तामिळनाडूत द्रमुक आणि काँग्रेसचं जमलं, राज्यसभेची एक जागा काँग्रेसला मिळणार, विधानसभेसाठी द्रमुकनं किती जागा सोडल्या?
Tamil Nadu Election : तामिळनाडूमधील आगामी विधानसभा निवडणुकीसाठी द्रमुक आणि काँग्रेस यांच्यातील जागा वाटपाची चर्चा पार पडली आहे.
चेन्नई : आगामी तामिळनाडू विधानसभा निवडणुकीसाठी द्रमुक आणि काँग्रेस यांच्यातील जागावाटपाची चर्चा अंतिम झाली आहे. द्रमुकनं काँग्रेसला 28 जागा देण्याचा निर्णय घेतला आहे.द्रमुक तामिळनाडूमधील राज्यसभेची काँग्रेसला एक जागा देण्यास तयार झाली आहे. काँग्रेस आणि द्रमुक यांच्यातील जागा वाटप द्रमुकचे अध्यक्ष आणि मुख्यमंत्री एम के स्टॅलिन आणि काँग्रेसचे प्रदेशाध्यक्ष के सेल्वापेरुनथगई यांच्या उपस्थितीत जाहीर करण्यात आलं. यावेळी काँग्रेसचे प्रभारी गिरीश चोंदणकर आणि द्रमुकचे नेते उपस्थित होते. द्रमुक मुख्यालयात हा निर्णय घेण्यात आला.
द्रमुक आणि काँग्रेस यांच्यातील जागा वाटपाचा तिढा गेल्या आठवड्यात सुटला नव्हता. काँग्रेसनं द्रमुककडे किमान 34 जागा मिळाव्या अशी मागणी केली होती. मात्र, द्रमुकनं काँग्रेसला 25 जागा आणि राज्यसभेची एक जागा देऊ असं म्हटलं होतं. काँग्रेस आणि द्रमुक यांच्यातील आघाडी तुटणार की काय अशी स्थिती देखील निर्माण झाली होती. मात्र, द्रमुकच्या वरिष्ठ नेत्या खासदार कनिमोळी करुणानिधी यांच्या मध्यस्थीनंतर तिढा सुटला. कनिमोळी यांनी काँग्रेस खासदार कार्ती चिदंबरम आणि पी. चिदंबरम यांच्यासोबत चर्चा केली.
पी. चिदंबरम आणि काँग्रेस प्रदेशाध्यक्ष सेल्वापेरुनगथई यांनी एम. के. स्टॅलिन यांची त्यांच्या निवासस्थानी भेट घेतली. यावेळी कनिमोळी उपस्थित होत्या. या चर्चेद्वारे द्रमुककडून काँग्रेसला जागा वाढवून देण्यास सहमती दर्शवण्यात आली. याबाबत काँग्रेसच्या हायकमांडला कळवण्यात आलं.
कनिमोळी यांच्या मध्यस्थीनं काँग्रेस आणि द्रमुक यांच्यातील जागा वाटपाचा तिढा सुटला आहे. दरम्यान पुदूचेरी विधानसभा निवडणुकीच्या जागा वाटपाबाबत द्रमुक सोबत चर्चा सुरु करण्यात येईल असं काँग्रेस नेत्यांनी सांगितलं.
2021 च्या विधानसभा निवडणुकीत द्रमुकनं विजय मिळवला होता. 234 जागांपैकी 133 जागांवर द्रमुक विजयी झालं होतं. तर, अण्णाद्रमुक पक्षाला 66 जागा मिळाल्या होत्या. काँग्रेसनं गेल्या निवडणुकीत 18 जागांवर विजय मिळवला होता. पीएमके पक्षानं 5, व्हीसीके पक्षानं 4 आणि इतरांनी 8 जागांवर विजय मिळवला होता.
महत्त्वाच्या बातम्या
