Aamir Khan Birthday: अभिनय नाही तर 'या' क्षेत्रात आमिरला करायचं होतं काम; असा झाला बॉलिवूडचा 'मिस्टर परफेक्शनिस्ट'

Aamir Khan Birthday Special : आमिर खानचा (Aamir Khan) आज 58 वा वाढदिवस आहे. आमिरने अनेक हिट चित्रपटांमध्ये काम केलं. जाणून घेऊयात त्याच्या करिअरबाबत...

Aamir Khan Birthday

Aamir Khan Birthday Special : 'मिस्टर परफेक्शनिस्ट' अशी ओळख असणारा बॉलिवूडमधील प्रसिद्ध अभिनेता आमिर खान (Aamir Khan) हा त्याच्या वैयक्तिक आयुष्यामुळे आणि चित्रपटांमुळे चर्चेत असतो. आज त्याचा 58 वा वाढदिवस आहे. आमिरने अनेक हिट चित्रपटांमध्ये काम केलं. पण आमिरच्या बालपणाबद्दल अनेकांना माहित नसेल. आमिरने वयाच्या आठव्या वर्षी अभिनयक्षेत्रात पदार्पण केलं. जाणून घेऊयात आमिरबद्दल काही खास गोष्टी...

बालकलाकार म्हणून केलं काम

आमिरचा जन्म 14 मार्च 1965 रोजी मुंबईमध्ये झाला. आमिरने 1973 मध्ये 'यादों की बारात' या चित्रपटात बालकलाकार म्हणून काम केलं. आमिरने अभिनयक्षेत्रात काम करावं, असं त्याच्या वडिलांना वाटत नव्हतं. पण आमिरने अवन्तर नावाच्या थिएटर ग्रुपमध्ये काम करण्यास सुरुवात केली होती. 'कयामत से कयामत तक' या चित्रपटात त्याने पहिल्यांदा हिरोची भूमिका साकारली. 

अभिनय नाही तर या क्षेत्रात आमिरला करायचं होतं काम

आमिरला बालपणी टेनिस खेळायला खूप आवडत होते. त्याला टेनिस प्लेअर व्हायचे होते. तो शाळेत असताना टेनिस चांगला खेळायचा. त्याने शाळेत असताना राज्यस्तरीय लॉन टेनिस चॅम्पियनशिपमध्ये सहभाग घेतला होता.  रोजर फेडरर हा आमिरचा आवडता खेळाडू आहे. 

'कयामत से कयामत तक' या चित्रपटातील आमिरच्या अभिनयाचं अनेकांनी कौतुक केलं. या चित्रपटाचं बजेट कमी होतं. त्यामुळे आमिरने स्वत:च या चित्रपटाचे पोस्टर रिक्षा आणि बसच्या मागे लावण्याचे काम केले. काही दिवसांपूर्वी आमिरचा एक व्हिडीओ व्हायरल झाला होता. या व्हिडीओमध्ये आमिर हा रिक्षाच्या मागे चित्रपटाचे पोस्टर लावताना दिसत होता. 

आमिरने हिट चित्रपटांमध्ये केलं काम

आमिर हा त्याच्या अभिनयानं प्रेक्षकांची मनं जिंकतो. मन, इश्क, गुलाम, फना, तारे जमीन पर या चित्रपटांमध्ये आमिरने काम केलं. त्याच्या लगान, दंगल, पीके आणि थ्री इडियट्स या चित्रपटांमधील अभिनयाला प्रेक्षकांची विशेष पसंती मिळाली. त्याच्या अनेक चित्रपटांनी 100 कोटींच्या क्लबचा टप्पा गाठला होता. आमिर चित्रपटांचे शूटिंगच्या वेळी मन लावून काम करतो. अनेक वेळा तो इतर कलाकारांना गाइडन्स देतो. त्याच्या अभिनयाचं देखील अनेक जण कौतुक करतात. त्यामुळे आमिरला बॉलिवूडचा 'मिस्टर परफेक्शनिस्ट' म्हटलं जातं. 

गेल्या वर्षी त्याचा लाल सिंह चड्ढा हा चित्रपट प्रेक्षकांच्या भेटीस आला. या चित्रपटाला प्रेक्षकांची फारशी पसंती मिळाली नाही. या चित्रपटात आमिरसोबतच करीना कपूर, मोना सिंह आणि नागा चैतन्य यांनी प्रमुख भूमिका साकारली. आता आमिरचे चाहते त्याच्या आगामी चित्रपटांची वाट बघत आहेत. 

वाचा इतर महत्वाच्या बातम्या: