Ashadhi Wari : संत निवृत्तीनाथांच्या पालखीचं आज डोंगरगणकडे प्रस्थान, तर मुक्ताबाईंच्या पालखीचा आज बीडमध्ये मुक्काम
Pandharpur Wari 2023 : संत निवृत्तीनाथांची पालखी 2 जून रोजी निघालेली असून हजारो वारकऱ्यांचा पायी प्रवासाचा आजचा अकरावा दिवस आहे.
Sant Nivruttinath Palkhi : 'अवघे गर्जे पंढरपूर, चालला नामाचा गजर, चालला नामाचा गजर, रामकृष्ण हरी, जय जय रामकृष्ण हरी', अशा असंख्य अभंगांनी पंढरीची वारी भक्तिरसात न्हाहून निघाली आहे. अशा भक्तिमय वातावरणात संत श्रेष्ठ निवृत्तीनाथ महाराज पालखी (Sant Nivruttinath Palkhi) नगर जिल्ह्यात असून कालच्या राहुरी शहरातील मुक्कामानंतर दिंडीने डोंगरगण गावी मुक्कामासाठी प्रस्थान केले आहे. तर काल अंबड इथे मुक्कामी असलेली मुक्ताबाईंची पालखी आज सकाळी मुक्कामाच्या ठिकाणाहून बाहेर पडत अंकुशनगर येथील कारखान्यावर मुक्कामी असणार आहे.
गेल्या अकरा दिवसांपसून पंढरपुरला विठुरायाच्या दर्शनासाठी दिंड्याचे प्रस्थान झाले असून लाखो भाविक पायी वारी करीत आहेत. भक्तीत तल्लीन झालेले वारकरी, अभंगांच्या गोडीने अन् विठ्ठलाच्या ओढीने एक एक पाऊल पंढरीच्या दिशेने टाकत आहेत. संत मुक्ताबाईंसह (Sant Muktabai) संत निवृत्तीनाथांची पालखी 2 जून रोजी निघालेली असून हजारो वारकऱ्यांचा पायी प्रवासाचा आजचा अकरावा दिवस आहे. ज्या ज्या ठिकाणी पालखी थांबते आहे, त्या ठिकाणी स्वागत करून दुसऱ्या दिवशी गावासह इतर परिसरातील वारकरी दिंडीत सामील होत आहेत. नगर जिल्ह्यातील राहुरी शहरात मुक्कामी असलेली संत निवृत्तीनाथांची पालखी पुढे राहुरी तालुक्यातील डोंगरगण गावाकडे मार्गस्थ झाली आहे. आज राहुरी येथून निघून पुढे वांबोरी मार्गे मार्गक्रमण करत डोंगरगण गावी मुक्कामी प्रस्थान केले आहे.
विठुरायाच्या पायी माथा टेकवण्यासाठी वारकरी आतुरलेला आहे. आबालवृद्धांसह महिला वारकरी मोठ्या संख्येने दिंडीत सहभागी आहेत. लांबवरून दिसणाऱ्या भगव्या पताका, दिंडी पालखी, अभंगाचा आवाज, विठुरायाच्या सुरू असलेला गजर या भक्तिमय वातावरणात दिंडी मार्गावरील भाविक आनंदून जात आहेत. विठुरायाच्या दर्शनासाठी राज्यभरातून लाखो भाविक विविध दिंड्यांच्या माध्यमातून पंढरपूरकडे रवाना झाले आहेत. यात संत निवृत्तीनाथांच्या दिंडीसह जळगाव (Jalgaon) जिल्ह्यातील मुक्ताईनगर येथून निघालेली संत मुक्ताबाईंची पालखी काल अंबड गावी मुक्कामी होती. आज पालखीचा अकरावा दिवस असून मुक्कामाच्या ठिकाणाहून पालखीने प्रस्थान करत पुढे मार्गस्थ झाली आहे. तर दुपारी दाढेपुर शहापूर येथे दुपारचा विसावा घेणार आहे. त्यानंतर संत मुक्ताबाईंची दिंडी याच मार्गाने पुढे पाथरशाला गावातील अंकुशनगर भागात विसावा घेणार आहे.
आज पालख्यांचा मुक्काम कुठे?
संत निवृत्तीनाथांची पालखी आज राहुरी येथून पायमार्गाने सडे, वांबोरी या गावावरून जाणार आहे. तर दुपारचे जेवण वांबोरी ग्रामस्थांकडून दिले जाणार आहे. तर मुक्कामासाठी संत निवृत्तीनाथांची दिंडी डोंगरगण येथे जाणार आहे. संत मुक्ताबाईंची पालखी आज अंबड येथून मार्गस्थ होऊन पायी मार्गक्रमण करणार आहे. या दरम्यान दुपारी शहागड येथील रामकृष्ण जगताप यांच्या परिवाराकडून दिंडीला दुपारचे जेवण दिले जाणार आहे. त्यांनतर दिंडीचे मुक्कामाचे ठिकाण अंकुशनगर पाथरशाला गावी असणार आहे.
महत्त्वाच्या बातम्या
