Pune Porsche case : पुण्यातील धनिकपुत्राला 300 शब्दांचा निबंध लिहायला सांगून सोडणाऱ्या बाल हक्क न्याय मंडळाचे दोन सदस्य बडतर्फ
Pune Porsche case : पुण्यातील पोर्शे कार अपघात प्रकरणातील अल्पवयीन आरोपीला तात्काळ जामीन देणाऱ्या बाल हक्क न्याय मंडळाच्या दोन सदस्यांना बडतर्फ करण्यात आल्याची माहिती समोर आली आहे.
पुणे: पुण्यात कल्याणीनगर परिसरात झालेल्या हिट अँड रन प्रकरणाची राज्यासह देशाभरात चर्चा झाली. या प्रकरणात आणखी एक अपडेट आता समोर आली आहे. पुण्यातील पोर्शे कार अपघात प्रकरणातील अल्पवयीन आरोपीला तात्काळ जामीन देणाऱ्या बाल हक्क न्याय मंडळाच्या दोन सदस्यांना बडतर्फ करण्यात आल्याची माहिती समोर आली आहे. एल.एन.धनवडे आणि कविता थोरात अशी या दोन सदस्यांची नावे आहेत. (Pune Porsche case)
हा भीषण अपघात झाला त्या 19 मे च्या मध्यरात्री पुण्यातील कल्याणीनगरमधे दारुच्या नशेत पोर्शे कार चालवणाऱ्या अल्पवयीन मुलाला पोलीसांनी अटक करुन बाल हक्क न्याय मंडळासमोर हजर केले होते. मात्र एल. एन. धनवडे आणि कविता थोरात यांनी तीनशे शब्दांचा निबंध लिहिण्याची शिक्षा देऊन त्या अल्पवयीन आरोपीची जामिनावर सुटका केली होती. त्यानंतर महिला आणि बालकल्याण विभागाकडून या दोघांची चौकशी करण्यात आली आणि त्याचा अहवाल राज्य सरकारला सादर करण्यात आला होता. चौकशीत दोषी आढळल्यानंतर आता या दोघांना बाल हक्क न्याय मंडळावरून बडतर्फ करण्यात आलं आहे.
नेमकं काय आहे प्रकरण?
पुण्यातील बांधकाम व्यावसायिकाच्या 17 वर्षाच्या अल्पवयीन मुलानं दारुच्या नशेत भरधाव वेगानं आलिशान पोर्शे गाडीने दुचाकीला धडक दिली होती. यामध्ये दोन आयटी अभियंत्यांचा जागीच मृत्यू झाला. अनिश अवधिया (27 वर्षे) आणि अश्विनी कोष्टा अशी अपघातामध्ये जागीच मृत्यू झालेल्यांची नावे होती. पुण्यातील कल्याणीनगरमध्ये झालेल्या अपघातात पोर्शे गाडीचा वेग इतका भरधाव होता की अश्विनी कोस्टा या 15 फूट दूर फेकली गेली.
त्यानंतर पोलिसांनी त्या अल्पवयीन आरोपीला ताब्यात घेतलं. पण आरोपी अल्पवयीन असल्याने त्याला बालन्याय मंडळासमोर उभं करण्यात आलं. बालन्याय मंडळाने त्या अल्पवयीन मुलाला 300 शब्दांचा निबंध लिहिण्याची आणि इतर काही थातूरमातून शिक्षा दिल्या आणि जामीन मंजूर केला होता.
कल्याणीनगर अपघात प्रकरणात पोर्शे कार चालक अल्पवयीन मुलाला घटनेच्या अवघ्या 15 तासात 300 शब्दांचा निबंध लेखनासह विविध अटी घालत जामीन मंजूर करण्यात आला होता. हा जामीन ज्यांनी दिला त्या बालन्याय मंडळाच्या दोन शासकीय सदस्यांवर शिस्तभांगाची कारवाई करण्याची शिफारस महिला आणि बालविकास विभागाने सरकारकडे केली होती. अल्पवयीन आरोपीच्या जामिनाच्या निर्णयावर देशभरातून तीव्र प्रक्रिया उमटल्या होत्या. त्यानंतर महिला आणि बाल विकास आयुक्तांनी या सदस्यांच्या चौकशीसाठी समिती नेमली होती. तसेच त्या दोघांना कारणे दाखवा नोटीस बजावली होती.
महत्त्वाच्या बातम्या
