Karnataka: उडपीतील कॉलेजमध्ये मुलींच्या टॉयलेटमध्ये छुपा कॅमेरा लावून व्हिडीओ प्रकरण; सीआयडी तपासाचा पहिला टप्पा पूर्ण

Karnataka Udupi Hidden Camera News: उडपीतील एका महाविद्यालयात मुलींच्या शौचालयात छुपा कॅमेरा लावण्यात आला होता, त्याद्वारे व्हिडीओ शूट करण्यात आला होता.

CID

Udupi Hidden Camera In Washroom: कर्नाटकातील उडपी शहरात असलेल्या नेत्रज्योती पॅरामेडिकल कॉलेजच्या टॉयलेटमध्ये एका विद्यार्थिनीचा व्हिडिओ रेकॉर्ड (Girl Restroom Video) करण्यात आल्याची धक्कादायक घटना घडली होती, या प्रकरणातील सीआयडी (CID) तपासाचा पहिला टप्पा पूर्ण झाला आहे. छुप्या कॅमेऱ्याच्या मदतीने व्हिडीओ रेकॉर्ड करण्यात आलेल्या घटनेचा प्राथमिक तपास पूर्ण झाल्याची माहिती सूत्रांकडून मिळाली आहे.

सीआयडी तपासाचा पहिला टप्पा पूर्ण

उडपीतील महाविद्यालयात घडलेल्या प्रकारानंतर सर्वत्र खळबळ उडाली होती, यानंतर प्रकरणाचा तपास सीआयडीकडे सोपावण्यात आला होता. टॉयलेटमधील व्हिडीओ प्रकरणाच्या तपासाचा पहिला टप्पा पूर्ण झाला असून सीआयडीचे अधिकारी उडपीहून बंगळुरूला परतले आहेत, अशी माहिती सूत्रांनी दिली आहे.

प्रकरणाशी संबंधित व्यक्तींची सीआयडीकडून चौकशी

डेप्युटी एसपी अंजुमाला यांनी टॉयलेटमधील व्हिडीओ प्रकरणाचा तपास केला होता. सीआयडी एडीजीपी मनीष खरबीकर यांच्या देखरेखीत हा तपास पूर्ण झाला आहे. सीआयडी पथकाने या प्रकरणाशी संबंधित पीडित, आरोपी विद्यार्थिनी, महाविद्यालयीन अधिकारी आणि इतर संबंधित व्यक्तींची अनेक वेळा चौकशी केली आणि जबाब नोंदवले आहेत.

तीन आरोपी विद्यार्थिनींचे मोबाईल जप्त

उडपी गर्ल्स कॉलेज टॉयलेट व्हिडीओ प्रकरणी सीआयडीच्या टीमने तीन आरोपी विद्यार्थ्यांकडून फोन जप्त केले आहेत. सीआयडी आता जप्त केलेल्या या तीन मोबाईलच्या फॉरेन्सिक सायन्स लॅबोरेटरीच्या (FSL) अहवालाची वाट पाहत आहे. तपास अधिकारी या घटनेचा अहवाल लवकरच सादर करतील, असंही सूत्रांकडून समजतं आहे.

भाजपकडून आरोपी मुलींवर कारवाईची मागणी

भाजप पक्ष आरोपी असलेल्या तीन मुस्लिम विद्यार्थिनींवर कायदेशीर कारवाईची मागणी करत आहे. मुस्लिम मुलींनी हिंदू मुलींचा टॉयलेटमधील व्हिडीओ बनवला आणि तो व्हिडीओ व्हायरल करण्यासाठी दिला असल्याचा आरोप भाजपने केला आहे. कर्नाटक राज्यातील सत्ताधारी पक्ष काँग्रेस या घटनेला दडपण्याचा प्रयत्न करत असल्याचा आरोप भाजपने केला. काँग्रेस सरकार राजकारण करत असल्याचा आरोप भाजपने केला.

पीडित मुलगी आरोपी मुलींवर गुन्हा दाखल करण्यास इच्छुक नाही

महिला कार्यकर्त्या रश्मी सामंत यांनी या विषयावर आवाज उठवला होता, पण कर्नाटक पोलिसांनी त्यांचाही छळ केल्याचा आरोप भाजपने केला. दरम्यान, ज्या कॉलेजमध्ये हा प्रकार घडला, त्या पॅरा-मेडिकल कॉलेजने असं म्हटलं की, पीडित मुलगी ही आरोपी मुलींविरुद्ध तक्रार करण्यासाठी इच्छुक नाही.

पोलिसांनी दबावाखाली येऊन स्वत:हून नोंदवला गुन्हा

सुरुवातीला पुराव्याअभावी गुन्हा दाखल करू शकत नसल्याचं देखील पोलिसांनी सांगितलं. तथापि, ही घटना देशाला हादरवणारी बातमी असल्याचं दिसून आल्याने दबावाखाली आल्यानंतर पोलिसांनी स्वत:हून गुन्हा दाखल करून प्रकरणाता तपास सुरू केला. राष्ट्रीय महिला आयोगाच्या सदस्या खुशबू सुंदर यांनी या प्रकरणाची चौकशी करण्यासाठी उडपीमध्ये पोहोचल्या होत्या.

सीआयडीकडे प्रकरण, आरोपी मुली जामिनावर बाहेर

उडपी गर्ल्स कॉलेज टॉयलेट व्हिडीओ प्रकरणी भाजपने राज्यभर आंदोलनही केलं होतं. नंतर हे प्रकरण सीआयडीकडे सोपवण्यात आलं. या प्रकरणातील तीन आरोपी विद्यार्थिनी सध्या जामिनावर बाहेर आहेत.

हेही वाचा: