Vasai Accident News: मित्राची गाडी घेऊन नवखा चालक फिरायला निघाला, ब्रेकऐवजी चुकून एक्सेलेटर दाबलं अन् कारचे नियंत्रण सुटून 9 जणांना उडवलं; वसईतील घटना
Vasai Accident News: ब्रेकऐवजी चुकून एक्सेलेटर दाबले गेले आणि कार थेट रस्त्यावरून जाणाऱ्या नागरिकांवर आदळली.
वसई : होळीच्या पूर्वसंध्येला वसईतील सातीवली परिसरात एका कार चालकाचे कारवरील नियंत्रण सुटल्याने रस्त्याने चालणाऱ्या ९ जणांना धडक दिल्याची घटना काल (सोमवारी ता २) रात्री साडे नऊ वाजण्याच्या सुमारास घडली आहे. सुदैवाने या अपघातात कोणतीही जीवितहानी झाली नाही.(Vasai Accident News)
ब्रेकऐवजी चुकून एक्सेलेटर दाबले गेले
मिळालेल्या माहितीनुसार, शेरवलेट कंपनीची ‘बीट’ कार चालवणारा मोबिन मोनिर अहमद (वय ४९, रा. सातीवली, मौर्या नगर – भाडेकरू) हा नवीन चालक असून मित्राची कार घेऊन परिसरात फिरत होता. मौर्या नगर येथे गर्दीच्या ठिकाणी गाडी चालवत असताना त्याच्याकडून ब्रेकऐवजी चुकून एक्सेलेटर दाबले गेले आणि कार थेट रस्त्यावरून जाणाऱ्या नागरिकांवर आदळली.(Vasai Accident News)या अपघातात जखमी झालेल्या नऊ जणांपैकी काहींना प्लॅटिनम हॉस्पिटल (Platinum Hospital) येथे, तर तिघांना डी.एम. पेटिट हॉस्पिटल (D.M. Petit Hospital) मध्ये दाखल करण्यात आले. एका जखमीवर विवान हॉस्पिटल (Vivan Hospital) येथे उपचार करण्यात आले. सर्व जखमींना किरकोळ दुखापत झाली असून उपचारानंतर त्यांना घरी सोडण्यात आले आहे. काहींना तीन ते पाच टाके घालावे लागल्याची माहिती समोर आली आहे.(Vasai Accident News)
दरम्यान, घटनेनंतर परिसरात काही काळ तणावाचे वातावरण निर्माण झाले होते. वालीव पोलीसांनी चालक मोबिन मोनिर अहमद याला ताब्यात घेतले असून पुढील तपास सुरू आहे. प्रत्यक्षदर्शीने याबाबत माहिती देताना सांगितलं की ही घटना घडली त्याच ठिकाणी माझं मेडिकल आहे. साधारण साडेआठ नऊ वाजण्याच्या सुमारास मी मेडिकल मध्ये होतो त्याच वेळेला खूप स्पीडमध्ये एक गाडी आली आणि पुढे येऊन थांबली मला वाटलं काहीतरी झाला असेल पण लोकांना उडवत ती गाडी तिथपर्यंत आली होती, सात ते आठ लोकांना त्या गाडीने उडवलं होतं काही जण जखमी झाली आहेत.
अपघातानंतर स्थानिक नागरिकांनी तात्काळ जखमींना मदत करत त्यांना जवळच्या रुग्णालयात हलवले. काही काळासाठी परिसरात मोठी गर्दी जमली होती. अचानक घडलेल्या या घटनेमुळे होळीच्या सणाच्या उत्साहावर पाणी फेरले गेले. पोलिसांनी घटनास्थळी धाव घेत परिस्थिती नियंत्रणात आणली आणि वाहतूक सुरळीत केली.
वालीव पोलिस ठाण्यात या प्रकरणी गुन्हा नोंदविण्याची प्रक्रिया सुरू असून चालकाविरुद्ध निष्काळजीपणे वाहन चालविल्याचा गुन्हा दाखल करण्यात येणार असल्याची माहिती सूत्रांनी दिली. चालक नव्याने वाहन चालवू लागल्याची बाब प्राथमिक चौकशीत समोर आली असून, पुढील तपास पोलीस करत आहेत.
महत्त्वाच्या बातम्या
