National Film Awards 2021: राष्ट्रीय चित्रपट पुरस्कारानं भरला 'खिसा'
हा लघुपट खेडेगावातील संकुचित दृष्टिकोनावर भाष्य करणारा असून, एका लहान मुलाची मन हेलावून टाकणारी कथा या माध्यमातून प्रेक्षकांच्या भेटीला येते
National Film Awards 2021 सोमवारी केंद्रीय माहिती आणि प्रसारण मंत्रालयानं 67 व्या राष्ट्रीय चित्रपट पुरस्कारांची घोषणा केली. देशभरात 2019 या वर्षात प्रदर्शित झालेल्या चित्रपटांना यावेळी सन्मानित करण्यासाठी विजेत्यांच्या नावाची यादी जाहीर करण्यात आली. यामध्ये मराठी कलाविश्वानं या पुरस्कार सोहळ्यात विशेष छाप सोडल्याचं पाहायला मिळालं.
अनेक राष्ट्रीय आणि आंतरराष्ट्रीय पुरस्कारांवर आपले नाव कोरणाऱ्या 'खिसा' या लघुपटाने 67 व्या राष्ट्रीय चित्रपट पुरस्कारात नॉन फिचर फिल्ममधील सर्वोत्कृष्ट दिग्दर्शकीय पदार्पण या विभागातील पुरस्कार पटकावला आहे. या लघुपटाचं दिग्दर्शन राज मोरे यांनी केले असून लेखन कैलास वाघमारे यांनी केलं आहे. हा लघुपट खेडेगावातील संकुचित दृष्टिकोनावर भाष्य करणारा असून, एका लहान मुलाची मन हेलावून टाकणारी कथा या माध्यमातून प्रेक्षकांच्या भेटीला येतेय. या लघुपटात कैलास वाघमारे, मीनाक्षी राठोड, श्रुती मधीदीप, शेषपाल गणवीर आणि वेदांत श्रीसागर यांच्या प्रमुख भूमिका आहेत.
राष्ट्रीय पुरस्कार मिळाल्यानंतर 'खिसा'चे दिग्दर्शक राज मोरे यांनी आपली प्रतिक्रिया देत आनंद व्यक्त केला, ''आपल्या सर्वांनाच माहित आहे, की वर्षभरात 'खिसा' जगभर गाजतोय. जगभरातील अनेक मोठमोठ्या फिल्मफेस्टिवलमध्ये वर्ल्ड प्रिमिअरचा बहुमान पटकावल्यानंतर भारतातही 'खिसा'ने अनेक चित्रपट महोत्सवांवर आपली मोहोर उमटवली आणि आता तर राष्ट्रीय पुरस्कारावर आपले नाव कोरलं. त्यामुळं माझ्यासाठी ही खूपच आनंदाची, अभिमानाची गोष्ट आहे. 'खिसा'साठी नॉन फिचर फिल्ममधील सर्वोत्कृष्ट दिग्दर्शकीय पदार्पण पुरस्कार मला मिळाला आहे. पण हा पुरस्कार माझ्या एकट्याचा नसून तो संपूर्ण टीमला मिळाला आहे. कारण त्यांच्याशिवाय हे शक्यच नव्हतं. त्यामुळे सगळ्या ज्युरींसह मी संपूर्ण टीमचेसुद्धा आभार मानतो. एवढा मानाचा पुरस्कार मिळाल्याने आता जबाबदारीही तितकीच वाढली आहे. त्यामुळे भविष्यातही अधिक आशयपूर्ण चित्रपट देण्यासाठी आम्ही नेहमीच प्रयत्नशील असू.''
'खिसा' या मराठी लघुपटाची गोव्यात होणाऱ्या ५१व्या भारतीय आंतरराष्ट्रीय चित्रपट महोत्सवातही निवड झाली होती. इस्तंबूल फिल्म अवॉर्ड्स २०२०मध्ये या लघुपटला सर्वोत्कृष्ट चित्रपट आणि सर्वोत्कृष्ट पटकथा हे पुरस्कार मिळाले होते. सोबतच कॅनडाच्या मॉन्ट्रियल इंडिपेंडंट फिल्म फेस्टिव्हल, २६व्या कोलकाता इंटरनॅशनल फिल्म फेस्टिव्हल, डायोरोमा इंटरनॅशनल फिल्म फेस्टिव्हल, जयपूर इंटरनॅशनल फिल्म फेस्टिव्हल, अर्जेंटिनाच्या डायोरोमा इंडी शॉर्ट्स अवॉर्ड्स, ब्युनोस आयर्स, येथील महोत्सवांतही 'खिसा'ची निवड करण्यात आली आहे.
महत्त्वाच्या बातम्या
