Maharashtra Breaking News Live 17 September 2022 : राज ठाकरे चार दिवसाच्या विदर्भ दौऱ्यासाठी रवाना, सीएसएमटीबाहेर मनसे सैनिकांची गर्दी
Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...
LIVE
Background
ब्रेकिंग न्यूज कधी पूर्वसूचना देऊन येत नाहीत.. हे खरं असलं तरी..पण आज दिवसभरात घडणाऱ्या काही पूर्वनियोजित घटना,कार्यक्रम असतातच.. त्याचाच दिवसभरात विस्तार होतो. त्या घटना-घडामोडींची पार्श्वभूमी-पूर्वपिठिका हाताशी असल्यावर या घटना-घडामोडी समजून घेणं सोपं होतं. आज दिवसभरातल्या कोणत्या महत्वाच्या बातम्यांवर आमचं लक्ष असेल किंवा महत्वाच्या घडामोडी आम्ही तुमच्यापर्यंत सविस्तर पोहोचवू याची ही थोडक्यात उजळणी... या नियोजित-घटना कार्यक्रमांसोबतच आयत्यावेळी येणाऱ्या घडामोडीही आम्ही तुमच्यापर्यंत पोहोचवू...
आज हैदराबाद मुक्तिसंग्राम दिन
हैदराबादला 1948 मध्ये भारत सरकारने निझामाच्या राजवटीविरुद्ध पोलीस कारवाई करून भारतात सामावून घेतले. वल्लभभाई पटेल यांनी पोलिस कारवाई करण्यासाठी घेतलेल्या धाडसी निर्णयामुळे हैदराबाद मुक्त केलं. त्याचं स्मरण म्हणून 17 सप्टेंबर हा दिवस हैदराबाद मुक्तिसंग्राम दिन पाळला जातो.
पंतप्रधान नरेंद्र मोदी यांचा वाढदिवस
पंतप्रधान नरेंद्र मोदींचा आज वाढदिवस आहे. या दिवशी संपूर्ण देशात अनेक कार्यक्रमांचे आयोजन करण्यात आले आहे. मोदींचा वाढदिवस देशभरात उत्साहात साजरा करण्यात येणार आहे.
पंतप्रधान नरेंद्र मोदी मध्यप्रदेश दौऱ्यावर
पंतप्रधान नरेंद्र मोदी 17 सप्टेंबर रोजी मध्य प्रदेशला भेट देणार आहेत. सकाळी सुमारे 10:45 वाजता, पंतप्रधान कुनो राष्ट्रीय उद्यानात नामिबियातून आणलेले चित्ते सोडतील. त्यानंतर, दुपारी 12 च्या सुमारा ते कराहल, श्योपूर येथे महिला बचतगट सदस्य/सामुदायिक संसाधन व्यक्तींसोबत बचतगट संमेलनात सहभागी होणार आहेत
सात दशकानंतर भारताच्या जंगलांमध्ये पुन्हा दिसणार चित्ता
जवळपास 70 वर्षांनंतर भारतातील जंगलात चित्ता परत येणार आहे. मध्यप्रदेशातील कुनो राष्ट्रीय उद्यान (Kuno Palpur आफ्रिकी चित्त्यांच्या स्वागतासाठी तयार आहे. उद्या सकाळी 8.30 वाजता हे चित्ते भारतात येणार आहे
पंतप्रधान नरेंद्र मोदी यांना भेटवस्तू म्हणून मिळालेल्या 1200 हून अधिक स्मृतीचिन्हांचा आणि भेटवस्तूंचा ई-लिलाव
संस्कृती मंत्रालयाने पंतप्रधान नरेंद्र मोदी यांना भेटवस्तू म्हणून मिळालेल्या 1200 हून अधिक प्रतिष्ठित आणि संस्मरणीय स्मृतीचिन्हांच्या आणि भेटवस्तूंच्या ई-लिलावाचे चौथे पर्व 17 सप्टेंबर ते 2 ऑक्टोबर 2022 दरम्यान, आयोजित केले आहे. केंद्रीय संस्कृती , पर्यटन आणि ईशान्य क्षेत्र विकास विभाग मंत्री जी. किशन रेड्डी यांनी या आगामी लिलावाबद्दल प्रसारमाध्यमांना माहिती दिली.
सागरी किनारा स्वच्छता आंतरराष्ट्रीय दिन
पंतप्रधान नरेंद्र मोदी यांच्या प्रेरणेने 5 जुलैपासून 75 दिवसांची स्वच्छ किनारा, सुरक्षित समुद् ही मोहिम सुरु करण्यात आली. केंद्र सरकारच्या पृथ्वी विज्ञान मंत्रालयाच्या नियोजनानुसार भारताच्या 7500 किलो मीटर लांबीच्या किनार पट्टीवर राबविण्यात आलेल्या या मोहिमेंतर्गत देशभारातील 75 समुद्र किना-यांवर 75 दिवसांची मोहिम राबविण्यात आली.
