Nalasopara Buildings Demolition : नालासोपाऱ्यातील अवैध इमारतींवर आज महापालिकेचा हातोडा, अनेक कुटुंब होणार बेघर, मोठा पोलीस बंदोबस्त तैनात

Nalasopara Buildings Demolition : नालासोपाऱ्यातील डपिंग ग्राउंड आणि सांडपाणी प्रकल्पासाठी आरक्षित असलेल्या जागेवर बनवण्यात आलेल्या 41 अनधिकृत इमारतींवर तोडक कारवाई केली जात आहे.

Nalasopara Buildings Demolition

Source : ABP majha

नालासोपारा : येथील डपिंग ग्राउंड आणि सांडपाणी प्रकल्पासाठी आरक्षित असलेल्या जागेवर बनवण्यात आलेल्या 41 अनधिकृत इमारतींपैकी 10 इमारतीवर याआधी तोडक कारवाई (Nalasopara Buildings Demolition) करण्यात आली होती. आज सोमवारी (दि.27) रितू पॅलेस या चार मजली इमारतीवर आज महापालिका हातोडा मारणार आहे. तोडक कारवाईच्या भीतीने इमारतीतील रहिवासी स्वतः आपले सामान खाली करत असल्याचे पाहायला मिळत आहे. 

नालासोपारा पूर्वेच्या अग्रवाल नगरी येथे 30 एकरचा मोठा भूखंड असून काही भूखंड खासगी तर काही भूखंड कचराभूमी आणि सांडपाणी प्रकल्पासाठी आरक्षित होता. 2006 साली ही जमीन माजी नगरसेवक सीताराम गुप्ता व त्यांचे पुतणे अरुण गुप्ता यांनी बळकावली. यानंतर 2010 ते 2012 या कालावधीत या जमिनीवर बनावट बांधकाम परवानगी (सीसी) आणि भोगवटा प्रमाणपत्र (ओसी) बनवून 41 अनधिकृत इमारती बांधण्यात आल्या होत्या. 

पुन्हा तोडक कारवाईला सुरुवात

या 41 अनधिकृत इमारतीत दोन हजारांहून अधिक कुटुंबियांचे वास्तव्य असून मुंबई उच्च न्यायालय तसेच सर्वोच्च न्यायालयाने या इमारती अनधिकृत ठरवून पालिकेला कारवाईचे निर्देश दिले होते. या पार्श्वभूमीवर वसई विरार महापालिकेने याआधी 41 अनधिकृत इमारतींपैकी 10 इमारती भुईसपाट केल्या. कारवाई दरम्यान कोणत्याही प्रकारचा अनुचित प्रकार घडू नये यासाठी पोलिसांनी राज्य राखीव पोलीस दलाच्या तुकड्या, स्थानिक पोलीस ठाण्याचे अधिकारी व कर्मचारी, सीआरपीएफ अशी सर्व यंत्रणा तैनात ठेवण्यात आली आहे. त्यामुळे परिसराला छावणीचे स्वरूप आले होते. या कारवाईमुळे इमारतीत राहणारी शेकडो कुटुंब बेघर झाली असून त्यांनी प्रशासनाच्या विरोधात आक्रोश व्यक्त केला. तर काही रहिवाशांना कारवाई सुरू होताच अश्रू अनावर झाल्याचे दिसून आले होते. आता शिल्लक 31 इमारतीवर आजपासून (दि. 27) पुन्हा तोडक कारवाई केली जाणार आहे. 

रहिवाशांमध्ये भीतीचे वातावरण

आज रितू पॅलेस या चार मजली इमारतीवर आज महापालिका हातोडा मारणार आहे.  कारवाई दरम्यान कोणत्याही प्रकारचा अनुचित प्रकार घडू नये यासाठी पोलिस यंत्रणा सज्ज झाली आहे. तोडक कारवाईच्या भीतीने रहिवासी स्वतः आपले सामान खाली करत असल्याचे पाहायला मिळत आहे. आमचे घर तुटणार या भीतीने नालासोपारा पूर्व परिसरातील हजारो कुटुंबांमध्ये भीतीचे वातावरण पसरले आहे.

इतर महत्त्वाच्या बातम्या