Eknath Shinde: लेकासाठी बापाची धावाधाव, शिवसेना उबाठा पक्षाला धक्का; कल्याणमधील नेता शिंदेंच्या शिवसेनेत

श्रीकांत शिंदेंची उमेदवारी जाहीर झाल्यानंतर मुख्यमंत्री एकनाथ शिंदेंनी स्वत: मतदारसंघात गाठीभेटी वाढवून विशेष लक्ष्य देऊन स्थानिक नेत्यांची मर्जी राखण्याचं काम सुरू केलं आहे.

Eknath Shinde for kalyan loksabha

Source : Twitter

ठाणे : लोकसभा निवडणुकांचा प्रचार शिगेला पोहोचला असून राज्यात तिसऱ्या टप्प्यातील प्रचाराचा उद्या शेवट होत आहे. त्यानंतर, 7 मे रोजी तिसऱ्या टप्प्यात मराठवाड्यासह पश्चिम महाराष्ट्रातील काही जागांवर मतदान (Voting) होत आहे. दुसरीकडे महायुती व महाविकास आघाडीच्या सर्वच उमेदवारांची यादी जाहीर झाली असून कल्याणमधून (Kalyan Loksabha) मुख्यमंत्री एकनाथ शिंदे यांचे सुपुत्र पुन्हा एकदा लोकसभेच्या रणांगणात उतरले आहेत. त्यामुळे, कल्याण लोकसभेकडे राज्याचे लक्ष लागले आहे. कल्याणमधून श्रीकांत शिंदे (Shrikant Shinde) यांना महाविकास आघाडीच्या उमेदवार वैशाली दरेकर यांचे आव्हान असून त्यांनी उमेदवारी अर्ज दाखल केला आहे. तर, श्रीकांत शिंदे यांनीही शक्तीप्रदर्शन करत आपला उमेदवारी अर्ज दाखल केला. 

श्रीकांत शिंदेंची उमेदवारी जाहीर झाल्यानंतर मुख्यमंत्री एकनाथ शिंदेंनी स्वत: मतदारसंघात गाठीभेटी वाढवून विशेष लक्ष्य देऊन स्थानिक नेत्यांची मर्जी राखण्याचं काम सुरू केलं आहे. पुत्र श्रीकांत यांचा विजय सोपा करण्यासाठी मुख्यमंत्री धावपळ करताना दिसून येतात. त्यातच,  शिवसेना उबाठा गटाचे कल्याण ग्रामीणमधील उपजिल्हाप्रमुख प्रकाश म्हात्रे आणि माजी नगरसेविका प्रेमा प्रकाश म्हात्रे यांनी आज मुख्यमंत्र्यांच्या उपस्थितीत शिवसेनेत जाहीर प्रवेश केला. त्यांच्यासह केशव पाटील, शाखाप्रमुख परेश पाटील, उमेश सुर्वे, अशोक पाटील, विजय पाटील आणि अन्य कार्यकर्त्यांनी देखील शिवसेनेत प्रवेश केला. यावेळी, मुख्यमंत्र्यांनी पक्षात स्वागत करून त्यांना भावी सामाजिक आणि राजकीय वाटचालीसाठी शुभेच्छा दिल्या आहेत. मात्र, या पक्षप्रवेशामुळे श्रीकांत शिंदेच्या उमेदवारीला ताकद मिळाल्याचं दिसून येते.

राजकारणाच्या गदारोळात रोज काही ना काही घडताना दिसत आहे. त्यातच, कल्याणमध्ये मंगळवारी शिंदे गटात प्रवेश केलेले माजी नगरसेवक पुरुषोत्तम चव्हाण यांनी एकाच दिवसात मुख्यमंत्री शिंदेंच्या शिवसेनेला रामराम केला आणि पुन्हा ठाकरेंच्या शिवसेनेते घरवापसी केली. मुख्यमंत्र्यांकडे वैयक्तिक कामासाठी गेलो असताना आपला पक्षप्रवेश करून घेतला असल्याचा दावा पुरुषोत्तम चव्हाण यांनी यावेळी केला होता. मात्र, आता मुख्यमंत्र्यांनी कल्याण ग्रामीणच्या उपजिल्हा प्रमुखांनाचा आपल्या गळाला लावलं आहे. त्यामुळे, येथील शिवसैनिकांची भूमिका काय राहिले, याकडे सर्वांचे लक्ष लागले आहे. 

उबाठा गटाचे कल्याण ग्रामीणमधील उपजिल्हाप्रमुख प्रकाश म्हात्रे आणि माजी नगरसेविका सौ.प्रेमा प्रकाश म्हात्रे यांनी आज शिवसेनेत जाहीर प्रवेश केला. त्यांच्यासह केशव पाटील, शाखाप्रमुख परेश पाटील, उमेश सुर्वे, अशोक पाटील, विजय पाटील आणि अन्य कार्यकर्त्यांनी देखील शिवसेनेत प्रवेश केला.… pic.twitter.com/aQWfC9sGBA

— Eknath Shinde - एकनाथ शिंदे (@mieknathshinde) May 4, 2024

पुरुषोत्तम चव्हाण यांनी एकाच दिवसात पुन्हा एकदा ठाकरे गटात प्रवेश केला. त्यानंतर, माध्यमांशी बोलताना त्यांनी घडलेला प्रसंग सांगितला होता. मुख्यमंत्र्यांशी चांगले संबंध असल्याने मी वैयक्तिक कामासाठी त्यांना भेटायला गेलो होतो. त्यावेळी डोंबिवलीतील काही पदाधिकाऱ्यांचा प्रवेश सुरू होता. त्यामध्ये माझा नंबर लागला. त्यावेळी माझ्या हातात पक्षाचा झेंडा दिला आणि पक्षप्रवेश करून घेतला. मात्र, मलाही पक्षप्रवेशाबद्दल काही माहिती नव्हतं, असा गौप्यस्फोटही नगरसेवक चव्हाण यांनी केला होता.

वैशाली दरेकरांची टीका

दरम्यान, पुरूषोत्तम चव्हाण यांनी केलेल्या आरोपानंत कल्याण लोकसभेच्या उमेदवार वैशाली दरेकर यांनी मुख्यमंत्री एकनाथ शिंदे आणि श्रीकांत शिंदे यांच्यावर जोरदार टीका केली. त्या म्हणाल्या की, मुले पळवणाऱ्या टोळीसारखे कार्यकर्ते आणि पदाधिकारी पळविणारी टोळी सध्या कल्याणमध्ये सक्रिय आहे. त्यामुळे कार्यकर्ते आणि पदाधिकाऱ्यांनी सावध राहावे.माजी नगरसेवक असलेल्या पुरुषोत्तम चव्हाण यांनी केलेल्या दाव्यानतंर आता शिवसेनेच्या ठाकरे आणि शिंदे गटात आरोप-प्रत्यारोपाच्या फैरी झडत आहेत.