BLOG : सर्व काही सिनेमाच आहे.....

web_cinema

Everything is Cinema Movie review : कोरोना लॉकडाऊन दरम्यान दोन महत्त्वाच्या गोष्टी घडल्या. कधी नव्हे ते लोक चार भिंतीत राहिले. एकमेकांशी समोरासमोर बसून बोलू लागले. एक दोन दिवसांसाठी या सर्व गोष्टींचं अप्रुप वाटलं. हरवलेला संवाद पुन्हा सुरु झाला. नाती रिफ्रेश होणं, करणं वगैरेच्या नावाखाली हे सर्व खपवलं गेलं. पण लॉकडाऊन वाढला. आता खरी गोची झाली. सतत घरात राहून लोक अस्वस्थ व्हायला लागले. ही अस्वस्थता वाढतंच गेली. मोठं कुटुंब एकत्र असेल तर बात वेगळी आहे. एकमेकांचे किस्से ऐकण्यात वेळ जातो, हसणं, गप्पा मारणं सुरु राहतं. आपसात टेर खेचली जाते. पण नवरा बायको दोघेच एका घरात लॉकडाऊनमध्ये अडकले असतील तर. ते ही नवरा स्ट्रगलर फिल्म डायरेक्टर आणि बायको मोठी नव्हे पण बऱ्यापैकी काम मिळत असलेली यशस्वी अभिनेत्री असतील तर. या दोघांमध्ये नक्की काय बातचीत होईल, कसे रिअॅक्ट करतील याबद्दल एक सिनेमा बनलाय. एव्हरिथिंग इज सिनेमा (2021). कोलकाता महानगरात हा सिनेमा घडतोय. 

हा लेख देखील वाचा- BLOG : 'ॲनेट (2021)' - एका अनायकाचा सिनेमा...'

दिग्दर्शक डॉन पलथरा याचा हा डॉक्यु-फिक्शन आहे. जागतिक पातळीवर डॉक्यु-फिक्शनची स्टाईल जुनी आहे. अगदी जिन ल्युक गोदार्दपासून इराणच्या मोहसीन मखमलबाफ, अब्बास कियोरोस्तमी सारख्या दिग्गजांनी डॉक्यु-फिक्शन प्रकारात महत्त्वाचं काम केलंय. भारतात हा प्रकार तेवढा प्रचलित नाही. पण केरळातल्या डॉन पलथरा आणि सनलकुमार ससीधरन सारख्या नव्या दमाच्या दिग्दर्शकांनी हा नवीन ट्रेंड आणलाय. याद्वारे जागतिक पातळीवर भारतातल्या सिनेमासंदर्भातल्या प्रयोगांची दखल घेतली जातेय. प्रतिष्ठेच्या रॉटर्डम आंतरराष्ट्रीय फिल्म फेस्टिवल 2021 मध्ये एव्हरीथिंग इज सिनेमा (2021) दाखवण्यात आला. सिनेमा रिगेन या कॅटेगरीमध्ये त्याचं स्क्रिनिंग झालं. तेव्हा स्वत: गोदार्द  व्हर्च्युअल स्क्रिनिंगला उपस्थित होते. 

नवीन सिनेमासाठी कोलकातामध्ये आलेला दिग्दर्शक आणि त्याची अभिनेत्री बायको यांची ही गोष्ट आहे. अगदी बेमालूमपणे या डॉक्युमेंट्री स्टाईल फिल्ममेकिंगमध्ये कथानकाची आखणी केली गेलीय. याआधी कोलकाता (1969) या फ्रेंच डायरेक्टर लुईस मॅल या डॉक्युमेंट्रीची फार चर्चा झाली. ब्रिटीशांच्या काळात सर्वात मोठं महानगर म्हणून कोलकाता  विकसित झालं. अस्ताव्यस्त पसरलं. खानाबदोश कामगारांचं हे शहर. तिथलं रोजचं जगणं या डॉक्युमेंट्रीत आलं होतं. डॉन पलाथराचा हा डॉक्युफिक्शन लॉकडाऊन दरम्यान कोलकात्यात काय घडलं हे दाखवतोच, पण तो त्यानंतर या शहरातल्या एका अपार्टमेन्टमध्ये अडकलेल्या सिनेमा क्षेत्राशी संबंधित या दाम्पत्यावर फोकस होतो. हा सर्व सिनेमा दिग्दर्शक नवऱ्याच्या दृष्टीकोनातून घडतोय. संपूर्ण सिनेमात इंग्रजी साहित्यापासून, स्त्री-पुरुष संबंध, फेमिनिजम, बाईची लैंगिकता, तिचं हस्तमैथुन, किर्लोस्की, तार्कोस्की सारख्या दिग्दर्शकांची फिल्ममेकिंग स्टाईल ते भारतात सिनेमा क्षेत्रात अभिनेत्रींकडे पाहण्याचा उपभोगवादी दृष्टीकोन असं भन्नाट संभाषण या दोन कॅरेक्टरमध्ये होतंय. 

अमॅच्योर शूटिंग टाईप असलेल्या या सिनेमात भन्नाट स्टेटमेन्टस आहेत. अफोर्डेबल सिनेमापासून ते देशातल्या राजकीय परिस्थितीवरही काही कॉमेंट करण्यात आल्यात. लॉकडाऊन आहे, अश्यावेळी दोन पात्रांची बंद घरातली आणि बाहेरच्या भवतालची घुसमट प्रभावीपणे दाखवण्यात आली. 

बदलत्या काळातून मेनस्ट्रीम सिनेमानं नक्की काय घेतलंय माहित नाही. पण एव्हरीथिंग इन सिनेमा(2021) सारख्या प्रयोगशील सिनेमानं या क्षेत्रातली नवं काही तरी घडण्याची आणि घडवण्याची आशा कायम ठेवलीय. मुबी या ओटीटी प्लॅटफॉर्मवर हा सिनेमा पाहता येऊ शकतो.