसरा मेळाव्याची तयारी सुरू झाली असतानाच आज पुन्हा एकदा मनसे अध्यक्ष राज ठाकरे आणि शिवसेना पक्षप्रमुख उद्धव ठाकरे (Uddhav Thackeray) यांची भेट झाली. विशेष म्हणजे दोन्ही नेत्यांची आजची भेट दीर्घकाळ म्हणजेच 2 ते 3 तास चालली. त्यामुळे, या भेटीत नेमकी काय चर्चा झाली याची उत्सुकता अवघ्या महाराष्ट्राला लागली आहे. उद्धव ठाकरे यांच्यासमवेत खासदार संजय राऊत आणि अनिल परब हेही बैठकीला होता. तर, मनसेचेही (MNS) पदाधिकारी उपस्थित होते. त्यामुळे, निश्चितच आगामी निवडणुकीतील युतीसंदर्भात ठाकरे बंधूंमध्ये चर्चा झाल्याची माहिती आहे.

खासदार संजय राऊत यांनी ठाकरे बंधूंची ही भेट कौटुंबीक असून कुठलीही राजकीय चर्चा झाली नसल्याचे म्हटले. "उद्धव ठाकरे आज राज ठाकरे यांच्या निवासस्थानी आले होते. त्यामागे कोणताही राजकीय कार्यक्रम नव्हता. गणपतीच्या वेळी उद्धव ठाकरे हे राज ठाकरेंच्या घरी गेले होते. त्यावेळी असलेल्या गर्दीमुळे राज ठाकरेंच्या आईंना, कुंदा मावशींना उद्धव ठाकरेंसोबत जास्त बोलता आलं नाही. त्यामुळे नंतर पुन्हा घरी ये असं त्यांनी सांगितलं होतं. त्यानुसार उद्धव ठाकरे राज ठाकरे यांच्या घरी कुंदा मावशींना भेटायला गेले होते.", असे संजय राऊत यांनी म्हटले. मात्र, इतरही राजकीय नेते सोबत असल्याने आणि एवढा वेळ दोन्ही नेत्यांमध्ये चर्चा झाल्याने निश्चितच राजकीय चर्चा झाली नाही असा तर्क लावणे चुकीचे ठरेल. त्यानुसार, या 'राज'कीय भेटीची इनसाईड स्टोरी सूत्रांकडून समोर आली आहे.

राज अन् उद्धव ठाकरेंच्या बैठकीतील 5 प्रमुख मुद्दे

1. उद्धव ठाकरे आणि राज ठाकरे यांच्यात मेळावा, वाढदिवस आणि गणेशोत्सवाच्या नंतर झालेल्या आजच्या भेटीत महापालिका निवडणुकांच्या अनुषंगाने प्राथमिक चर्चा झाल्याची माहिती

2. शिवसेना मनसे युती आगामी महापालिका निवडणुकांसाठी करण्याचा निर्णय घ्यायचा असेल तर पुढे जाण्यासंदर्भातील रणनीतीवर राज ठाकरे आणि उद्धव ठाकरे यांच्यात प्राथमिक चर्चा झाली असल्याची सूत्रांची माहिती आहे.

3. पक्षाचे मुद्दे आणि आगामी स्थानिक स्वराज्य संस्थांच्या निवडणुकीत मुंबईसह इतर महापालिका निवडणुकांच्या अनुषंगाने दोन नेत्यांमध्ये चर्चा झाली. तसेच, युतीची चर्चा पुढे नेण्यासाठी दोन्ही पक्ष सकारात्मक असून जागा वाटपाची चर्चा करण्यासाठी काही दोन्ही पक्षाच्या नेत्यांना जबाबदारी देण्यासंदर्भात सुद्धा लवकरच निर्णय होणार असल्याची सूत्रांची माहिती आहे.

4. युतीच्या घोषणेसंदर्भात कुठलाही मुहूर्त ठरलेला नाही, शिवाय या भेटीगाटींच्या फेऱ्या राज ठाकरे-उद्धव ठाकरे आणि मनसे-शिवसेनेच्या होत राहतील अशीही माहिती आहे

5. राज ठाकरे उद्धव ठाकरे आणि या दोन भावांसोबत आज झालेल्या बैठकीमध्ये संजय राऊतही सोबत होते. या प्राथमिक चर्चेनंतर युती संदर्भातील पुढची रणनीती सुद्धा उद्धव ठाकरे आणि राज ठाकरे हेच ठरवतील.

हेही वाचा