समुद्रकिनारा स्वच्छ करताना विदेशी दाम्पत्याला आढळली जुन्या नोटांनी भरलेली बॅग; 57 हजारांची रोकड पोलीस स्थानकात जमा
Vasai News: समुद्रकिनारा स्वच्छ करताना विदेशी दाम्पत्याला सापडल्या 57 हजारांच्या जुन्या नोटा. दाम्पत्याची वसईच्या भूईगांव पोलीस स्थानकात धाव.
Vasai News: वसईत (Vasai Crime News) एका दाम्पत्याला समुद्रकिनारा स्वच्छ करताना तब्बल 57 हजारांच्या जुन्या नोटा सापडल्या आहेत. वसईतील भूईगांव समुद्रकिनारा स्वच्छ करताना हंगेरी देशातील राहणाऱ्या दोन विदेशी नागरीकांना एक बॅग आढळली. संशय आल्यानं त्यांनी जवळ जाऊन ती बॅग पाहिली, तर त्या बॅगेत त्यांना काही जुन्या चलनी नोटा आढळून आल्या. त्यांनी त्या नोटा तात्काळ वसईच्या भूईगांव पोलीस स्थानकात (Bhuigaon Police Station) जमा केल्या आहेत.
रविवारी (11 डिसेंबर) वसईच्या गिरीज येथे राहणारं एक दाम्पत्य आपल्या दोन लहानमुलांसह वसईच्या भूईगांव समुद्रकिनाऱ्यावर आलं होतं. लिजबेन फराव आणि त्यांची पत्नी झायनो फराव आणि त्यांची दोन लहान मुलं असे चौघे मिळून सकाळी वसईजवळचं भूईगांव समुद्रकिनारा स्वच्छ करत होते. समुद्रकिनारा स्वच्छ करत असताना त्यांना एक बॅग आढळून आली. संशय आल्यानं फराव दाम्पत्यानं जवळजाऊन बॅगेची पाहाणी केली. त्यावेळी त्यांना बॅगेत थोडी थोडकी नाहीतर तब्बल 57 हजारांची रोकड आढळून आली. पण या सर्व नोटा जुन्या होत्या. ती बॅग घेऊन या दाम्पत्यानं तात्काळ पोलीस स्थानक गाठलं.
फराव दाम्पत्यानं पोलीस स्थानकात दिलेल्या माहितीनुसार, समुद्रकिनारा स्वच्छ करत असताना त्यांना एक बॅग दिसली. त्यांनी ती बॅग उघडली. तर त्या बॅगेत 57 हजारांच्या जुन्या नोटा सापडल्या. यात हजार रुपयाच्या तीन नोटा तर पाचशे रुपयाच्या 108 जुन्या नोटा होत्या. नोटबंदीनंतर जुन्या पाचशे आणि हजारच्या नोटा बंद झाल्या आहेत. दाम्पत्यानं त्या नोटा वसईच्या भूईगांव पोलीस चौकीत जमा केल्या आहेत. लिजबेन आणि त्यांची पत्नी झायनो हे दोघे मुळचे हंगेरी या देशातील नागरीक आहेत. ते वसईमध्ये गिरीज येथे वास्तव करत असून मागील सहा वर्षांपासून हे दाम्पत्य वसई-विरारमधील बीच स्वच्छ करत आहेत. आतापर्यंत विविध एनजीओ विद्यार्थी, कॉर्पोरेटर यांच्या माध्यमातून बीच स्वच्छता मोहीमही घेतली आहे. तसेच आतापर्यंत 700 टन प्लास्टिक समुद्रकिनाऱ्यावरुन उचललं आहे.
नोटबंदीनंतर राहिलेल्या या जुन्या नोटा कुणीतरी बॅगेसहित समुद्रात फेकल्या असतील आणि समुद्राच्या प्रवाहात ती बॅग भूईगांव समुद्रकिनाऱ्यावर लागली, असल्याचा अंदाज पोलिसांनी वर्तवला आहे. वसई पोलिसांनी पैसे जमा करुन, जुन्या नोटांबाबत तपास सुरु केला आहे.
महत्त्वाच्या इतर बातम्या :
महत्त्वाच्या बातम्या
ट्रेंडिंग न्यूज
