एक्स्प्लोर

पोलीस दलात भरती होण्यासाठी लढवली अजब शक्कल, उंची कमी असल्याने विग लावून भरतीत उतरला अन्...

पोलीस दलात भरती होण्यासाठी सोलापुरात एका व्यक्तीने लढवलेली शक्कल पाहून तुम्ही देखील थक्क व्हाल. उंची कमी असल्यामुळं एका तरुण चक्क विग लावून पोलीस भरतीमध्ये उतरला. मात्र भरती दरम्यान त्याचं बिंग फुटलं.

Written By : आफताब शेख, एबीपी माझा | Edited By: निलेश झालटे | Updated at : 30 Oct 2021 10:46 AM (IST)

Solapur Police Bharti recruitment fraud case update पोलीस दलात भरती होण्यासाठी लढवली अजब शक्कल, उंची कमी असल्याने विग लावून भरतीत उतरला अन्...

सोलापूर_पोलिस

सोलापूर : पोलीस दलात भरती होण्यासाठी सोलापुरात एका व्यक्तीने लढवलेली शक्कल पाहून तुम्ही देखील थक्क व्हाल. उंची कमी असल्यामुळं एका तरुण उंची वाढविण्यासाठी चक्क विग (बनावट केसांचा टोप) लावून पोलीस भरतीमध्ये उतरला. मात्र भरती दरम्यान त्याचं बिंग फुटलं. तरुणाचे केस हे बनावट असल्याचे लक्षात येताच पोलिसांनी त्याच्यावर गुन्हा दाखल केला आहे. प्रभुराम प्रकाश गुरव असे गुन्हा दाखल 31 वर्षीय तरुणाचे नाव आहे. प्रभुराम हा मूळचा पंढरपुरातील शेवते गावचा राहिवासी आहे. सोलापुरातील जेल रोड पोलीस ठाण्यात त्याच्यावर फसवणुकीचा गुन्हा दाखल करण्यात आला आहे.

2019 मध्ये सोलापूर शहर पोलीस दलातील 88 पोलीस शिपाई पदांकरता पोलीस भरती जाहीर करण्यात आली होती. सोलापूर शहर मुख्यालयात ही प्रक्रिया सुरू आहे. शुक्रवारी कागदपत्रांची तपासणी, छाती, उंची, तसेच शंभर मीटर धावणे, गोळाफेक इत्यादी चाचण्या घेण्यात आल्या. यामध्ये अनेक तरुण पोलीस दलात भरती होण्याच्या उद्देशाने सहभागी झाले होते.

तसाच प्रभुराम गुरव हा तरुण देखील या भरतीमध्ये सहभागी झाला होता. पोलीस दलात भरती होण्यासाठी 165 सेंटीमीटर उंची असणे आवश्यक आहे. मात्र प्रभुराम याची उंची 163.5 इतकी आहे. भरती होण्यासाठी असलेल्या अटीपेक्षा जवळपास दीड सेंटिमीटर उंची कमी होती. त्यासाठी त्याने चक्क बनावट केस अर्थात विगचा वापर केला.

मात्र तपासणी करणाऱ्या पोलिसाला प्रभुरामवर शंका आल्याने त्यांनी त्याची संपूर्ण तपासणी केली. तपासणी केल्यानंतर त्याने विग लावल्याचा प्रकार उघडकीस आला. विशेष म्हणजे विग घातल्यानंतर देखील त्याची उंची 165 सेंटीमीटर इतकी झाली नाही, अशी माहिती पोलीस सूत्रांनी दिली.

प्रभुरामने लावलेल्या या शकलीमुळे भरतीवेळी उपस्थित सर्वजणच थक्क झाले. मात्र विग लावून शासनाची फसवणूक करून, सरकारी नोकरी मिळविण्याचा प्रयत्न केल्याबद्दल गुन्हा दाखल झाला आहे. भांदवि कलम 417, 420 प्रमाणे सोलापूरच्या जेलरोड पोलीस ठाण्यात गुन्हा नोंद करण्यात आला आहे. याचा पुढील तपास पोसई हनुमंतराव बादुले हे करत आहेत.

