Wrestlers Protest: "आमची तेवढीही लायकी नाही?"; क्रिकेटर्सचा सपोर्ट न मिळाल्यामुळे विनेश फोगाट भावूक

Wrestlers Protest Update: अनेक राजकीय नेत्यांनी, कलाकारांनी आंदोलक कुस्तीपटूंची भेट घेऊन त्यांना पाठिंबा दर्शवला. मात्र, दरम्यान इतर खेळाडूंची साथ न मिळाल्यानं कुस्तीपटूंनी नाराजी व्यक्त केली आहे.

Wrestlers Protest Update | Vinesh Phogat

Source : PTI

Wrestlers Protest Update: रेसलिंग फेडरेशन ऑफ इंडियाचे (WFI) अध्यक्ष ब्रिजभूषण शरण सिंह (Brij Bhushan Sharan Singh) यांच्यावर कारवाई करण्याच्या मागणीसाठी देशातील दिग्गज कुस्तीपटूंनी दिल्लीत आंदोलन पुकारलं आहे. त्यांना अनेक राजकीय पक्षांकडूनही पाठिंबा मिळत आहे, मात्र आतापर्यंत त्यांच्या समर्थनार्थ दुसरा कोणीही खेळाडू पुढे आलेला नाही. क्रिकेटपटूंनीही कुस्तीपटूंच्या आंदोलनाला कोणताही पाठिंबा दिलेला नाही. याचसंदर्भात आता कुस्तीपटू विनेश फोगाटनं (Vinesh Phogat)  प्रश्न उपस्थित केला आहे. विनेशनं भारतीय क्रिकेटपटू आणि इतर आघाडीच्या खेळाडूंच्या मौनावर प्रश्न उपस्थित केला आहे. विनेश फोगाट म्हणाली की, "संपूर्ण देश क्रिकेटची पूजा करतो, पण एकही क्रिकेटपटू काहीच बोलला नाही."

'ब्लॅक लाइव्ह्स मॅटर' चळवळीचे उदाहरण देत विनेश म्हणाली की, आपल्या देशात महान खेळाडू नाहीत असं नाही. असे अनेक क्रिकेटपटू आहेत, ज्यांनी अमेरिकेतील ब्लॅक लाइव्ह्स मॅटर चळवळीला पाठिंबा दर्शवला होता. आमची एवढीही लायकी नाही का? पुढे बोलताना ती म्हणाली की, जेव्हा कुस्तीपटू जिंकतात, तेव्हा सर्व क्रिकेटपटू त्यांचं अभिनंदन करण्यासाठी येतात. त्यांच्यासाठी ट्वीटही करतात, मग आता काय झालं? फोगटनं पुढे बोलताना विचारलं की, या खेळाडूंना व्यवस्थेची इतकी भीती वाटते की हो, काही तरी गडबड सुरू आहे?

पीटी उषा (PT USHA) यांच्यासंदर्भात काय म्हणाली विनेश फोगट?

याशिवाय विनेशनं पीटी उषा यांचं वक्तव्य असंवेदनशील असल्याचं म्हटलं आहे. आपण संविधानानुसार जगतो आणि स्वतंत्र नागरिक आहोत, असं विनेश म्हणाली. आपण कुठेही जाऊ शकतो, आम्ही बाहेर रस्त्यावर बसलो आहोत तर काहीतरी कारण असेलंच ना? आमचं कोणी ऐकलं नाही, यामागेही काहीतरी कारण असावं, मग ते आयओए असो वा क्रीडा मंत्रालय. फोगट म्हणाली की, तिनं पीटी उषा यांना फोनही केला होता, पण त्यांनी फोनही उचलला नाही.

काय म्हणाल्या होत्या पीटी उषा?

पीटी उषा म्हणाल्या होत्या की, भारतीय ऑलिम्पिक असोसिएशन (IOA) कडे लैंगिक छळाच्या तक्रारींसाठी एक समिती आहे. रस्त्यावर उतरण्याऐवजी ते (आंदोलक पैलवान/कुस्तीपटू) आधी आमच्याकडे येऊ शकले असते, पण ते आयओएमध्ये आलेच नाहीत. केवळ कुस्तीपटूंसाठीच नाही तर खेळासाठीही ते चांगलं नाही. त्यांनी थोडी शिस्तही बाळगली पाहिजे. पैलवानांच्या निषेधामुळे देशाची प्रतिमा मलीन होत असल्याचंही पीटी उषा बोलताना म्हणाल्या होत्या. 

महत्त्वाच्या इतर बातम्या :