Nagpur : वादग्रस्त बिशप पी.सी. सिंह यांच्या सहकाऱ्यांवरही कारवाईची मागणी

नागपूर, भंडारा, चंद्रपूर आणि अमरावतीत मिशनच्या एकूण 24 शाळा आहेत. या शाळांकडून रचना सिंह महिन्यासा 5 लाख रुपये वसूल करत होत्या. ही सर्व रक्कम पी. सी. सिंह यांना देत होत्या, असा आरोप आहे.

symbolic image

नागपूर: वादग्रस्त बिशप पी.सी.सिंह यांच्यासाठी नागपुरातील चर्च ऑफ नॉर्थ इंडिया (Church of north india) अंतर्गत येणाऱ्या शाळेच्या प्राचार्यांनी कोटयावधीची वसुली केली. त्यांना आश्रय देण्यासाठी नागपुरात बोलावले. त्यानंतरच बिशप यांना नागपूर विमानतळावर (Nagpur Airport) ईओडब्लूने (EOW) अटक केली. त्यांच्या कोटयावधी वसुलीच्या कामात सहकार्य करणाऱ्या त्यांच्या पत्नी नोरा सिंह, प्राचार्य रचना सिंह, संजय सिंह, सुरेश जेकब तसेच सीएनआयचे जनरल सेक्रेटरी डेनिस लाल यांच्याविरूध्द कठोर कारवाई करावी अशी मागणी सोमवारी नितीन लॉरेन्स यांनी पत्रकार  परिषदेत करून खळबळ उडवून दिली. प्राचार्य रचना सिंह यांनी त्यांच्यावर केलेले सर्व आारोप खोडून काढले आहेत. 

कोट्यावधीच्या घोटाळ्याचा आरोप

बिशप पी.सी. सिंह यांचे अवैध कारनामे पंधरा दिवसांपूर्वी प्रकाशझोतात आल्यानंतर देशभर एकच खळबळ उडाली होती. बिशप सध्या जबलपूरच्या तुरूंगात (Jabalpur Jail) आहेत. लॉरेन्स म्हणाले, ईओडब्लूच्या टीमला पी. सी. सिंह यांच्या घरातून मोठ्या प्रमाणात विदेशी चलन (Foreign ‎Currency), कोट्यवधी रुपये तसेच अवैध संपत्तीची माहिती मिळाली आहे. पी. सी. सिंह यांनी मुंबईच्या विल्सन कॉलेजमधून अवैधरीत्या 70 लाख रुपये घेऊन युको बँकेच्या चेकच्या माध्यमातून वकिलाला दिले. सदर ठाण्यात त्यांच्याविरुद्ध 18 लाखाच्या चोरीचा गुन्हा दाखल आहे. एवढेच नव्हे तर एनडीटीए डायोसिस नावाच्या रजिस्टर्ड ट्रस्टची पचमढी येथील 1 लाख वर्ग फुटाचा भूखंड बिशप यांनी संचालक मंडळाला विश्वासात न घेता संजय आणि रचना सिंह यांच्या मदतीने सातपुडा रिसोर्टला नाममात्र शुल्कात भाडेतत्त्वावर दिला, असाही आरोप करण्यात आला. पत्रपरिषदेला अजय जॉन, प्रा. विजय बारसे, जयदीप रॉबिन्सन, ॲड. मार्क बर्मन उपस्थित होते. 

बिशपला 24  शाळांमधून महिन्याला 5 लाख

नागपूर, भंडारा, चंद्रपूर आणि अमरावतीत मिशनच्या एकूण 24 शाळा आहेत. या शाळांकडून रचना सिंह प्रति महिना 5 लाख रुपये वसूल करत होत्या. ही सर्व रक्कम पी. सी. सिंह यांना देत होत्या, असा आरोप आहे. 2005 ते 2019  या काळात रचना सिंह यांनी 15 कोटींचा घोटाळा केला असून महाराष्ट्राच्या ऑडिटर जनरल यांनी हा घोटाळा उघड करूनही त्यांच्यावर कारवाई झालेली नाही, याकडे लक्ष वेधण्यात आले. रचना सिंगचे पती संजय सिंह यांना पी. सी. सिंह यांनी मुंबईतील ट्रस्टच्या व्यवस्थापकीय संचालकपदावर नियुक्त केले. नियुक्तीनंतर त्यांनी ट्रस्टची संपत्ती विकून कोट्यवधी रुपये जमा केले आहेत. त्यामुळे पोलीस, इओडब्लू, ईडीने रचना सिंह, संजय सिंह, सुरेश जेकब, डेनिस लाल यांची चौकशी करून त्यांच्यावर कठोर कारवाईची मागणीही यावेळी करण्यात आली. 

ते कोण? संस्थेशी संबंधीत नाहीत!

याबाबत प्राचार्य रचना सिंह यांच्याशी संपर्क साधला असता त्यांनी त्यांच्यावर केलेले सर्व आरोप फेटाळून लावले. आरोप करणारे लॉरेंन्स व इतरांचा चर्च ऑफ नॉर्थ इंडियाशी काहीही संबंध नाहीत. ते कोण? संस्थेशी काय संबंध असे म्हणत, आम्हाला बदनाम करण्याचा हा प्रयत्न असल्याची प्रतिक्रिया प्राचार्य रचना सिंह यांनी व्यक्त केली.

इतर महत्त्वाच्या बातम्या