About the author आफताब शेख, एबीपी माझा

आफताब शेख हे एबीपी माझा वृत्त वाहिनीत सिनिअर करस्पॉन्डट म्हणून कार्यरत आहेत. मागील 9 वर्षांपासून एबीपी माझाच्या माध्यमातून कार्यरत असून आपल्या संवेदनशील आणि निष्पक्ष पत्रकारितेने त्यांनी स्वतंत्र ओळख निर्माण केली आहे. 3 जुलै 2017 रोजी मुंबई येथील एबीपी माझाच्या मुख्य कार्यालयातून त्यांनी पत्रकारितेच्या प्रवासाला सुरुवात केली. फेब्रुवारी 2019 पासून ते सोलापूर येथे सिनिअर करस्पॉन्डन्ट म्हणून कार्यरत आहेत. सध्या ते सोलापूर श्रमिक पत्रकार संघाचे सरचिटणीस म्हणूनही जबाबदारी सांभाळत आहेत.

सोलापूरच्या राजकीय घडामोडींपासून सामाजिक, शैक्षणिक, प्रशासकीय, औद्योगिक, मनोरंजन, क्रीडा आणि व्यावसायिक क्षेत्रांतील महत्त्वाच्या विषयांना त्यांनी एबीपी माझाच्या माध्यमातून राज्यस्तरीय व्यासपीठ मिळवून दिले आहे. ‘कामगारांचे शहर‘ म्हणून ओळखल्या जाणाऱ्या सोलापूरमधील कामगारांचे प्रश्न, सर्वसामान्य नागरिकांच्या समस्या आणि उपेक्षित घटकांचा आवाज शासनदरबारी पोहोचवण्याचा त्यांचा सातत्यपूर्ण प्रयत्न राहिला आहे. बहुभाषिक आणि समृद्ध सांस्कृतिक वारसा लाभलेल्या सोलापूरचा इतिहास, परंपरा आणि वर्तमानही त्यांनी आपल्या वार्तांकनातून प्रभावीपणे मांडले आहे. कोरोना काळात कोविड वॉर्डमध्ये प्रत्यक्ष जाऊन रुग्णांच्या व्यथा आणि आरोग्य व्यवस्थेतील वास्तव समोर आणला तर महापूर-दुष्काळातील रिपोर्ट्समधून त्यांनी आपल्या संवेदनशील पत्रकारितेचा प्रत्यय दिला. सोलापूरसह मुंबई, पुणे, धाराशिव, लातूर, बीड, नांदेड आणि छत्रपती संभाजीनगर जिल्ह्यांतही त्यांनी वार्तांकन केले आहे.

त्यांनी सोलापूरच्या दयानंद कला व शास्त्र महाविद्यालयातून कला शाखेची पदवी, तर मुंबई विद्यापीठातून मास्टर ऑफ मास कम्युनिकेशन अँड जर्नलिझम ही पदव्युत्तर पदवी प्राप्त केली आहे. पत्रकारितेसोबतच सामाजिक कार्याचीही त्यांना विशेष आवड आहे. महाविद्यालयीन जीवनातील सामाजिक योगदानासाठी 2016 मध्ये तत्कालीन राष्ट्रपती प्रणव मुखर्जी यांच्या हस्ते त्यांना इंदिरा गांधी राष्ट्रीय सेवा योजना पुरस्काराने (Indira Gandhi NSS Award-2016) सन्मानित करण्यात आले. याशिवाय, पत्रकारितेतील योगदानासाठी त्यांना विविध संस्था आणि संघटनांकडून अनेक पुरस्कारांनी गौरविण्यात आले आहे.

Published at : 30 Oct 2021 10:46 AM (IST)

Tags :

Solapur News Solapur Solapur Police