दहशतवादी कारवायांमध्ये सहभागी असणारा झाकीर शेख अँथोनीच्या संपर्कात, हा अँथोनी कोण?

दिल्ली पोलिसांच्या विशेष पथकाकडून 6 दहशतवाद्यांना अटक करण्यात आली होती. त्यानंतर महाराष्ट्र दहशतवादी विरोधी पथक सतर्क झालं आहे.

मुंबई : झाकीर हुसेन शेख याला महाराष्ट्र दहशतवादी पथकाकडून अटक करण्यात आली होती. तसेच झाकीर हा बाजूच्या देशातील अँथोनी नावाच्या व्यक्तीच्या संपर्कात होता, मात्र हा अँथोनी कोण? अँथोनी दुसरा तिसरा कोणी नसून झाकीर शेखचा भाऊ शगीर शेख असल्याचा संशय महाराष्ट्र दहशतवादी विरोधी पथकाला आहे. शगीर शेख 2001 मध्ये नेपाळमार्गे पाकिस्तानमध्ये पळून गेला होता. आणि गेल्या दोन दशकांपासून तो पाकिस्तानमध्ये राहत होता.

सुत्रांकडून मिळालेल्या माहितीनुसार, प्राथमिक तपासात महाराष्ट्र दहशतवादी विरोधी पथकाला काही असे पुरावे सापडले आहेत, ज्यावरून त्यानंतर अँथोनी उर्फ आनास उर्फ अन्वर जो बाजूच्या देशांमध्ये बसून भारतात दहशतवाद पसरवण्याचा प्रयत्न करत होता. हा शगीर शेख असल्याचा संशय आहे आणि हा खूप वर्षानंतर दाऊद गॅंगसाठी सक्रिय झाला आहे.

2001 मध्ये भारतीय जनता पक्षाचे वरिष्ठ नेते लालकृष्ण अडवाणी यांच्या हत्येचा कट रचणाऱ्यांपैकी शगीर शेखसुद्धा एक होता. शगीर शेख दाऊदचा भाऊ अनिस इब्राहिमचा खास हस्तक आहे. जो खाडी देशांमध्ये अमली पदार्थ आणि हत्यारांचं काम सांभाळतो.

भारतामध्ये दहशतवाद पसरविण्याची जबाबदारी शगीरला आयएसआयकडून देण्यात आली होती. कारण अनेक वर्षांपासून भारतात दाऊद गॅंगकडून पसरवण्यात आलेल्या दहशतवादी कटामध्ये शगीरचा सहभाग नव्हता. शगीर शेख हा पाकिस्तानमध्ये अनवर म्हणून वावरतो, तर खाडी देशांमध्ये आनास म्हणून. महाराष्ट्र दहशतवादी विरोधी पथकाकडून अटक करण्यात आलेला झाकीर शेख हा शगीर शेखचा मोठा भाऊ आहे आणि शगीर शेखचं नाव त्यानं आपल्या मोबाईलमध्ये अँथोनी म्हणून सेव्ह केलं होतं जेणेकरून कोणाला संशय येऊ नये. 

महाराष्ट्र दहशतवादी विरोधी पथकाकडून झाकीर आणि मोमीन या दोघांना अटक करण्यात आली होती आणि 2 दिवस त्यांची ATS कोठडी घेण्यात आली होती. ज्यानंतर त्यांची कसून चौकशी महाराष्ट्र दहशतवादी विरोधी पथकाकडून करण्यात आली आणि त्यात काही महत्त्वाचे खुलासे झाले. ज्या आधारावर आता महाराष्ट्र दहशतवादी विरोधी पथकाकडून केला जात आहे. दरम्यान, दिल्ली पोलिसांच्या विशेष पथकाकडून 6 अतिरेकींना अटक करण्यात आली होती. त्यानंतर महाराष्ट्र दहशतवादी विरोधी पथक सतर्क झालं होतं आणि त्यांनी संशयितांचा शोध सुरु केला होता.