Nagpur : सीताबर्डी येथील फ्लायओव्हर वरुन पडून तरुणीचा मृत्यू
नागपूरः शहरातील सीताबर्डी येथील असलेल्या उड्डान पुलावरुन तरुणी पडली असून घटनास्थळीच तिचा मृत्यू झाल्याची प्राथमिक माहिती.
राज ठाकरे चार दिवसाच्या विदर्भ दौऱ्यासाठी रवाना, सीएसएमटीबाहेर मनसे सैनिकांची गर्दी
मनसे अध्यक्ष राज ठाकरे आज नागपूर दौऱ्यासाठी रवाना झाले आहेत. सीएसएमटी स्थानकावरुन ते ट्रेनने नागपूरसाठी रवाना होणार आहेत. सीएसएमटी स्थानकावर मनसे कार्यकर्त्यांची गर्दी जमली आहे
Jaikwadi Dam : जायकवाडीतून दीड लाख क्यूसेक्सने पाणी सोडणार, नदी काठच्या गावांना सतर्कतेचा इशारा
जायकवाडीतून दीड लाख क्युसेक पाणी सोडण्याची प्रशासनाची तयारी.
नदी काठच्या गावांना सतर्कतेचा प्रशासनाकडून इशारा.
दीड लाख क्युसेक ने पाणी सोडल्यास अनेक गावांना पुराचा फटका बसण्याची शक्यता.
या वर्षात पहिल्यांदा दीड लाखाने पाणी सोडले जाणार.
प्रशासनाच्या इशाऱ्नंयातर गावकऱ्यांमध्ये चिंतेच वातावरण.
वर्ध्यात 'सेवा पंधरवड्या'ला सुरुवात, पंतप्रधान नरेंद्र मोदींच्या वाढदिवसानिमित्त आरोग्य शिबीराचे आयोनज
वर्धा जिल्ह्यात आज पंतप्रधान नरेंद्र मोदी यांच्या वाढदिवसानिमित्त सेवा पंधरवाडा या उपक्रमाला सुरुवात झाली आहे. 2 ऑक्टोबरपर्यंत राबविण्यात येणाऱ्या या पंधरवड्यात विविध कार्यक्रमांचे आयोजन केले जाणार आहे. आज आरोग्य शिबीर आणि रक्तदानाने या सेवा पंधरवड्याची सुरुवात झाली. अनेक युवकांनी रक्तदानासाठी पुढाकार घेतला आहे. तसेच आरोग्य शिबिराला नागरिकांनी उत्स्फूर्त प्रतिसाद दिला. भाजपचे आमदार तसेच भारतीय जनता युवा मोर्चाच्या पदाधिकाऱ्यांच्या प्रमुख उपस्थितीत रक्तदान आणि आरोग्य शिबीर पार पडले.
'महाबीज'च्या संचालक निवडणुकीतील मतमोजणीदरम्यान गोंधळ
'महाबीज'च्या दोन संचालकांच्या निवडणुकीतील मतमोजणीदरम्यान गोंधळ उडालाय. मतमोजणी दरम्यान एका रूमचे सील उघडे असल्याचे निदर्शनास आले. या प्रकारामुळे आज ही मतमोजणी प्रक्रिया थांबवून उमेदवारांसह त्यांच्या प्रतिनिधींनी यावर आक्षेप नोंदवला आहे. महाराष्ट्र राज्य बियाणे महामंडळ 'महाबीज'च्या दोन संचालक पदाची निवडणूक नुकतीच पार पडलीय. विदर्भ विभाग मतदार संघातून डॉ. रणजित सपकाळ, प्रशांत गावंडे, तर उर्वरित महाराष्ट्र मतदारसंघातून वल्लभराव देशमुख, वकील विष्णुपंत सोळंके यांच्यात लढत आहे. दरम्यान, मतपत्रिका, ओळखपत्र पाठविण्याची तारीख 12 ऑगस्ट होती. तर मतपत्रिका स्वीकारण्याची अंतिम तारीख 14 सप्टेंबर होती. त्यानुसार 15 सप्टेंबर पासून ते 21 सप्टेंबर दरम्यान मतपत्रिका, वैध मतपत्रिकांची आणि छाननी म्हणजेच मतमोजणी प्रक्रिया सुरु आहे. आजचा मतमोजणीचा तिसरा दिवस होता.
