Dhule : लष्कर भरतीचे स्वप्न अपुरं, 'अग्निवीर'च्या भरतीसाठी मुंबईत गेलेल्या धुळ्यातील तरूणाचा रेल्वेच्या धडकेने मृत्यू

रामेश्वर उर्फ बाळा हा मुंब्रा येतील रेल्वे प्लॅटफॉर्म उभा असताना भरधाव वेगाने येणाऱ्या रेल्वेच्या जबर धडकेत रामेश्वर याचा जागीच मृत्यू झाल्याची धक्कादायक घटना घडली आहे.

Dhule News

 मुंबई : 'अग्निवीर'च्या ( Agniveer) भरतीसाठी मुंबईत (Mumbai)  जाणाऱ्या वडजाई येथील तरुणाला भरधाव वेगाने येणाऱ्या रेल्वेने धडक दिल्याने त्याचा जागीच मृत्यू झाला. ही  घटना बुधवारी सकाळी 11 च्या सुमारास ठाणे येथील मुंब्रा रेल्वे स्थानकावर घडली आहे.

रामेश्वर भरत देवरे (वय 20, रा. वडजाई) असे मृत्यू झालेल्या तरुणाचे नाव आहे. तो वडजाई गावातील उपसरपंच संजय महाराज यांचा पुतण्या आहे.  बुधवारी पहाटे वडजाई, सौंदाणे बाबुळवाडी गावातील एकूण पंचवीस ते तीस मुलं भरतीसाठी मुंबई येथे गेले होते. रामेश्वर उर्फ बाळा हा मुंब्रा येतील रेल्वे प्लॅटफॉर्म उभा असताना भरधाव वेगाने येणाऱ्या रेल्वेच्या जबर धडकेत रामेश्वर याचा जागीच मृत्यू झाल्याची धक्कादायक घटना घडली आहे.

केंद्र सरकारने जाहीर केलेल्या 'अग्निवीर' सैन्य भरतीसाठी वडजाई येथील तरुण मंगळवारी रात्री चाळीसगाव व तेथून मुंबईला रेल्वेने गेले. बुधवारी सकाळी 10:30 वाजेच्या सुमारास हे सर्वजण कल्याण येथे पोहोचले. तेथून हे तरुण मुंब्रा येथे 'अग्निवीर'च्या भरतीसाठी जाणार होते. मात्र, रामेश्वर भरत देवरे याला मळमळ होऊ लागल्याने, तो उलटी करण्यासाठी रेल्वे रुळाकडे गेला. वाकून उलटी करीत असतानाच भरधाव वेगाने आलेल्या प्रवासी रेल्वेने त्याला जोरदार धडक दिली. यात त्याचा जागीच मृत्यू झाला. रामेश्वरचा अपघाती मृत्यू झाल्याने, मित्रही घाबरले होते.

रामेश्वर देवरे याचा कॉम्प्युटर डिप्लोमा झाला होता. रिकाम्या वेळेत तो वडिलांना शेतातील कामासाठी मदत करायचा. शेतात पिकवलेला भाजीपाला स्वतः विक्री करून तो आई-वडिलांना मदत करीत होता. नोकरीच्या अपेक्षेने दिवस-रात्र मेहनतही करीत होता. त्याच्या मेहनतीला फळ मिळेल, असे वडील सांगत असल्यामुळे त्याने सैन्यात जाण्याची तयारी केली होती. मात्र, देशसेवा करण्यापूर्वीच नियतीने त्याच्यावर झडप घातली. त्याच्या पश्चात आई-वडील, बहीण, भाऊ असा परिवार आहे. तो वडजाईचे उपसरपंच संजय महाराज देवरे यांचा पुतण्या होता.

संबंधित बातम्या :