Panama Deports Indians : शाहरुखचा 'डंकी' आठवतो का? तो 'डंकी' मार्ग काय आहे तरी काय? 130 भारतीय हद्दपार, अमेरिका ठरली कारणीभूत!
यामुळे दक्षिण सीमेवरील अवैध घुसखोरी कमी होईल, अशी अमेरिकेला आशा आहे. गेल्यावर्षी आलेल्या शाहरुख खानच्या डंकी चित्रपटाने धोकादायक प्रवासाची दाहकता दाखवून दिली होती.
Panama Deports Indians : पनामाने (Panama Deports Indians) 'डंकी' मार्गाने प्रवेश करण्याच्या प्रयत्नात असलेल्या130 भारतीय प्रवासींना भारतात परत पाठवलं आहे. या स्थलांतरितांनी पनामामध्ये बेकायदेशीरपणे प्रवेश केला होता. जुलैमध्ये अमेरिकेसोबत झालेल्या करारानुसार ही कारवाई करण्यात आली. या कराराअंतर्गत अमेरिकेने पनामामधील स्थलांतरितांना परत पाठवण्यासाठी 6 दशलक्ष डॉलर्सची मदत देण्याचे आश्वासन दिले होते. यामुळे आपल्या दक्षिण सीमेवरील अवैध घुसखोरी कमी होईल, अशी अमेरिकेला आशा आहे. गेल्यावर्षी आलेल्या शाहरुख खानच्या डंकी चित्रपटाने धोकादायक प्रवासाची दाहकता दाखवून दिली होती.
विशेष विमानाने दिल्लीला पाठवले
पनामाच्या अधिकाऱ्यांनी सांगितले की, या भारतीय स्थलांतरितांना विशेष विमानाने नवी दिल्लीला पाठवण्यात आले. अमेरिकेसोबतच्या या करारानुसार अमेरिकेबाहेरील कोणत्याही देशातील स्थलांतरितांना परत पाठवण्याची ही पहिलीच वेळ होती. कोलंबिया आणि पनामा दरम्यान वसलेले डॅरियन जंगल (Darien jungle) हे मध्य अमेरिका आणि मेक्सिको मार्गे दक्षिण अमेरिकेतून अमेरिकेत जाणाऱ्या स्थलांतरितांसाठी एक प्रमुख मार्ग बनले आहे. हे जंगल अत्यंत धोकादायक आहे आणि त्यात गुन्हेगारी गटांचे वर्चस्व आहे, परंतु असे असूनही, गेल्या वर्षी अर्धा दशलक्षाहून अधिक स्थलांतरित हे जंगल पार करून अमेरिकेत पोहोचले.
अमेरिका दबाव कायम ठेवत आहे
या वर्षी अमेरिकेत निवडणुका होणार आहेत आणि अशा परिस्थितीत अमेरिका, पनामा आणि मेक्सिकोसारख्या देशांवर स्थलांतराचा हा मुद्दा गांभीर्याने घेण्याचा दबाव आहे. जुलैमध्ये झालेल्या या करारानुसार पहिल्या टप्प्यात ज्या स्थलांतरितांचे गुन्हे नोंद आहेत त्यांना परत पाठवले जाईल. तथापि, भविष्यात, जे लोक हे धोकादायक डॅरियन जंगल पार करून पनामामध्ये प्रवेश करतात त्यांना परत पाठवले जाऊ शकते. पनामाचे नवे अध्यक्ष जोस राऊल मुलिनो यांनी शपथ घेतली त्याच दिवशी हा करार झाला. त्यांनी आपल्या निवडणूक प्रचारादरम्यान डॅरियन जंगल ओलांडणाऱ्या स्थलांतरितांवर कठोर कारवाई करू असे आश्वासन दिले होते.
दोन आठवड्यात 219 स्थलांतरितांना पाठवले
शुक्रवारी केलेल्या कारवाईमुळे पनामाने दोन आठवड्यांत 219 स्थलांतरितांना हद्दपार केले आहे. पनामातील स्थलांतराच्या मुद्द्यावर अमेरिकेचे सुरक्षा अधिकारी मार्लिन पिनेरो यांनी सांगितले की, या सहकार्यासाठी अमेरिका पनामाच्या सरकारचे खूप आभारी आहे.
डंकी रूट म्हणजे काय?
डंकी मार्ग हा एक बेकायदेशीर आणि धोकादायक मार्ग आहे ज्याचा वापर लोक बेकायदेशीरपणे यूएस, युरोप आणि कॅनडा सारख्या देशांमध्ये प्रवेश करण्यासाठी करतात. या मार्गाचे नाव पंजाबी शब्द "डांकी" वरून आले आहे, ज्याचा अर्थ एका ठिकाणाहून दुसऱ्या ठिकाणी उडी मारणे असा होतो. या प्रक्रियेत, लोक अनेकदा व्हिसा आणि तिकीटाशिवाय अनेक देशांच्या सीमा ओलांडतात. प्रवास लांब आणि धोकादायक आहे, ज्यामध्ये जंगले, नद्या आणि महासागर पार करणे समाविष्ट आहे. या मार्गाचा वापर करणारे लोक मानवी तस्करांची मदत घेतात, जे त्यांना अवैधरित्या सीमा ओलांडण्यास मदत करतात.
इतर महत्वाच्या बातम्या
महत्त्वाच्या बातम्या