उस्मानाबाद येथे हॉटेलवर छापा, पाच महिलांची सुटका
उस्मानाबाद येथे पोलिसांनी वेश्या व्यवसाय चालणाऱ्या दोन ठिकाणी धाडी टाकून पाच महिलांची सुटका केली. पोलिसांनी यावेळी लॉज चालकांना अटक केली आहे. जिल्हा पोलीस अधीक्षक अतुल कुलकर्णी यांनी याबाबत माहिती दिली. उस्मानाबाद शहरातील हॉटेल बावर्ची आणि हॉटेल सरिता येथे पोलिसांनी धाड टाकली. त्यावेळी हा प्रकार उघडकीस आला. दोन्ही हॉटेल चालकांवर उस्मानाबाद शहर पोलिस ठाण्यात गुन्हा नोंद करण्यात आला आहे.
उद्धव ठाकरेंमुळे महाराष्ट्राला वेदांत प्रकल्प गमवावा लागला; माजी मंत्री लक्ष्मण ढोबळेंचा आरोप
सोलापूर : सध्या राज्यात गाजत असलेल्या वेदांता प्रकल्पाबाबत रोज आरोप प्रत्यारोप सुरु असताना आज माजी मंत्री लक्ष्मण ढोबळे यांनी माजी मुख्यमंत्री उद्धव ठाकरे आणि आदित्य ठाकरे यांच्यावर तोफ डागलीय. तीन पक्षांच्या सरकारमध्ये उद्धव ठाकरे यांना पुढे करण्यात आले आणि त्यांनी 30 महिने मातोश्रीवर झोपून हा प्रकल्प घालवल्याची टीका लक्ष्मण ढोबळे यांनी केली. मोठे उद्योग राज्यात येत असताना त्याला लाल कार्पेट अंथरून वीज, पाणी, रस्ते, जमिनी या व्यवस्था एक खिडकीतून देतो हा विश्वास या उद्योगांना देणे गरजेचे असताना हे फक्त पंचट विनोद आणि शिव्यांची लाखोली वाहण्यात धन्यता मानत होते. स्वतःच्या चुका झाकण्यासाठी आता हे तीनही पक्ष केंद्र सरकारवर आरोप करण्याचे काम करत असल्याचा टोला यावेळी ढोबळे यांनी लगावलाय.
परभणीच्या जिंतूर येथे रास्ता रोको, वाहतूक ठप्प
परभणीच्या जिंतूर औंढा महामार्गावर मोठ्या प्रमाणावर खड्डे पडले आहेत. या खड्ड्यांमुळे महामार्गावर असलेल्या गावांमधील अनेक तरुणांचा अपघाती मृत्यू होतोय. तसेच प्रवासालाही मोठ्या अडचणींचा सामना या गावकऱ्यांना करावा लागतोय. वारंवार तक्रारी करूनही उपयोग होत नसल्याने आज या महामार्गावरील अनेक गावकऱ्यांनी एकत्र येत आडगाव फाटा येथे रास्ता रोको आंदोलन केले. या रास्ता रोको आंदोलनात मोठ्या संख्येने गावकरी सहभागी झाले होते. एक ते दीड तास चाललेल्या या रास्ता रोकोमुळे जिंतूर-औंढा वाहतूक ठप्प झाली होती. सार्वजनिक बांधकाम विभागाचे अभियंता या ठिकाणी आल्यानंतर त्यांनी रस्ता दुरुस्तीचे आश्वासन दिले, यानंतर हे आंदोलन मागे घेण्यात आले.
Raju Shetty : एफआरपी द्या नाही तर तुमच्या बापाला सोडणार नाही; राजू शेट्टींचा कारखानदारांना इशारा
एफआरपी द्या नाही तर तुमच्या बापाला सोडणार नाही, एफआरपी सोडून अधिकचे किती पैसे देणार ते आधी सांगा असा सवाल माजी खासदार राजू शेट्टी यांनी कारखानदारांना केला आहे. एकरकमी एफआरपी देतो म्हणणारे तुकड्यांचा कायदा महाविकास आघाडीने केला त्या वेळी तोंड बंद करून का गप्प होते असंही म्हणत त्यांनी आमदार हसन मुश्रीफ आणि राजेंद्र पाटील यड्रावकर यांच्यावर टीका केली आहे. यावर्षी जिल्ह्यातील सर्वच कारखानदार एकरकमी एफआरपी देणार असल्याचं हसन मुश्रीफ यांनी जिल्हा बँकेच्या सभेत वक्तव्य केलं होतं.
गंगोत्री-उत्तरकाशी महामार्गावर दरड कोसळली, वाहतूक ठप्प
गंगोत्री-उत्तरकाशी महामार्गावर दरड कोसळली आहे. त्यामुळे या मार्गावरील वाहतूक ठप्प झाली असून भाविक अडकले आहेत. अंबरनाथहून साधारण अडीशे भाविक अडकल्याची भीती व्यक्त होत आहे. सध्या कुठलीही रेस्क्यू टीम या ठिकाणी पहोचलेली असून अडकलेले भाविक त्यांच्या गाड्यांमध्ये बसून आहेत.
महत्त्वाच्या बातम्या
ट्रेंडिंग न्यूज
and tablets
