Hatkanangle Lok Sabha constituency : हातकणंगले लोकसभेला 'खेला होबे'! धैर्यशील मानेंना पर्याय म्हणून महायुतीमधून मोठं नाव समोर

हातकणंगले लोकसभा मतदारसंघातून (Hatkanangle Lok Sabha constituency) स्वाभिमानी शेतकरी संघटनेचे अध्यक्ष माजी खासदार राजू शेट्टी यांनी एकला चलो रे ची भूमिका अजूनही कायम ठेवली आहे.

Hatkanangle Lok Sabha constituency

कोल्हापूर : शिवसेना शिंदे गटाने कोल्हापूरमध्ये महाधिवेशन घेत कोल्हापूरच्या दोन्ही जागांवर दावा केला असला, तरी हातकणंगले लोकसभेची (Hatkanangle Lok Sabha constituency) अजूनही चर्चा सुरूच आहे. विद्यमान खासदार धैर्यशील माने (Dhairyasheel Mane) यांच्या विरोधातील अंतर्गत यादवी आणि त्यांना मतदारसंघात होत असलेल्या विरोध तसेच मतदारसंघातून गायब झाल्याच्या तक्रारीमुळे महायुतीकडून पर्यायी उमेदवार शोधण्यास सुरुवात झाली आहे. 

महायुतीकडून आमदार विनय कोरे यांच्या नावाची चर्चा सुरू

गेल्या काही दिवसांपासून जी पडद्यामागून चर्चा सुरु होती त्यामध्ये जाहीर नाव समोर आलं आहे. महायुतीकडून आमदार विनय कोरे (MLA Vinay Kore) यांच्या नावाची चर्चा सुरू असल्याची विश्वासनीय माहिती समोर आली आहे. विनय कोरे यांच्याशी उपमुख्यमंत्री देवेंद्र फडणवीस यांनी चर्चा केली असून ऐनवेळी ते महायुतीचा उमेदवार होऊ शकतात, अशी चर्चा आहे.  

राजू शेट्टींची एकला चलो रे ची भूमिका कायम

हातकणंगले लोकसभा मतदारसंघातून (Hatkanangle Lok Sabha constituency) स्वाभिमानी शेतकरी संघटनेचे अध्यक्ष माजी खासदार राजू शेट्टी यांनी एकला चलो रे ची भूमिका अजूनही कायम ठेवली आहे. त्यामुळे त्यांच्यासमोर उमेदवार कोण हे निश्चित नाही. धैर्यशील माने हेच उमेदवार असतील असं सातत्याने सांगण्यात येत असलं तरी माने यांच्या विरोधातील वाढती नाराजी प्रचंड असल्याने महायुती कोणत्याही प्रकारचा धोका न पत्करता पर्यायी उमेदवाराचा विचार सुरु केला आहे.  

वारणा खोऱ्यात विनय कोरेंची ताकद 

दुसरीकडे विनय कोरे यांचं नाव पुढे येण्यात हातकणंगले लोकसभा मतदारसंघातील बेरजेचा राजकारणाचाही भाग आहे. ते स्वतः पन्हाळा शाहूवाडीचे आमदार आहेत. 2019 मध्ये विनय कोरे यांनी भाजपला पाठिंबा दिला होता. वारणा खोऱ्यामध्ये वारणा उद्योग समुहाच्या माध्यमातून सहकाराचं जाळं तयार केलं आहे. राजाराम कारखान्याची परतफेड म्हणून महाडिक गटाकडून त्यांना मदत होऊ शकते. महाडिक गटाची हातकणंगले आणि शिराामध्येही ताकद आहे. हातकणंगलेत विद्यमान चार आमदार महायुतीमधील असल्यानेही सुद्धा फरक पडू शकतो. इतकंच नव्हे, तर माने यांनी विनय कोरे यांची सुद्धा नाराजी ओढवून घेतली आहे. त्यामुळे मतदारसंघातील आडाखा पाहता धैर्यशील माने सध्या अडचणीत असल्याचे बोलले जात आहे. 

दुसरीकडे धैर्यशील माने यांना बंडखोरीचा दणका देण्यासाठी शिवसेना ठाकरे गट ही जागा आपल्याकडे ठेवून उमेदवार न देता राजू शेट्टी यांचा मार्ग प्रशस्त करून देईल, अशी चर्चा आहे. बदल्यात शेट्टी यांची मदत विधानसभेला घेतली जाऊ शकते.  त्यामुळे लोकसभा मतदारसंघांमध्ये ऐनवेळी शेट्टी यांच्याविरोधात उमेदवार बदलल्यास राजकीय गणिते बदलण्याची शक्यता आहे.  

इतर महत्वाच्या बातम्या