प्ले स्टोअरवरून हटवलं Remove China Apps; गूगलकडून कारण मात्र अस्पष्ट

'रिमूव्ह चायना अॅप' हे अॅप फार कमी वेळात भारतात लोकप्रिय झालं होतं. काही आठवड्यांमध्येच 50 लाखांपेक्षा जास्त वेळा हे अॅप डाऊनलोड करण्यात आलं होतं. मात्र आता गूगलने हे अॅप प्ले स्टोअरवरून हटवलं आहे.

नवी दिल्ली : भारतात सध्या चीन विरोधातील भावनांनी जोर धरला आहे. अशातच अँडॉईड फोनमधील चिनी अॅप्स ओळखून डिलीट करण्याचा दावा करणारं Remove China Apps देशभरात व्हायरल झालं आहे. परंतु, गूगल प्ले स्टोअरवरून हे अॅप हटवण्यात आलं आहे. फार कमी वेळातच हे अॅप भारतात लोकप्रिय झालं होतं. या अॅपने गूगल प्ले स्टोअरच्या टॉप फ्री अॅप्सच्या यादीत स्थान मिळवलं होतं. फक्त काही आठवड्यांमध्येच 50 लाखांपेक्षा जास्त वेळा हे अॅप डाऊनलोड करण्यात आलं होतं. तर या अॅपला 1.89 लाख रिव्ह्यू आणि 4.9 स्टार मिळाले होते. या आकडेवारीवरुन या अॅपच्या लोकप्रियतेचा अंदाज बांधता येईल. कोरोना संकट आणि भारत-चीन सीमेवरील तणाव यासारख्या कारणांमुळे देशभरात चीनविरोधात रोष आहे.

'Remove China App' हे अॅप गेल्या महिन्यातील 17 तारखेला लॉन्च करण्यात आलं होतं. त्यानंतर भारतीयांनी या अॅपला मोठ्या प्रमाणावर पसंती दर्शवली. हे अॅप देशात मोठ्या प्रमाणावर लोकप्रिय होण्यासाठी अनेक कारणं आहेत. भारत-चीन सीमेवरील तणाव आणि कोरोनाचा वाढता प्रादुर्भाव यांमुळे देशावर आलेलं संकट हे त्यातील महत्त्वाचं कारण मानलं जात आहे.

गूगलने प्ले स्टोअरवरून हटवलं 'रिमूव्ह चायना अॅप'

भारतीय नागरिकांमध्ये सध्या चीनविरोधातील भावना तीव्र झाल्या आहेत. असा दावा करण्यात येत आहे की, या अॅपच्या मदतीने टिकटॉक आणि युसी ब्राउझर यांसारखे कथित चीनी अॅप्स डिलीट केले जाऊ शकतात. दरम्यान, अॅप तयार करणाऱ्या 'वन टच अॅप लॅब्स'ने शैक्षणिक उद्देश समोर ठेवून हे अॅप तयार केले असल्याचं सांगितलं आहे. त्यांनी सांगितलं की, अॅप डेव्हलपर्स व्यावसायिक उद्देशांसाठी हे अॅप वापरू शकत नाहीत.'

पाहा व्हिडीओ : अँड्रॉईड फोनमधील चिनी अॅप शोधणारं नवं अॅप, रिमूव्ह चायना अॅप्स कसं काम करतं?

भारतात चीनच्या विरोधात होत होता वापर

गूगलने प्ले स्टोअर वरून हे अॅप हटवलं असलं तरिही असं करण्यामागील कारण मात्र अद्याप स्पष्ट केलेलं नाही. तसेच पुन्हा हे अॅप प्लेस्टोअरवर उपलब्ध होणार की, नाही. याबाबतही गूगलने कोणतीच माहिती दिलेली नाही. जयपूरची कंपनी असलेल्या 'वन टच अॅप लॅब्स'ने आपल्या ट्वीटमध्ये सांगितलं आहे की, 'रिमूव्ह चायना अॅप' गूगलने प्ले स्टोअरवरून सस्पेंड केलं आहे.

Remove China Apps काय आहे?

Remove China Apps च्या निर्मित्यांचा दावा आहे की, हे अॅप शैक्षणिक उद्देशासाठी बनवलं आहे. हे अॅप अँड्रॉईड फोन युझर्सना त्यांच्या फोनमध्ये इन्स्टॉल असलेल्या अॅपचे मूळ देश कोणते हे ओळखण्यास मदत करतं. या अॅपच्या नावावरुनच स्पष्ट होतं की, फक्त चिनी कंपन्यांनी बनवलेले अॅप ओळखण्यास हे अॅप मदत करतं. रिमूव्ह चायला अॅप्सच्या मदतीने युझर्स चिनी अॅप्स अनइन्स्टॉल करु शकतात.

महत्त्वाची बाब म्हणजे, 17 मे रोजी गूगल प्ले स्टोअरवर लाईव्ह झालेलं हे अॅप आतापर्यंत 50 लाखांपेक्षा जास्त युझर्सनी डाऊनलोड केलं आहे. गुगल प्ले वर या अॅपला 4.9 रेटिंगसह बहुतांश पॉझिटिव्ह रिव्ह्यू मिळाले होते. OneTouch AppLabs ने या अॅपची निर्मिती केली आहे. ही जयपूरची कंपनी असून डोमेन ओनर साईट Whois नुसार याची वेबसाईट 8 मे रोजी बनवली होती. गुगल प्ले स्टोअरवर हे अॅप फ्री उपलब्ध होतं. विशेष म्हणजे, हे अॅप वापरण्यासाठी लॉगइन करण्याची गरज नव्हती. यूजर्स आपल्या अँडॉईड फोनमध्ये चिनी अॅप शोधण्यासाठी Scan चा पर्याय निवडता येत होता.

संबंधित बातम्या :