Nagpur Hit & Run case: नागपूर हिट अँड रन प्रकरणात लेकरु अडचणीत, चंद्रशेखर बावनकुळे म्हणाले, मी अमित शाहांनाही काहीच बोललो नाही

Nagpur crime: नागपूर हिट अँड रन प्रकरणात आरोपी असलेल्या दोघांचे ब्लड रिपोर्ट समोर आले आहेत. यामध्ये संकेत बावनकुळे यांच्या मित्रांनी फारसे मद्यप्राशन केले नसल्याची बाब समोर आली आहे. त्यामुळे दोघेही सुटण्याची शक्यता आहे.

Chandrashekhar Bawankule on Nagpur hit & run case

Source : ABPLIVE AI

अकोला: नागपूर हिट अँड रन प्रकरणात भाजप प्रदेशाध्यक्ष चंद्रेशखर बावनकुळे यांचा मुलगा संकेत बावनकुळे याचा सहभाग असल्याने याप्रकरणाची (Nagpur Hit and Run case) सध्या चांगलीच चर्चा रंगली आहे. नागपूर पोलिसांनी याप्रकरणाचा तपास आणि इतर कारवाई करताना केलेली दिरंगाई टीकेचा विषय ठरत आहे. संकेत बावनकुळे (Sanket Bawankule) यांना वाचवण्यासाठी पोलिसांकडून प्रयत्न होत असल्याचा आरोपही विरोधक करत आहेत. हे सर्व आरोप चंद्रशेखर बावनकुळे (Chandrashekar Bawankule) यांनी फेटाळून लावले आहेत. मी माझ्या मुलासाठी पोलिसांवर कोणताही दबाव आणत नसल्याचा दावा त्यांनी केला. ते शुक्रवारी अकोल्यात प्रसारमाध्यमांशी बोलत होते. 

यावेळी चंद्रशेखर बावनकुळे यांनी नागपूर हिट अँड रन प्रकरणात सत्ताधारी भाजप पोलिसांवर दबाव आणत असल्याच्या आरोपांचे खंडन केले. त्यांनी म्हटले की, पोलीस चौकशीवर दबाव येणार नाही. मी कधीही पोलिसांना फोन केला नाही, फक्त एकदा माहिती घेतली. काही दिवसांपूर्वी केंद्रीय गृहमंत्री अमित शाह महाराष्ट्रात आले होते. मी त्यांना सुद्धा या प्रकरणाविषयी काहीही बोललो नाही. 

पोलिसांनी कोणाचाही मुलगा असो माझा असो सामान्य घरातील, त्याच्यावर कायद्यानुसार कारवाई करावी. फक्त आता एकच प्रश्न उरतो तो म्हणजे गाडी चालवणारा आणि गाडीत बसणाऱ्यांवर कोणते गुन्हे दाखल होणार? पोलीस सध्या त्यादृष्टीने तपास करत असल्याचे चंद्रशेकर बावनकुळे यांनी म्हटले.

लोकसभेला मोदींवर जास्त विसंबून राहिल्याने भाजपला फटका: बावनकुळे 

महायुतीतील 75 टक्के जागावाटपावर मतैक्य झाल्याचा दावा भाजपा प्रदेशाध्यक्ष चंद्रशेखर बावनकुळेंनी केलाय. बावनकुळे कालपासून अकोला, वाशिम आणि बुलडाणा या तीन जिल्ह्यांचा तीन दिवस विधानसभानिहाय आढावा घेत आहेत. या जागांवर महायुतीतील तिन्ही पक्षांचं एकमत असल्याचं ते म्हणाले. ज्याचा उमेदवार चांगला त्याला जागा,असे सूत्र आहे. कोणताच पक्ष कोणत्या जागेसाठी आग्रह धरणार नसल्याचं ते म्हणाले. 

दरम्यान, भाजपचा गड असलेल्या विदर्भात आमच्याच अतिआत्मविश्वासाने लोकसभेत पराभूत झाल्याचं ते म्हणाले. आम्ही मोदी आहेत याच गोष्टींवर विसंबून राहत जास्त प्रयत्न न केल्याचे बावनकुळे यांनी मान्य केले.

नितेश राणेंच्या वक्तव्याचा विपर्यास केला, बावनकुळेंचा दावा

नितेश राणे यांचे म्हणण्याप्रमाणे या देशातील अनेक भागात मुस्लिम परिवार एकत्र राहतात. बांगलादेशातील घटनेचा आधार घेऊन काही युवा पिढी अमितभाई, मोदीजी, फडणवीसांना कापून टाकू असे व्हिडीओ व्हायरल करत आहे. त्याआधारावर नितेश राणे बोलले आहे, त्यावर आपण विचार केला. हे आपल्याला मान्य नाही. नितेश राणे यांचे वक्तव्य सरळ आहे. हिंदू विरोधी आणि देश विरोधी वागणाऱ्या लोकांच्या आम्ही विरोधातच आहोत.नितेश राणे यांच्या वक्तव्याचा विपर्यास करण्यात आला. देशविरोधी मुस्लिमांकडून काही खरेदी करू नका, असं ते म्हणाल्याचं बावनकुळे यांनी स्पष्ट केले.

मराठा आरक्षणावर बावनकुळे काय म्हणाले?

मराठा समजाला आरक्षण दिले गेले पाहिजे. ज्या ठिकाणी समाज मजबूत नाही तिथे अगोदर दिले पाहिजे. मराठ्यांना आरक्षण देताना ओबीसी आरक्षणाला धक्का लागला नाही पाहिजे. मुख्यमंत्री एकनाथ शिंदे यांनी जबाबदारी घेतली आहे. जरांगे आणि मुख्यमंत्री हे एकत्र बसून चर्चा करणार असल्याचे चंद्रशेखर बावनकुळे यांनी सांगितले. 

भाजपच्या अंतर्गत सर्वेक्षणावर चंद्रशेखर बावनकुळेंचं भाष्य

विदर्भातील जनेतेला दोष देण्यापेक्षा आपण कुठे चुकलो हे पाहावे लागेल. आम्हाला वाटलं मोदीजी आहेत, त्याच हवेने निवडून येऊ, इथेच आम्ही चुकलो, अशी कबुली बावनकुळे यांनी दिली. यावेळी बावनकुळेंनी भाजपच्या अंतर्गत सर्वेक्षणाच्या निकालावरही भाष्य केले. हा जनतेचा सर्व्हे नाही, मनाला शांत करणारा सर्व्हे आहे. निवणुकीच्या निकालानंतर खरी परिस्थिती समजेल. बहुमतात आम्ही सत्तेत बसू. लोकसभेच्यानंतर आता आमचा कॉन्फिडन्स वाढला आहे आणि आम्ही खूप काही शिकलो आहोत. आम्ही कुठे चुकलो, कुठे हरलो हे बघत आम्ही विधानसभा निवडणुकीला सामोरे जाणार आहोत. लोकसभेत 12 जागा आम्ही 50 हजारांच्या आत हरलो. काही ठिकाणी अल्पशा कमी मतांनी हरलो. देशाचे मुद्दे बाजूला पडले आणि निवडणूक लोकवर (पंचायत) गेली. मोदीजी आले तर आरक्षणाला धक्का लागेल. विविध संभ्रम तयार करण्यात आले. त्याचा आम्हाला थोडा फटका बसला, असे चंद्रशेखर बावनकुळे यांनी म्हटले.

आणखी वाचा