नागपूर महापालिकेच्या आयुक्तांना हलवलं; राज्यातील दोन IAS अधिकाऱ्यांच्या बदल्या, पुण्यात कुठं जबाबदारी?

उपमुख्यमंत्री अजित पवार यांच्या निधनादिवशीच राज्यातील 75 शाळांना अल्पसंख्याक दर्जा देण्यात आल्याची धक्कादायक माहिती समोर आली होती.

Two IAS transfer Nagpur commissioner pune

Source : Abp

मुंबई : राज्यातील सनदी (IAS) अधिकाऱ्यांच्या बदल्या या सातत्याने होत असतात. मात्र, काही महत्वाच्या पदावर असलेल्या अधिकाऱ्यांची उचलबांगडी झाल्यास त्याची राज्यभर चर्चा होते. राज्याचे मुख्यमंत्री देवेंद्र फडणवीस यांचे होम ग्राऊंड असलेल्या नागपूर महापालिकेच्या आयुक्तांची बदली (Transfer) करण्यात आली आहे. नागपूरच्या आयुक्तपदावरुन डॉ. अभिजीत चौधरी यांची बदली करण्यात आली असून त्यांना पुणे महानगर विकास प्राधिकरणावर पाठवण्यात आलं आहे. विशेष म्हणजे राज्याचं अल्पसंख्या विभागही गेल्या काही दिवसांत चर्चेत होते. येथील सचिवपदीही नव्या अधिकाऱ्याची नेमणूक करण्यात आली आहे. 

उपमुख्यमंत्री अजित पवार यांच्या निधनादिवशीच राज्यातील 75 शाळांना अल्पसंख्याक दर्जा देण्यात आल्याची धक्कादायक माहिती समोर आली होती. विशेष म्हणजे, या निर्णयानंतर राज्यभरातून तीव्र संताप व्यक्त करण्यात आला. तर, मुख्यमंत्र्‍यांनीही याची दखल घेत कारवाईचे आदेश दिले होते. आता,   पुणे महानगर प्रदेश विकास प्राधिकरणाचे आयुक्त योगेश म्हसे यांची बदली करून मंत्रालयातील अल्पसंख्याक विकास विभागाच्या सचिवपदी त्यांची नियुक्ती करण्यात आली आहे. योगेश म्हसे हे 2009 च्या बॅचचे आयएएस अधिकारी आहेत. 

नागपूर महापालिका आयुक्तांचीही बदली

डॉ. अभिजीत चौधरी यांची नागपूर महानगरपालिका आयुक्त पदावरुन बदली करण्यात आली, ते 2011 च्या बॅचचे आयएएस अधिकारी आहेत. चौधरी यांच्याकडे आता पुणे महानगर प्रदेश विकास प्राधिकरणाची जबाबदारी देण्यात आली आहे. सदर बदली आदेश तात्काळ प्रभावाने लागू करण्यात येत आहेत, असे बदली आदेशात म्हटले आहे.

दरम्यान, या बदल्यामुळे योगेश म्हसेंच्या जागी अभिजीत चौधरी पदभार घेतील. तर, योगेश म्हसे हे मंत्रालयातील अल्पसंख्याक विभागाच्या सचिवपदी विराजमान होतील. मात्र, नागपूरच्या महापालिक आयुक्तपदी कोणाची वर्णी लागणार हे अद्याप निश्चित नाही.  

हेही वाचा