Sunil Tatkare vs Dhananjay Munde:दादांच्या पायाची शपथ... तटकरेंच्या आदेशानंतर धनूभाऊंचा निर्धार

मुंबई : याआधी 2014 ते 2019 या काळात चार वेळा महाराष्ट्र पालथा घातला, आता माझ्या सर्दी पडशाची आठवण तुम्हाला आली, पण अजित पवारांच्या (Ajit Pawar) पायाची शपथ घेऊन सांगतो आगामी निवडणुकीत राष्ट्रवादीला जोपर्यंत विजय प्राप्त होत नाही तोपर्यंत थांबणार नाही असा शब्द धनंजय मुंडे (Dhananjay Munde) यांनी राष्ट्रवादीचे प्रदेशाध्यक्ष सुनील तटकरे यांना दिला. ते राष्ट्रवादीच्या 25 व्या वर्धापनदिनाच्या कार्यक्रमात (NCP 25th Foundation Day) बोलत होते. 

राष्ट्रवादीचे प्रदेशाध्यक्ष सुनील तटकरे यांनी यावेळी बोलताना वरिष्ठ नेत्यांना काम करण्याच्या सूचना दिल्या. धनंजय, आता तुझ्या सर्दी पडशाचं निमित्त चालणार नाही असं सुनील तटकरे म्हणाले. त्यानंतर धनंजय मुंडेंनी थेट अजित पवारांची शपथ घेऊन त्यांना महाराष्ट्र पालथा घालण्याचं आश्वासन दिलं. 

सर्दी-पडसं झालं तरी थांबणार नाही

धनंजय मुंडे म्हणाले की, आज आपल्याला कदाचित माझ्या सर्दी पडशाची आठवण झाली असेल, पण 2014-2019 या काळात मला ना सर्दी होती ना पडसं होतं. पण आता दादांच्या पायाची शपथ घेऊन सांगतो, विधासभेलाच नव्हे तर तर जिल्हा परिषद, पंचायत समिती, महानगरपालिका, नगरपालिका असो वा नगरपरिषद, जोपर्यंत राष्ट्रवादी पक्षाला विजय प्राप्त होत नाही तोपर्यंत माझ्या सर्दी-पडशाचा तुम्हाला त्रास होणार नाही. महाराष्ट्रातील कोणत्याही कार्यकर्त्याच्या नाकाला जरी धार लागली तरी तिकडे मी रुमाल घेऊन जाईन.