Rohit Pawar : अजितदादांचे महत्व कमी करण्यासाठी सुनील तटकरे-प्रफुल्ल पटेल प्रयत्नशील

महाराष्ट्राच्या राजकारणात पुन्हा एकदा पवार कुटुंबातील संघर्ष आणि महायुतीतील मतभेद समोर आले आहेत. आमदार रोहित पवार यांनी त्यांचे काका आणि उपमुख्यमंत्री अजित पवार यांना भाजपपासून सावध राहण्याचा सल्ला दिला आहे. 'भाजप अॅनाकोंडासारखं दुसऱ्या पक्षाला गिळतं आणि डायजेस्ट करून कुठे फेकून देते हे कोणालाच कळत नाही', असे खळबळजनक विधान रोहित पवार यांनी केले आहे. वसंतदादा शुगर इन्स्टिट्यूटला (VSI) दिलेल्या निधीच्या चौकशीच्या सरकारी आदेशानंतर त्यांनी ही टीका केली. अमित शाह यांच्या 'आम्हाला कुबड्यांची गरज नाही' या वक्तव्याचा संदर्भ देत, अजित पवार आणि एकनाथ शिंदे यांचे महत्त्व कमी करण्याचा हा प्रयत्न असल्याचा आरोपही त्यांनी केला. अजित पवारांच्याच पक्षातील विदर्भ आणि कोकणातील नेते त्यांना अडचणीत आणत असल्याचे सूतोवाचही रोहित पवार यांनी केले.